უსაფრთხოება და კონფიდენციალურობა

ჩატის შეტყობინებები, სათაურები, ჩატში დართული და მასში შექმნილი ფაილები დაშიფრული ინახება. მათი გასაღები დაცულია ცალკე დაშიფვრის პაროლით, რომელსაც თავად ირჩევთ.

• დაშიფვრის პაროლი თქვენს მოწყობილობას არ ტოვებს. გასაღები მისგან მოწყობილობაზევე იქმნება (Argon2id), სერვერზე კი თქვენი პირადი გასაღები მხოლოდ დაშიფრული სახით ინახება.
• ჩვენს სერვერებზე მხოლოდ თქვენი საჯარო გასაღებია: მათ შეუძლიათ ახალი შეტყობინებების თქვენთვის დაშიფვრა, მაგრამ შენახული ჩატების გახსნა — არა.
• Krebsiti-ის ადმინისტრირების ხელსაწყოები თქვენს ჩატებს ვერ აჩვენებს, ჩვენი თანამშრომლები კი მათ გაშიფვრას ვერ შეძლებენ.
• თუ დაშიფვრის პაროლი დაგავიწყდათ, თქვენი ჩატების აღდგენას ვერავინ შეძლებს, მათ შორის Krebsiti. პაროლის განულება ჩატებს სამუდამოდ შლის.
• ჩატები, რომლებიც ანგარიშზე დაშიფვრის პაროლის დაყენებამდე შეინახა, წაშლამდე წინანდელი, დაუშიფრავი სახით რჩება.

პასუხის მოსამზადებლად თქვენს შეტყობინებას და მისთვის საჭირო მასალას ჩვენი სერვერი წაკითხვადი სახით ამუშავებს და უგზავნის კონფიდენციალურობის პოლიტიკაში ჩამოთვლილ AI პროვაიდერებს — მაგალითად, OpenAI-ს პასუხისთვის და Google Cloud Vision-ს სურათებიდან ტექსტის ამოსაცნობად.

თქვენი შეტყობინებები წაკითხვადი სახით არ ინახება. მოთხოვნის შესრულებისას დართული ფაილი სერვერის ოპერატიულ მეხსიერებაში 10 წუთამდე რჩება.

ზოგიერთი მონაცემი სერვისისთვის წაკითხვადი უნდა დარჩეს, რომ მასთან მუშაობა შეძლოს: AI Studio-ს ფაილები, „სამუშაოს“ მონაცემები (კლიენტები, საქმეები და საქმის ფაილები) და ანალიზატორში ატვირთული დოკუმენტები. მათ იცავს ანგარიშზე შესვლა და უფლებები და არა თქვენი დაშიფვრის პაროლი. ანალიზატორის დასკვნები იშიფრება, როგორც კი ანგარიშზე დაშიფრული ჩატი გააქტიურდება.

• შესვლა ელფოსტითა და პაროლით, Google-ით ან Apple-ით.
• პაროლები მხოლოდ bcrypt ჰეშის სახით ინახება.
• სამი არასწორი პაროლის შემდეგ ანგარიში 30 წუთით იბლოკება; პირადი ანგარიშის განბლოკვა უფრო ადრეც შეიძლება ელფოსტით გამოგზავნილი ბმულით.
• არჩევითი ორფაქტორიანი ავთენტიფიკაცია ელფოსტით ან SMS-ით გამოგზავნილი ერთჯერადი კოდით.
• შესული მოწყობილობების სია და ყველა სხვა მოწყობილობიდან ან ყველგან გამოსვლა.

• ჩატები ინახება, სანამ მათ არ წაშლით. ჩატის წაშლა მას და მის ფაილებს სამუდამოდ შლის.
• ანგარიშის წაშლა თავად შეგიძლიათ ვებში, დესკტოპის აპლიკაციაში ან iPhone-ზე. ანგარიში მოთხოვნიდან 30 დღის შემდეგ იშლება; ამ პერიოდში შესვლა წაშლას აუქმებს.
• ჩანაწერები, რომელთა შენახვაც კანონით არის სავალდებულო, მაგალითად, საბუღალტრო ჩანაწერები, ანგარიშის წაშლის შემდეგაც ინახება.
• კომპანიის აგენტის ანგარიშს კომპანიის ადმინისტრატორი შლის.

ბარათით გადახდა საქართველოს ბანკის გადახდის გვერდზე ხდება, ამიტომ Krebsiti თქვენი ბარათის ნომერს ვერ ხედავს და არ ინახავს. შენახული ბარათისთვის ინახება მხოლოდ ბანკის იდენტიფიკატორი და ნაწილობრივ დაფარული ნომერი. iPhone-ზე შესყიდვები Apple-ის App Store-ით სრულდება.

Krebsiti-ის სერვერები განთავსებულია Hetzner-ში, გერმანიაში, ფაილები კი Cloudflare-ში ინახება. krebsiti.com-თან კავშირი HTTPS-ით ხდება.

მომსახურების მიმწოდებლების სრული სია და ის, თუ რას იღებს თითოეული, კონფიდენციალურობის პოლიტიკაშია.