საქართველოს მთავრობის
განკარგულება №98
2007 წლის 22 თებერვალი
ქ. თბილისი
სს „ლაჯანურჰესის“ №2 ჰიდროაგრეგატისა და ქვესადგურის რეაბილიტაციის პროექტის განხორციელებისათვის აუცილებელი ღონისძიებების გატარების თაობაზე
საქართველოსა და საზღვარგარეთის ეკონომიკური თანამშრომლობის ფონდს (OECF) (ამჟამად საერთაშორისო თანამშრომლობის იაპონიის ბანკი (JBIC) შორის გაფორმებული საქართველოს ენერგეტიკის აღდგენის პროექტის (GRG-P1) ფარგლებში სს „ლაჯანურჰესის“ №2 ჰიდროაგრეგატისა და ქვესადგურის სარეაბილიტაციო სამუშაოების შესრულების უზრუნველსაყოფად:
1. საქართველოს ფინანსთა სამინისტრომ (ა. ალექსიშვილი):
ა) უმოკლეს ვადაში უზრუნველყოს, რომ საქართველოსა და საზღვარგარეთის ეკონომიკური თანამშრომლობის ფონდს შორის გაფორმებული საქართველოს ენერგეტიკის აღდგენის პროექტის (GRG-P1) ფარგლებში სს „ლაჯანურჰესის“ №2 ჰიდროაგრეგატისა და ქვესადგურის რეაბილიტაციის სამუშაოთა დასაფინანსებლად „საქართველოს 2007 წლის სახელმწიფო ბიუჯეტის შესახებ“ საქართველოს კანონით საქართველოს ენერგეტიკის სამინისტროსათვის განსაზღვრული საერთო ასიგნებებიდან სსიპ – ენერგოგენერაცისათვის საკრედიტო რესურსად მიმართოს 828 071 (რვაას ოცდარვა ათას სამოცდათეთრმეტი) ლარი და გააფორმოს მასთან შესაბამისი სასესხო ხელშეკრულება;
ბ) საჭიროების შემთხვევაში საქართველოს ენერგეტიკის სამინისტროს წინადადებით შეიტანოს ცვლილებები საქართველოს 2007 წლის სახელმწიფო ბიუჯეტის კვარტალურ განწერასა და ოპერატიულ ფინანსურ გეგმაში.
2. სსიპ – ენერგოგენერაციამ უზრუნველყოს სათანადო კონტრაქტების გაფორმება სს „ლაჯანურჰესის“ №2 ჰიდროაგრეგატისა და ქვესადგურის რეაბილიტაციის სამუშაოთა შესასრულებლად.
3. სს „ლაჯანურჰესის“ №2 ჰიდროაგრეგატისა და ქვესადგურის რეაბილიტაციის სამუშაოთა დასრულების შემდეგ ამ განკარგულების პირველი პუნქტის „ა“ ქვეპუნქტში აღნიშნული თანხით შეძენილი დარჩენილი ქონება სსიპ – ენერგოგენერაციამ შემდგომი განკარგვისათვის გადასცეს საქართველოს ეკონომიკური განვითარების სამინისტროს.
4. განკარგულების შესრულების კონტროლი განახორციელონ საქართველოს ფინანსთა მინისტრმა ა. ალექსიშვილმა, ენერგეტიკის მინისტრმა ნ. გილაურმა და სსიპ – ენერგოგენერაციის თავმჯდომარემ გ. ხუბერაშვილმა.
5. განკარგულება ძალაშია ხელმოწერის დღიდან.
პრემიერ-მინისტრი ზ. ნოღაიდელი