სახელმწიფო სარეგისტრაციო კოდი 040.030.000.22.022.009.464
საქართველოს განათლებისა და მეცნიერების მინისტრის
ბრძანება №856
2006 წლის 11 ოქტომბერი
ქ. თბილისი
„საჯარო სამართლის იურიდიული პირის „ზურაბ ჟვანიას სახელობის სახელმწიფო ადმინისტრირების სკოლის“ წესდების დამტკიცების შესახებ“ საქართველოს განათლებისა და მეცნიერების მინისტრის 2005 წლის 18 აგვისტოს №411 ბრძანებაში ცვლილებებისა და დამატებების შეტანის შესახებ
საქართველოს ზოგადი ადმინისტრაციული კოდექსის 63-ე მუხლის, „ნორმატიული აქტების შესახებ“ საქართველოს კანონის 36-ე მუხლის, „საქართველოს განათლებისა და მეცნიერების სამინისტროს დებულების დამტკიცების შესახებ“ საქართველოს მთავრობის 2004 წლის 21 მაისის #37 დადგენილებით დამტკიცებული დებულების მე-3 მუხლის მე-2 პუნქტის „მ“ ქვეპუნქტის შესაბამისად, ვბრძანებ:
1. „საჯარო სამართლის იურიდიული პირის – „ზურაბ ჟვანიას სახელობის სახელმწიფო ადმინის-ტრირების სკოლის“ წესდების დამტკიცების შესახებ“ საქართველოს განათლებისა და მეცნიერების მინისტრის 2005 წლის 18 აგვისტოს №411 ბრძანებაში (სსმ III, 19.08.05 წ., №97, მუხ. 1096) შეტანილ იქნეს შემდეგი ცვლილებები და დამატებები:
ა) წესდების მე-8 მუხლის 1-ლ პუნქტში შეტანილ იქნეს ცვლილება და ჩამოყალიბდეს შემდეგი რედაქციით:
„1. სკოლის მიმდინარე საქმიანობას წარმართავს სკოლის დირექტორი, რომელსაც 4 წლის ვადით თანამდებობაზე ნიშნავს და თანამდებობიდან ათავისუფლებს საქართველოს განათლებისა და მეცნიერების მინისტრი.“.
ბ) წესდების მე-8 მუხლის მე-2 პუნქტის „ბ“ ქვეპუნქტში შეტანილ იქნეს ცვლილება და დამატება და ჩამოყალიბდეს შემდეგი რედაქციით“:
„ბ) დებს შრომით ხელშეკრულებებს სკოლის თანამშრომლებთან და ღია კონკურსის საფუძველზე ხელშეკრულებით განსაზღვრული ვადით სამსახურში აჰყავს სკოლის მასწავლებლები. სამეთვალყურეო საბჭოს რეკომენდაციების გათვალისწინებით ქმნის საკონკურსო კომისიას;“;
გ) წესდების მე-8 მუხლის მე-2 პუნქტის „ლ“ ქვეპუნქტში შევიდეს ცვლილება და ჩამოყალიბდეს შემდეგი რედაქციით:
„ლ) თავისი კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს;“;
დ) წესდების მე-8 მუხლს დაემატოს მე-7 პუნქტი და ჩამოყალიბდეს შემდეგი რედაქციით:
„7. სკოლის დირექტორი დანიშვნიდან 2 კვირის ვადაში საქართველოს განათლებისა და მეცნიერების სამინისტროში წარმოადგენს შესათანხმებლად დირექტორის მოადგილის კანდიდატურას.“.
ე) წესდების მე-8 მუხლს დაემატოს მე-8 პუნქტი და ჩამოყალიბდეს შემდეგი რედაქციით:
„8. სკოლის დირექტორის მოადგილის კომპეტენცია განისაზღვრება სკოლის დირექტორის ინდივიდუალური ადმინისტრაციულ-სამართლებრივი აქტით.“.
ვ) წესდების მე-8 მუხლს დაემატოს მე-9 პუნქტი და ჩამოყალიბდეს შემდეგი რედაქციით:
„9. სკოლის ახალი დირექტორის დანიშვნა იწვევს სკოლის დირექტორის მოადგილის უფლებამოსილების შეწყვეტას.“.
ზ) წესდების მე-9 მუხლის 1-ლ პუნქტში შევიდეს ცვლილება და ჩამოყალიბდეს შემდეგი რედაქციით:
„1. სკოლის მართვის მიზნით 4 წლის ვადით იქმნება სამეთვალყურეო საბჭო 7 წევრის შემადგენლობით, რომლებსაც ნიშნავს და ათავისუფლებს საქართველოს განათლებისა და მეცნიერების მინისტრი.“.
2. ბრძანება ამოქმედდეს გამოქვეყნებისთანავე.
ა. ლომაია