საქართველოს მთავრობის
განკარგულება № 182
2007 წლის 7 აპრილი
ქ. თბილისი
თურქმენეთის მიმართ არსებულ სახელმწიფო საგარეო ვალდებულებათა მომსახურების შესახებ
1. თურქმენეთის მიმართ არსებულ სახელმწიფო საგარეო ვალდებულებათა მომსახურების უზრუნველყოფისა და ეროვნული წარმოების სტიმულირების მიზნით „ სახელმწიფო ბიუჯეტში საგარეო ვალდებულებათა დაფარვისათვის განკუთვნილი სახსრებიდან საქართველოს რეზიდენტი იურიდიული პირების მიერ სახელმწიფო ვალის დაფარვისა და მომსახურების ანგარიშში პროდუქციის (სამუშაოს, მომსახურების) მიწოდების ან ამგვარი მიწოდების მიზნით შემუშავებული შესაბამისი პროგრამების დაფინანსების წესის შესახებ “ საქართველოს პრეზიდენტის 2002 წლის 16 ივნისის № 293 ბრძანებულების მე-8 მუხლის საფუძველზე მიეცეს უფლება საქართველოს ფინანსთა სამინისტროს (ა. ალექსიშვილი) საქართველოს მთავრობასთან წინასწარი შეთანხმების გარეშე შეარჩიოს პროგრამები კონკურსის გამოუცხადებლად და გააფორმოს ხელშეკრულებები თურქმენეთის ვალის პროდუქციით და მომსახურებით დაფარვის მონაწილე საქართველოს ეკონომიკურ აგენტებთან სახელმწიფო ბიუჯეტიდან წინასწარ ნაწილობრივ ანაზღაურების შესახებ შემდეგი პირობების აუცილებელი დაცვით:
ა) ეკონომიკურ აგენტებს უნდა ჰქონდეთ გაფორმებული სათანადო კონტრაქტები თურქმენეთის მხარესთან;
ბ) უნდა განისაზღვროს ეკონომიკური აგენტების მიერ თურქმენეთისადმი საქართველოს ვალის დაფარვის გრაფიკი;
გ) უნდა განისაზღვროს ეკონომიკური აგენტების მიერ სახელმწიფო ბიუჯეტიდან მიღებული თანხის დაბრუნების უზრუნველყოფის საშუალებები;
დ) ეკონომიკური აგენტებისათვის გამოყოფილი წინასწარი დაფინანსების ოდენობა არ უნდა აღემატებოდეს ეკონომიკური აგენტების მიერ თურქმენეთის მხარესთან გაფორმებული კონტრაქტებით განსაზღვრული შესასრულებელი ვალდებულების საერთო ღირებულების სახელმწიფო ბიუჯეტიდან ასანაზღაურებელი დისკონტირებული თანხის 25 პროცენტს.
2. საქართველოს ფინანსთა სამინისტრომ პროგრამის დასრულებიდან ორი კვირის ვადაში საქართველოს მთავრობას წარუდგინოს ინფორმაცია ამ განკარგულების საფუძველზე შერჩეული პროგრამის განხორციელების შედეგების თაობაზე.
3. განკარგულება ძალაშია საქართველოს პრეზიდენტის 2002 წლის 16 ივნისის № 293 ბრძანებულებაში შესაბამისი ცვლილებების ძალაში შესვლის დღიდან.
პრემიერ-მინისტრი ზ. ნოღაიდელი