საქართველოს იუნესკოს საქმეთა ეროვნული კომისიის დაარსებისა და საქართველოს იუნესკოს საქმეთა ეროვნული კომისიის დებულების დამტკიცების თაობაზე

(ძალადაკარგულია - 11.03.2015, №81)

საქართველოს პრეზიდენტის

ბრძანებულება №508

2004 წლის 15 ნოემბერი

ქ. თბილისი

საქართველოს გაერთიანებული ერების განათლების, მეცნიერებისა და კულტურის ორგანიზაციის დებულებასთან (კონსტიტუციასთან) (UNESCO) 1992 წელს მიერთებისა და საქართველოსა და UNESCO-ს შორის 1995 წელს დადებულ მემორანდუმზე დაყრდნობით:

1. შეიქმნას საქართველოს იუნესკოს საქმეთა ეროვნული კომისია.

2. დამტკიცდეს საქართველოს იუნესკოს საქმეთა ეროვნული კომისიის თანდართული დებულება.

მ. სააკაშვილი

საქართველოს იუნესკოს საქმეთა ეროვნული კომისიის დებულება

საქართველოს პრეზიდენტის 2010 წლის 10 ივნისის ბრძანებულება №402-სსმ III, №66, 10 .06.2010წ; მუხ.978

აღიარებს რა გაერთიანებული ერების განათლების, მეცნიერებისა და კულტურის ორგანიზაციის (UNESCO) დამსახურებას განათლების, მეცნიერებისა და კულტურის სფეროში, ასევე მის გავლენას ქვეყნებს შორის თანამშრომლობაზე მშვიდობისა და უსაფრთხოების განმტკიცებისა და ადამიანის კეთილდღეობის უზრუნველყოფაში და ამ პროცესებში საქართველოს აქტიური მონაწილეობის სურვილს;

ითვალისწინებს, რომ ორგანიზაციის მიერ ამ ამოცანის შესასრულებლად აუცილებელია ყოველი წევრი ქვეყნის ინტელექტუალური და სამეცნიერო წრეების ორგანიზაციებთან აქტიური თანამშრომლობა, მოსახლეობასთან ორგანიზაციის მჭიდრო კავშირი და საინფორმაციო და საკომუნიკაციო დაწესებულებების დაარსება;

ითვალისწინებს რა საქართველოს მიერთებას გაერთიანებული ერების განათლების, მეცნიერებისა და კულტურის ორგანიზაციის დებულებასთან (კონსტიტუციასთან) (UNESCO) 1992 წელს;

ითვალისწინებს რა საქართველოსა და UNESCO-ს შორის 1995 წელს დადებულ მემორანდუმს;

ეყრდნობა რა UNESCO-ს კონსტიტუციის მე-7 მუხლს, რომელშიც ნათქვამია, რომ ორგანიზაციის ყოველი წევრი-სახელმწიფო მოქმედებს დამოუკიდებლად და საკუთარი კონკრეტული პირობების გათვალისწინებით, ნაციონალური კომისიის შექმნის გზით ცდილობს ჩააბას ორგანიზაციის საქმიანობაში განათლების, მეცნიერებისა და კულტურის საკითხებით დაკავებული ორგანიზაციები.

I. ზოგადი დებულებები

მუხლი 1

საქართველოს იუნესკოს საქმეთა ეროვნული კომისიის (შემდგომში – კომისია) ძირითადი ამოცანებია UNESCO-ს საქმიანობაში საქართველოს აქტიური მონაწილეობის უზრუნველყოფა, UNESCO-ს მისიის შესაბამისი პროგრამების შედგენა, შემუშავება და განხორციელების უზრუნველყოფა.

მუხლი 2

კომისია თავის საქმიანობაში ხელმძღვანელობს საქართველოს კონსტიტუციით, საქართველოს საერთაშორისო ხელშეკრულებებითა და შეთანხმებებით, სხვა სამართლებრივი აქტებითა და ასევე UNESCO-სა და კომისიის დებულებებით.

მუხლი 3

კომისიას აქვს საბანკო ანგარიში, სატიტულო ბლანკი, ლოგო და ბეჭედი წარწერით „საქართველოს იუნესკოს საქმეთა ეროვნული კომისია“;

საქართველოს პრეზიდენტის 2007 წლის 15 მარტის ბრძანებულება №179-სსმ III, №36, 19.03.2007წ; მუხ.423

მუხლი 4

კომისიის მისამართია: ჩიტაძის ქ. 4, თბილისი 0118, საქართველო, საგარეო საქმეთა სამინისტრო.

II. კომისიის მიზნები

მუხლი 5

კომისიის მიზანია:

ა) განათლების, მეცნიერების, კულტურის, გარემოს დაცვის, კომუნიკაციისა და ინფორმაციის განვითარების ხელშეწყობის მიზნით საქართველოს სამინისტროებთან, სხვა სახელმწიფო ორგანოებთან, მმართველობისა და თვითმმართველობის ორგანოებთან, საგანმანათლებლო და სამეცნიერო-კვლევით დაწესებულებებთან, ასევე ასოციაციებთან, არასამთავრობო ორგანიზაციებთან თანამშრომლობა;

ბ) განათლების, მეცნიერების, კულტურის, გარემოს დაცვის, კომუნიკაციისა და ინფორმაციის სფეროში პროექტებისა და პროგრამების დაგეგმვა, შემუშავება და განხორციელების უზრუნველყოფა, მათში საქართველოს სახელმწიფო თუ არასამთავრობო ორგანიზაციებისა და ექსპერტების აქტიური მონაწილეობის უზრუნველყოფა;

გ) განათლების, მეცნიერების, კულტურის, გარემოს დაცვის, კომუნიკაციისა და ინფორმაციის სფეროში ერთობლივი პროგრამების შემუშავებისა და განხორციელების მიზნით UNESCO-ს წევრი ქვეყნების ეროვნულ კომისიებთან თანამშრომლობა;

დ) UNESCO-სთან საქართველოს ოფიციალურ სტრუქტურათა და სხვა ორგანიზაციათა თანამშრომლობის კოორდინაცია;

ე) UNESCO-ს მიზნების, პროგრამებისა და ორგანიზაციის საქმიანობის შესახებ ინფორმაციის გავრცელება;

ვ) მე-5 მუხლის „ა“ ქვეპუნქტით განსაზღვრული დაწესებულებებისათვის UNESCO-ს მიერ მიღებული დასკვნებისა და რეკომენდაციების წარდგენა.

III. კომისიის ფუნქციები

მუხლი 6

კომისიის ფუნქციებია:

ა) საქართველოს მთავრობისათვის, სხვა სახელმწიფო ორგანოებისათვის, მმართველობისა და თვითმმართველობის ორგანოებისათვის, საგანმანათლებლო და სამეცნიერო -კვლევითი დაწესებულებებისათვის, ასოციაციებისათვის, არასამთავრობო ორგანიზაციებისა და ექსპერტებისათვის, რომლებიც დაინტერესებულნი არიან განათლების, მეცნიერების, კულტურის, გარემოს დაცვის, კომუნიკაციისა და ინფორმაციის განვითარების საკითხებით, UNESCO-სა და მისი ორგანოების გადაწყვეტილებებისა და საპროგრამო საქმიანობის შესახებ ინფორმაციის მიწოდება;

ბ) UNESCO-ს მისიის საქმიანობის განხორციელებისათვის ხელის შეწყობა;

გ) საგანმანათლებლო და სამეცნიერო -კვლევით დაწესებულებებთან ერთად UNESCO-ს პროგრამების შემუშავება, დაგეგმვა და განხორციელება;

დ) UNESCO-ს ფინანსური მხარდაჭერით განათლების, მეცნიერების, კულტურის, გარემოს დაცვის, კომუნიკაციების განვითარებისა და ინფორმაციის გაუმჯობესებისათვის პროგრამებისა და პროექტების შემუშავება;

ე) საქართველოს მთავრობასთან, სამინისტროებთან და იმ დაწესებულებებსა თუ სააგენტოებთან თანამშრომლობა, რომლებიც მუშაობენ განათლების, მეცნიერების, კულტურის, გარემოს დაცვის, კომუნიკაციებისა და ინფორმაციის სფეროში;

ვ) ქ. პარიზში UNESCO-ს შტაბბინასა და UNESCO-ში საქართველოს მუდმივ წარმომადგენლობასთან თანამშრომლობა;

ზ) საქართველოს იმ დელეგაციებთან თანამშრომლობა, რომლებიც მონაწილეობენ UNESCO-ს გენერალურ კონფერენციასა და სხვა სესიებსა თუ კონფერენციებში და UNESCO-ს მიერ ორგანიზებულ სხვადასხვა სამთავრობათაშორისო ღონისძიებებში;

თ) უცხო ქვეყნის ეროვნულ კომისიებთან თანამშრომლობის განვითარება და ერთობლივი პროგრამების შემუშავება და განხორციელება;

ი) სასწავლო და სამეცნიერო-კვლევითი სტიპენდიების, UNESCO-სა და კომისიის საქმიანობისა და UNESCO-ში ვაკანტურ თანამდებობათა შესახებ ინფორმაციის გავრცელება.

IV. კომისიის უფლებები

მუხლი 7

კომისია უფლებამოსილია:

ა) მოაწყოს შეხვედრები სამინისტროებთან, სხვა სახელმწიფო დაწესებულებებთან, მმართველობისა და თვითმმართველობის ორგანოებთან და სხვა ორგანიზაციებთან განათლების, მეცნიერების, კულტურის, გარემოს დაცვის, კომუნიკაციებისა და ინფორმაციის საკითხებზე, ასევე კომისიის კომპეტენციაში შემავალ ნებისმიერ სხვა საკითხზე;

ბ) თავისი კომპეტენციის ფარგლებში მოიპოვოს მისი საქმიანობის განხორციელებისათვის საჭირო ინფორმაცია საქართველოს განათლებისა და მეცნიე-რების, კულტურის, ძეგლთა დაცვისა და სპორტის, საგარეო საქმეთა, გარემოს დაცვისა და ბუნებრივი რესურსების სამინისტროებიდან, სხვა სახელმწიფო დაწესებულებებიდან, მმართველობისა და თვითმმართველობის ორგანოებიდან და სხვა ორგანიზაციებიდან, ასევე UNESCO-ში საქართველოს მუდმივი წარმომად-გენლობიდან;

გ) დაინტერესებულ სამინისტროებს, სხვა სახელმწიფო დაწესებულებებს, მმართველობისა და თვით-მმართველობის ორგანოებსა და სააგენტოებს განსახილველად წარუდგინოს UNESCO-ს საქმიანობასთან დაკავშირებული წინადადებები;

დ) დაამტკიცოს კომისიის მუშაობის წლიური გეგმა;

ე) შექმნას საექსპერტო ჯგუფი;

ვ) დამოუკიდებლად ან შესაბამის დაწესებულებებთან ერთად განახორციელოს UNESCO-ს პროექტები;

ზ) UNESCO-ს „მონაწილეობის პროგრამის“ ფარგლებში შეარჩიოს UNESCO-სათვის წარსადგენი პროექტები;

თ) UNESCO-ს მიერ დამტკიცებული პროგრამების ფარგლებში გააფორმოს ხელშეკრულებები იმ ორგანიზაციებთან, რომლებიც UNESCO-ს დაფინანსებით ახორციელებენ „მონაწილეობის პროგრამით“ გათვალისწინებულ და/ან სხვა კონკრეტულ პროექტებს;

ი) მოისმინოს „მონაწილეობის პროგრამით“ გათვალისწინებული და/ან სხვა პროექტების ანგარიში და დასკვნები და რეკომენდაციები წარუდგინოს პროექტის განმახორციელებელ შესაბამის დაწესებულებას.

საქართველოს პრეზიდენტის 2006 წლის 27 იანვრის ბრძანებულება №83-სსმ III, №11, 27.01.2006წ; მუხ.124

მუხლი 8

კომისია იკრიბება წელიწადში ორჯერ. კომისიის პრეზიდენტის გადაწყვეტილებით შეიძლება მოწვეულ იქნეს რიგგარეშე სხდომა.

მუხლი 9

კომისია უფლებამოსილია მიიღოს გადაწყვეტილება, თუ შეკრებას ესწრება კომისიის წევრთა საერთო რაოდენობის ნახევარზე მეტი; გადაწყვეტილება მიიღება ხმის უმრავლესობით.

მუხლი 10

UNESCO-ს კომპეტენციაში შემავალი სფეროების კონკრეტული პრობლემატიკის გადაჭრის მიზნით კომისია ქმნის დროებით ან მუდმივმოქმედ კომიტეტებს.

V. კომისიის შემადგენლობა

მუხლი 11

კომისია შედგება 12 წევრისაგან: კომისიის პრეზიდენტის, ვიცე-პრეზიდენტის, გენერალური მდივნისა და კომისიის სხვა წევრებისაგან.

მუხლი 12

კომისიის წევრები შესაძლოა იყვნენ საქართველოს სამინისტროების, სხვა სახელმწიფო ორგანოების, ადგილობრივი თვითმმართველობის ორგანოების, საგანმანათლებლო და სამეცნიერო-კვლევითი დაწესებულებების, ასოციაციებისა და არასამთავრობო ორგანიზაციების წარმომადგენლები, ასევე, დამოუკიდებელი ექსპერტები.

მუხლი 13

კომისიის პრეზიდენტია საქართველოს საგარეო საქმეთა მინისტრი, რომელსაც ნიშნავს საქართველოს პრეზიდენტი.

საქართველოს პრეზიდენტის 2010 წლის 10 ივნისის ბრძანებულება №402-სსმ III, №66, 09.06.2010წ; მუხ.978

მუხლი 14

კომისიის პრეზიდენტი ნიშნავს კომისიისა და საექსპერტო ჯგუფის წევრებს.

მუხლი 15

კომისიის ვიცე-პრეზიდენტსა და გენერალურ მდივანს ნიშნავს კომისიის პრეზიდენტი კომისიის წევრების თანხმობის საფუძველზე.

მუხლი 16

კომისიის გენერალური მდივანი უნდა იყოს საქართველოს საგარეო საქმეთა სამინისტროს თანამშრომელი.

მუხლი 17

კომისიის სატიტულო ბლანკს ხელს აწერს კომისიის პრეზიდენტი ან ვიცე-პრეზიდენტი, ან გენერალური მდივანი.

მუხლი 18

კომისიის წევრები მუშაობენ ანაზღაურების გარეშე.

მუხლი 19

კომისიის ყველა წევრი სარგებლობს თანაბარი სტატუსით.

მუხლი 20

კომისიის თითოეულ წევრს აქვს ერთი ხმის უფლება.

მუხლი 21

კომისიის ნებისმიერ წევრს შეუძლია კომისიის შემადგენლობიდან გასვლა, რის შესახებაც წერილობით უნდა ეცნობოს კომისიის პრეზიდენტს.

VI. კომისიის სამდივნო

მუხლი 22

კომისიის ორგანიზაციული და დიპლომატიური საქმიანობის უზრუნველყოფას ახორციელებს კომისიის სამდივნო.

მუხლი 23

კომისიის სამდივნოს ხელმძღვანელობს გენერალური მდივანი.

მუხლი 24

კომისიის სამდივნოს წევრები არიან კომისიის გენერალური მდივნის წარდგინებით კომისიის პრეზიდენტის – საქართველოს საგარეო საქმეთა მინისტრის მიერ განსაზღვრული საქართველოს საგარეო საქმეთა სამინისტროს თანამშრომლები. კომისიის სამდივნოს ფინანსური დოკუმენტაციის წარმოებაში დახმარებას უწევს საქართველოს საგარეო საქმეთა სამინისტროს ადმინისტრაციული დეპარტამენტი.

მუხლი 25

გენერალური მდივანი:

ა) წარმოადგენს კომისიას UNESCO-სა და UNESCO-ს წევრი სხვა ქვეყნების ეროვნულ კომისიებთან, მათ შორის, ამ წევრი სახელმწიფოების სახელმწიფო დაწესებულებებსა და არასამთავრობო ორგანიზაციებთან;

ბ) აწვდის ინფორმაციას შესაბამის სახელმწიფო და ადგილობრივი თვითმმართველობის ორგანოებსა და სხვა ორგანიზაციებს UNESCO-ს მიერ ორგანიზებულ მთავრობათაშორის ღონისძიებებში მონაწილეობასთან დაკავშირებით;

გ) შეისწავლის UNESCO-ს მიერ შემუშავებულ დოკუმენტებს და, საჭიროების შემთხვევაში, შესაბამის სამთავრობო უწყებებთან შეთანხმებით, შეიმუშავებს იმ დოკუმენტების პროექტებს, რომლებიც განეკუთვნება UNESCO-ს საქმიანობის სფეროს;

დ) შესაბამის სამთავრობო უწყებებთან შეთანხმებით ამზადებს UNESCO-ს კონფერენციებისა და შეხვედრების, ასევე UNESCO-ს პროგრამების განხორციელებაში საქართველოს მონაწილეობასთან დაკავშირებულ მოხსენებებსა და მიმოხილვებს;

ე) კომისიას წარუდგენს რეკომენდაციებს პროექტების შემუშავების, შეფასებისა და განხორციელების შესახებ;

ვ) კომისიის პროექტების განხორციელების მიზნით თანამშრომლობს შესაბამის სახელმწიფო და ადგილობრივი თვითმმართველობის ორგანოებთან და არასამთავრობო ორგანიზაციებსა და სპეციალისტებთან;

ზ) კომისიას წარუდგენს მოხსენებებს შესრულებული სამუშაოს შესახებ;

თ) ხელს აწერს სატიტულო ბლანკს და ფინანსურ დოკუმენტაციას, აფორმებს ხელშეკრულებებს იმ ორგანიზაციებთან, რომლებიც ახორციელებენ UNESCO-ს მიერ დაფინანსებულ „მონაწილეობის პროგრამით“ გათვალისწინებულ კონკრეტულ პროექტებს ან, კომპეტენციის ფარგლებში, სხვა პროექტების შემსრულებლებთან.

VII. კომისიის მუშაობის ტექნიკური უზრუნველყოფა

მუხლი 26

კომისიის მუშაობის ტექნიკური უზრუნველყოფის მიზნით გამოიყენება საქართველოს საგარეო საქმეთა სამინისტროს მატერიალურ-ტექნიკური ბაზა.