„ელექტროენერგეტიკის, ბუნებრივი გაზისა და წყალმომარაგების სექტორში რეგულირების საფასურის გაანგარიშების და გადახდის წესების დამტკიცების შესახებ“

(ძალადაკარგულია - 31.07.19 №19)

საქართველოს ენერგეტიკისა და წყალმომარაგების მარეგულირებელი

ეროვნული კომისიის

დადგენილება №24

2008 წლის 18 სექტემბერი

ქ. ქუთაისი

ელექტროენერგეტიკის, ბუნებრივი გაზისა და წყალმომარაგების სექტორში რეგულირების საფასურის გაანგარიშების და გადახდის წესების დამტკიცების შესახებ

„ელექტროენერგეტიკისა და ბუნებრივი გაზის შესახებ“ საქართველოს კანონის მე-5 მუხლის პირველი პუნქტის საფუძველზე, კომისია ვადგენთ:

1. დამტკიცდეს ელექტროენერგეტიკის, ბუნებრივი გაზისა და წყალმომარაგების სექტორში რეგულირების საფასურის გაანგარიშების და გადახდის წესები.

2. დამტკიცდეს ლიცენზიანტების, მიმწოდებლების, იმპორტიორების, ექსპორტიორების, მცირე სიმძლავრის ელექტროსადგურებისა და ელექტროენერგეტიკული ბაზრის ოპერატორის რეგულირების საფასურის კოეფიციენტები (დანართი № 1).

საქართველოს ენერგეტიკისა და წყალმომარაგების მარეგულირებელი ეროვნული კომისიის 2011 წლის 19 ოქტომბრის დადგენილება №17 - ვებგვერდი, 24.10.2011 წ.

საქართველოს ენერგეტიკისა და წყალმომარაგების მარეგულირებელი ეროვნული კომისიის 2014 წლის 25 დეკემბრის დადგენილება №34 - ვებგვერდი, 30.12.2014 წ.

3. ამ დადგენილების ამოქმედებისთანავე ძალადაკარგულად გამოცხადდეს „ელექტროენერგეტიკისა და ბუნებრივი გაზის სექტორში რეგულირების საფასურის გაანგარიშებისა და გადახდის წესის“ დამტკიცების შესახებ“ საქართველოს ენერგეტიკის მარეგულირებელი ეროვნული კომისიის (სემეკ) 2003 წლის 8 სექტემბრის №17 დადგენილება (სსს III, 16.09.2003, №102, მუხლი 873).

4. დადგენილება ძალაში შედის გამოქვეყნებიდან მე-15 დღეს.

თავმჯდომარე გ. ჩალაგაშვილი

ე ლექტროენერგეტიკის, ბუნებრივი გაზისა და წყალმომარაგების სექტორში რეგულირების საფასურის გაანგარიშების და გადახდის წესები

მუხლი 1. დადგენილების მიზანი

1. ელექტროენერგეტიკის, ბუნებრივი გაზისა და წყალმომარაგების სექტორში რეგულირების საფასურის გაანგარიშების და გადახდის წესების (შემდგომში – წესები) მიზანია „ელექტროენერგეტიკისა და ბუნებრივი გაზის შესახებ“, „დამოუკიდებელი ეროვნული მარეგულირებელი ორგანოების შესახებ“ და „რეგულირების საფასურის შესახებ“ საქართველოს კანონების საფუძველზე, რეგულირების საფასურის გაანგარიშებისა და გადახდის წესის დადგენა.

2. აღნიშნული წესი ვრცელდება ელექტროენერგეტიკის, ბუნებრივი გაზისა და წყალმომარაგების სექტორებზე და სავალდებულოა იმ პირთათვის, რომელთა საქმიანობის წესი და პირობები განსაზღვრულია „ელექტროენერგეტიკისა და ბუნებრივი გაზის შესახებ“ საქართველოს კანონით.

მუხლი 2. ტერმინთა განმარტებები

წინამდებარე წესებში გამოყენებულ ტერმინებს გააჩნია იგივე მნიშვნელობა, როგორც ეს არის განსაზღვრული „ელექტროენერგეტიკისა და ბუნებრივი გაზის შესახებ“, „რეგულირების საფასურის შესახებ“ და „დამოუკიდებელი ეროვნული მარეგულირებელი ორგანოების შესახებ“ საქართველოს კანონებით.

მუხლი 3. ზოგადი დებულებები

1. რეგულირების საფასური წარმოადგენს თანხას, რომელსაც კანონმდებლობის საფუძველზე, წინამდებარე წესის შესაბამისად, საქართველოს ენერგეტიკისა და წყალმომარაგების მარეგულირებელი ეროვნული კომისიის (შემდგომში – კომისია) საქმიანობასთან, მათ შორის – სალიცენზიო, სატარიფო, სადავო საკითხების გადაწყვეტისა და სხვა უფლებამოსილების განხორციელებასთან დაკავშირებული ხარჯების დასაფარად, იხდიან რეგულირების საფასურის გადამხდელები.

2. კომისია მომავალი წლის ბიუჯეტს ამტკიცებს ყოველი წლის 1 ოქტომბრისათვის. რეგულირების საფასურით მიღებული თანხა წარმოადგენს კომისიის წლიური შემოსავლების ძირითად წყაროს. რეგულირების საფასური ჩაირიცხება კომისიის ანგარიშზე. ამ ანგარიშზე არსებულ თანხებს განკარგავს მხოლოდ კომისია. კომისიის მიერ წლის განმავლობაში გამოუყენებელი თანხები გადაიტანება მომავალი წლის ანგარიშზე. თუ რეგულირების საფასურით მიღებული შემოსავალი არ ფარავს კომისიის მიმდინარე დანახარჯებს, კომისია უფლებამოსილია აიღოს სესხი. ამ სესხისა და შესაბამისი პროცენტის გადახდა ხდება მომავალი წლის რეგულირების საფასურიდან.

3. პირი, რომელიც ეწევა „ელექტროენერგეტიკისა და ბუნებრივი გაზის შესახებ“ საქართველოს კანონით განსაზღვრულ რეგულირებად საქმიანობას, ვალდებულია გადაიხადოს რეგულირების საფასური, თუ:

ა) მოქმედი კანონმდებლობის შესაბამისად, აკრძალულია კომისიის მიერ გაცემული შესაბამისი ლიცენზიის გარეშე საქმიანობის განხორციელება;

ბ) საქმიანობისას ხელმძღვანელობს კომისიის მიერ მიღებული (გამოცემული) სამართლებრივი აქტებით;

გ) კომისია ახორციელებს მის საქმიანობაზე მონიტორინგს ან/და ზედამხედველობას, მათ შორის სალიცენზიო პირობების შესრულებაზე კონტროლს;

დ) „ელექტროენერგეტიკისა და ბუნებრივი გაზის შესახებ“ საქართველოს კანონში პირდაპირ არის განსაზღვრული მის მიერ განხორციელებული საქმიანობისას რეგულირების საფასურის გადახდის ვალდებულება.

4. თუ პირი ეწევა „ელექტროენერგეტიკისა და ბუნებრივი გაზის შესახებ“ საქართველოს კანონით განსაზღვრულ იმ საქმიანობას, რომელზეც მოქმედი კანონმდებლობისა და ამ წესების შესაბამისად ვალდებულია კომისიას გადაუხადოს რეგულირების საფასური, რეგულირების საფასურს იხდის რეგულირებას დაქვემდებარებული საქონლის (მომსახურების) მიწოდების ან/და შესრულებული სამუშაოს მთლიანი ღირებულებიდან (დღგ-ის გარეშე).

5. რეგულირების საფასურის გადამხდელები არიან: ელექტროენერგიის წარმოების, გადაცემის, დისპეტჩერიზაციის, განაწილების, ბუნებრივი გაზის ტრანსპორტირების, განაწილების და წყალმომარაგების ლიცენზიატები, ასევე ელექტროენერგიის იმპორტიორები, ექსპორტიორები, ელექტროენერგეტიკული ბაზრის ოპერატორი, მცირე სიმძლავრის ელექტროსადგურები, ბუნებრივი გაზის მიმწოდებლები.

6. თუ პირი ერთდროულად ეწევა ერთზე მეტ რეგულირებად საქმიანობას, იგი ვალდებულია რეგულირების საფასური გადაიხადოს განცალკევებულად, თითოეული რეგულირებადი საქმიანობის მიხედვით.

7. თუ პირი ერთზე მეტ რეგულირებად საქმიანობასთან ერთად ეწევა სხვა სამეწარმეო საქმიანობას, იგი ვალდებულია მომავალი წლის საქმიანობის საპროგნოზო მოცულობის შესახებ ინფორმაცია კომისიას წარუდგინოს განცალკევებულად, შესაბამისი რეგულირებადი საქმიანობის მიხედვით.

8. რეგულირების საფასურის გადამხდელების მიერ ფაქტობრივად განხორციელებული შესაბამისი რეგულირებადი საქმიანობის მოცულობის საფუძველზე, ყოველწლიურად ხორციელდება საპროგნოზო და ფაქტობრივი რეგულირების საფასურის ოდენობის შედარება ამ წესების შესაბამისად.

9. რეგულირების საფასური გაითვალისწინება რეგულირების საფასურის გადამხდელებისათვის დადგენილ ტარიფში ხოლო რეგულირების საფასურის გადამხდელი იმ პირებისთვის, რომლებიც რეგულირებად საქმიანობას ეწევიან ამ საქმიანობაზე კომისიის მიერ ტარიფის დადგენის გარეშე, რეგულირების საფასური გაითვალისწინება მათ ხარჯებში.

10. თუ სატარიფო განაცხადის ან სხვა საკითხის განხილვისას კომისია საჭიროდ ჩათვლის რაიმე გარემოების დამატებით შესწავლას და ამისათვის საჭიროა დამატებითი ხარჯების გადახდა, კომისია უფლებამოსილია მოსთხოვოს განმცხადებელს აღნიშნული დამატებითი ხარჯების დაფარვა.

საქართველოს ენერგეტიკისა და წყალმომარაგების მარეგულირებელი ეროვნული კომისიის 2015 წლის 26 მარტის დადგენილება №4 - ვებგვერდი, 01.04.2015წ.

მუხლი 4. რეგულირების საფასურის განსაზღვრის პირობები

1. რეგულირების საფასურის გადამხდელები ვალდებულნი არიან კომისიის გადაწყვეტილებით დამტკიცებული ერთიანი ანგარიშგების ფორმის მოთხოვნის შესაბამისად, კომისიას წარუდგინონ შესაბამისი რეგულირებადი საქმიანობის შესახებ ინფორმაცია, მიმდინარე კალენდარული წლის ფაქტობრივი და მომავალი კალენდარული წლის საპროგნოზო მოცულობების თაობაზე. აღნიშნული ინფორმაცია უნდა შეიცავდეს შესაბამისი რეგულირებადი საქმიანობიდან გამომდინარე მომსახურებისა და შემოსავლების შესახებ ინფორმაციას შესაბამისი პროდუქციის ან/და მომსახურების ფასისა და მოცულობების მითითებით. კომისია რეგულირების საფასურს დაიანგარიშებს ამ წესების პირობების გათვალისწინებით, ყოველი წლის 15 სექტემბრამდე კომისიაში არსებულ ინფორმაციაზე დაყრდნობით (საწარმოს მიერ მიწოდებულ ერთიან ანგარიშგებაში მოცემულ ინფორმაციაზე ან/და სხვა ფაქტობრივ მონაცემებზე დაყრდნობით). აუცილებლობის შემთხვევაში, რეგულირების საფასურის გადამხდელის მიერ შესაძლებელია ასევე მოხდეს მონაცემების დაზუსტებაც.

2. კომისია მომავალი წლის ბიუჯეტის დამტკიცების შემდეგ, ყოველი კალენდარული წლის 1 ნოემბრამდე, დაიანგარიშებს მომავალი წლის საპროგნოზო რეგულირების საფასურს მათ მიერ წარმოდგენილი საპროგნოზო მონაცემების საფუძველზე.

3. კომისიის მიერ, რეგულირების საფასური უნდა გაანგარიშდეს ისე, რომ მთლიანად ფარავდეს კომისიის ბიუჯეტით გათვალისწინებულ ხარჯებს.

4. რეგულირების საფასურის გადამხდელების მიერ, ამ მუხლის პირველი პუნქტით განსაზღვრული ინფორმაციის დროულად წარმოუდგენლობის შემთხვევაში, კომისიის მიერ შეიძლება გამოყენებულ იქნეს კანონმდებლობით გათვალისწინებული ზომები. ამასთან, მომავალი წლის საქმიანობის საპროგნოზო მოცულობის დროულად წარმოუდგენლობის შემთხვევაში რეგულირების საფასურის გაანგარიშებისას, კომისია ასევე უფლებამოსილია გამოიყენოს წინა წლის ფაქტობრივი მონაცემები.

5. რეგულირების საფასურის ოდენობა არ უნდა აღემატებოდეს კალენდარული წლის განმავლობაში რეგულირებას დაქვემდებარებული საქონლის (მომსახურების) მიწოდების ან/და შესრულებული სამუშაოს მთლიანი ღირებულების (დღგ-ის გარეშე) 0,75 პროცენტს.

საქართველოს ენერგეტიკისა და წყალმომარაგების მარეგულირებელი ეროვნული კომისიის 2010 წლის 13 ოქტომბრის დადგენილება№24-სსმIII,№134,19.10.2010წ., მუხ.1930

საქართველოს ენერგეტიკისა და წყალმომარაგების მარეგულირებელი ეროვნული კომისიის 2016 წლის 26 აგვისტოს დადგენილება №15 - ვებგვერდი, 30.08.2016წ.

მუხლი 5. საპროგნოზო და ფაქტობრივი რეგულირების საფასურის ოდენობის შედარება

1. საპროგნოზო და ფაქტობრივი რეგულირების საფასურის ოდენობის შედარება კომისიის მიერ უნდა განხორციელდეს ყოველი წლის 1 მაისისათვის, რეგულირების საფასურის გადამხდელების მიერ კომისიისათვის წარდგენილი ინფორმაციის საფუძველზე, რომელიც შესაბამის რეგულირებად საქმიანობასთან დაკავშირებით უნდა შეიცავდეს შემდეგ ინფორმაციას:

ა) ფაქტობრივად განხორციელებული შესაბამისი რეგულირებადი საქმიანობიდან მიღებულ შემოსავალს;

ბ) შესაბამისი რეგულირებადი საქმიანობისას ფაქტობრივად რეალიზებული პროდუქციის საერთო რაოდენობასა და ფასს.

2. რეგულირების საფასურის გადამხედელები ვალდებულნი არიან ყოველი წლის 1 აპრილამდე კომისიას წარუდგინონ ამ მუხლის პირველი პუნქტის ა) და ბ) ქვეპუნქტებით განსაზღვრული ინფორმაცია შესაბამის რეგულირებად საქმიანობასთან დაკავშირებით განცალკევებულად.

3. კომისიის მიერ გასული წლის ფაქტობრივი და საპროგნოზო რეგულირების საფასურის ოდენობის შედარების შემდეგ ფაქტობრივად განხორციელებული შესაბამისი რეგულირებადი საქმიანობიდან გამომდინარე რეგულირების საფასურის გადამხდელების მიერ ზედმეტად გადახდილი თანხა ჩაითვლება მომავალი წლის გადასახდელ რეგულირების საფასურში ხოლო დანაკლისი კი ექვემდებარება გადახდას, კომისიის მიერ მათთვის მითითებულ ვადებში.

4. იმ შემთხვევაში, თუ რეგულირების საფასურის გადამხდელი წყვეტს ამა თუ იმ რეგულირებად საქმიანობას, კომისიის მიერ განხორციელებული საპროგნოზო და ფაქტობრივი რეგულირების საფასურის ოდენობის შედარების შემდეგ რეგულირების საფასურის გადამხდელებს, მათ მიერ ზედმეტად გადახდილი თანხა უნდა დაუბრუნდეთ, ხოლო დანაკლისი კი ექვემდებარება გადახდას კომისიის მიერ მითითებულ ვადებში.

მუხლი 6. რეგულირების საფასურის გაანგარიშების წესი

1. რეგულირების საფასურის გადამხდელები რეგულირების საფასურს იხდიან რეგულირებას დაქვემდებარებული საქონლის (მომსახურების) მიწოდების ან/და შესრულებული სამუშაოს მთლიანი ღირებულებისა (დღგ-ის გარეშე) და №1 დანართით განსაზღვრული კოეფიციენტების ნამრავლით.

2. რეგულირების საფასურის ოდენობა და ლიცენზიატების, მიმწოდებლების, იმპორტიორების, ექსპორტიორების, მცირე სიმძლავრის ელექტროსადგურებისა და ელექტროენერგეტიკული ბაზრის ოპერატორისათვის რეგულირების საფასურის კოეფიციენტი განისაზღვრება ამ წესების დანართ № 1-ში მოცემული მაჩვენებლების შესაბამისად.

3. რეგულირების საფასურის გამოთვლა უნდა განხორციელდეს:

ა) ამა თუ იმ პირის მიერ რეგულირებადი საქმიანობის დაწყებისთანავე;

ბ) კომისიის ბიუჯეტის შესავსებად ან/და შემოსავლების დასაბალანსებლად ადგილი აქვს №1 დანართში მოცემული კოეფიციენტის ცვლილებას.

მუხლი 7. რეგულირების საფასურის გადახდის წესი

რეგულირების საფასურის გადამხდელები ვალდებულნი არიან, შესაბამისი რეგულირებადი საქმიანობიდან გამომდინარე, ინდივიდუალურად დაფარონ კომისიის მიერ დადგენილი რეგულირების საფასურის 30% ყოველი კალენდარული წლის პირველი კვარტალის განმავლობაში და 35-35% მომდევნო ორი კვარტალის განმავლობაში იმგვარად, რომ შესაბამის რეგულირებად საქმიანობასთან დაკავშირებით, რეგულირების საფასურის 100%-ის ანაზღაურება განხორციელდეს ყოველი კალენდარული წლის 1 ოქტომბრამდე.

მუხლი 8. პასუხისმგებლობა რეგულირების საფასურის გადაუხდელობისთვის და მისი ამოღების უზრუნველყოფის საშუალებები

1. კომისია უფლებამოსილია, რეგულირების საფასურის არგადამხდელი ან ამ საფასურის გადახდის ვადების დამრღვევის მიმართ გამოიყენოს კანონმდებლობით მისთვის მინიჭებული უფლებამოსილებანი.

2. კომისია უფლებამოსილია, თავისი შეხედულებისამებრ მოსთხოვოს რეგულირების საფასურის გადამხდელებს ფინანსური გარანტია, რაც უზრუნველყოფს მათ მიერ გადასახდელი რეგულირების საფასურის ანაზღაურებას.

მუხლი 9. გარდამავალი დებულებები

წყალმომარაგების სექტორში მოქმედი მიმწოდებლები რეგულირების საფასურს, ამ წესების პირობების დაცვით, გადაიხდიან 2009 წლის 1 იანვრიდან. აქედან გამომდინარე, წყალმომარაგების სექტორში მოქმედი სასმელი წყლის მიმწოდებლები ვალდებულნი არიან, ამ წესების მოთხოვნათა მიხედვით, კომისიას წარუდგინონ შესაბამისი რეგულირებადი საქმიანობის შესახებ ინფორმაცია 2008 წლის 1 ნოემბრამდე.

დანართი №1

ლიცენზიატების, მიმწოდებლების, იმპორტიორების, ექსპორტიორების, მცირე სიმძლავრის ელექტროსადგურებისა და ელექტროენერგეტიკული ბაზრის ოპერატორის რეგულირების საფასურის კოეფიციენტები

1. ელექტროენერგეტიკის, ბუნებრივი გაზის და წყალმომარაგების სექტორის ლიცენზიატების, მიმწოდებლების, იმპორტიორების, ექსპორტიორების, მცირე სიმძლავრის ელექტროსადგურებისა და ელექტროენერგეტიკული ბაზრის ოპერატორის მიერ გადასახდელი რეგულირების საფასურის კოეფიციენტები:

ელექტროენერგეტიკული სექტორი:
წარმოების ლიცენზიატი	0.002
გადაცემის ლიცენზიატი	0.002
დისპეტჩერიზაციის ლიცენზიატი	0.002
განაწილების ლიცენზიანტი	0.002
იმპორტიორი	0.002
ექსპორტიორი	0.002
ელექტროენერგეტიკული ბაზრის ოპერატორი	0.002
მცირე სიმძლავრის ელექტროსადგური	0.002
ბუნებრივი გაზის სექტორი:
მიმწოდებელი	0.002
ტრანსპორტირების ლიცენზიატი	0.002
განაწილების ლიცენზიანტი	0.002
წყალმომარაგების სექტორი:
წყალმომარაგების ლიცენზიატი	0.002

2. ელექტროენერგეტიკული ბაზრის ოპერატორის რეგულირების საფასურის განსაზღვრისას მის შემოსავალში არ გაითვალისწინება იმ საქმიანობიდან მიღებული შემოსავალი, რომლიდანაც საქართველოს კანონმდებლობის თანახმად არ უნდა რჩებოდეს მოგება, მოცემულ შემოსავალში არ იგულისხმება ელექტროენერგეტიკული ბაზრის ოპერატორის მომსახურების საფასურით მიღებული შემოსავალი.

საქართველოს ენერგეტიკისა და წყალმომარაგების მარეგულირებელი ეროვნული კომისიის 2010 წლის 13 ოქტომბრის დადგენილება№24-სსმIII,№134,19.10.2010წ., მუხ.1930

საქართველოს ენერგეტიკისა და წყალმომარაგების მარეგულირებელი ეროვნული კომისიის 2013 წლის 23 აგვისტოს დადგენილება №7 - ვებგვერდი, 29.08.2013 წ.