საქართველოს მთავრობის
განკარგულება №610
2009 წლის 14 აგვისტო
ქ. თბილისი
2009 წლის რთვლის ხელშეწყობის ღონისძიებათა შესახებ
,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ” საქართველოს კანონის მე-5 მუხლის შესაბამისად, მევენახეობის დარგში დასაქმებული მოსახლეობის სოციალური მდგომარეობის გაუმჯობესებისა და 2009 წლის რთვლის ეფექტიანად გამართვის უზრუნველყოფის მიზნით, ,,საქართველოს 2009 წლის სახელმწიფო ბიუჯეტის შესახებ” საქართველოს კანონით გათვალისწინებული ,,2009 წლის რთველის ხელშეწყობის ღონისძიებების” პროგრამის ფარგლებში (ორგანიზაციული კოდი – 37 03 12):
1. ყურძნის გადამმუშავებელი კომპანიებისათვის ჩაბარებულ 1 კგ ყურძენზე კომპანიის მიერ გადახდილი თანხის დამატებით ყურძნის ჩამბარებელ ფიზიკურ პირს აუნაზღაურდეს 1 კგ: რქაწითელის ჯიშის ყურძენზე – 0,15 ლარი, საფერავზე – 0,25 ლარი, ალექსანდროულ-მუჯურეთულზე – 1 ლარი.
2. საქართველოს სოფლის მეურნეობის სამინისტრომ უზრუნველყოს ამ განკარგულების პირველი პუნქტით გათვალისწინებულ ღონისძიებათა ორგანიზებულად გამართვისათვის საჭირო პროცედურების შემუშავება და განხორციელება.
3. ,,სახელმწიფო შესყიდვების შესახებ” საქართველოს კანონის მე-10 მუხლის მე-3 პუნქტის ,,ე” ქვეპუნქტის შესაბამისად საქართველოს სოფლის მეურნეობის სამინისტროს საჯარო სამართლის იურიდიულმა პირმა – ვაზისა და ღვინის დეპარტამენტმა ,,სამტრესტმა” საქონლისა და მომსახურების სახელმწიფო შესყიდვა განახორციელოს ერთ პირთან მოლაპარაკების საშუალებით.
პრემიერ-მინისტრი ნიკა გილაური