ხუთი და მეტშვილიანი ოჯახების დახმარების პროგრამის დამტკიცების შესახებ

მუხლი 1. შესავალი

დღეს , საქართველოში უმწვავესად დგას დემოგრაფიული პრობლემა . ოჯახები თავს იკავებენ შვილის გაჩენისგან , რაც განპირობებულია მძიმე სოციალური ფონით და უარყოფითად აისახება ქვეყნის დემოგრაფიულ მდგომარეობაზე . აუცილებელია სახელმწიფოს ზრუნვა და ფართომასშტაბიანი პროგრამების განხორციელება , რომელიც ორიენტირებული იქნება მრავალშვილიანი ოჯახების სოციალური მდგომარეობის გასაუმჯობესებლად . მით უფრო , რომ მრავალშვილიანი ოჯახების უმეტესი ნაწილი , სოციალურად დაუცველთა კატეგორიას განეკუთვნება . მძიმეა მათი ეკონომიკური და ყოფითი პირობები . ასეთი კატეგორიის ოჯახები უსახსრობისა და შემოსავლების უქონლობის გამო ვერ აგვარებენ ოჯახთან , ბავშვებთან დაკავშირებულ ელემენტარულ პრობლებებს და ვერ იღებენ სათანადო განათლებას .

მუხლი 2. პროგრამის მიზანი

პროგრამა მიზნად ისახავს ქალაქში არსებული დემოგრაფიული მდგომარეობისა და მრავალშვილიანი ოჯახების სოციალურ - ეკონომიკური მდგომარეობის გაუმჯობესებას “ ხუთი და მეტშვილიანი ოჯახები ( უფროსი შვილის 18 წლის შესრულებამდე ) წელიწადში ერთხელ მიიღებენ მატერიალურ დახმარებას 2000 ლარის ოდენობით .

თვითმმართველი ქალაქი ფოთის საკრებულოს 2013 წლის 18 დეკემბრის დადგენილება №24/34 - ვებგვერდი, 24.12.2013წ.

მუხლი 3. პროგრამის მართვა

1. პროგრამაში მონაწილე ბენეფიციარებს წარმოადგენენ ხუთი და მეტშვილიანი ოჯახები .        

2. მატერიალური დახმარება გაიცემა ხუთ და მეტშვილიან   ფოთელ ოჯახზე და განისაზღვრება 2000 ლარის ოდენობით და გაიცემა წელიწადში ერთხელ .

3. ბავშვების მამა უნდა იყოს თვითმმართველი ქალაქის - ფოთის მკვიდრი ან თვითმმართველ ქალაქ - ფოთში რეგისტრირებული დევნილი , რომელიც ცხოვრობს თვითმმართველ ქალაქ ფოთში არანაკლებ ერთი წლისა .

4. მატერიალური დახმარების მისაღებად ხუთი და მეტშვილიანმა ოჯახმა უნდა წარმოადგინოს შემდეგი დოკუმენტაცია :

ა ) განცხადება ( თვითმმართველი ქალაქის - ფოთის მერის სახელზე );

ბ ) მშობლების პირადობის მოწმობის ასლები ;

გ ) ბავშვების დაბადების მოწმობის ასლები ;

დ ) ქორწინების მოწმობის ასლი ;

ე ) ცნობა ფაქტობრივი საცხოვრებელი ადგილის შესახებ გაცემული მუნიციპალიტეტის მიერ .

ვ ) მარტოხელა დედების შემთხვევაში - ცნობა სამოქალაქო რეესტრიდან , რომ იგი არ იმყოფება სამოქალაქო ქორწინებაში .

ზ ) მშობლის გარდაცვალების შემთხვევაში - ცნობა გარდაცვალების შესახებ .

მუხლი 4. პროგრამის ბიუჯეტი

1. ხუთი და მეტშვილიანი ოჯახების დახმარების პროგრამის მიხედვით განსაზღვრული თანხა აისახება თვითმმართველი ქალაქის - ფოთის ( თვითმმართველი ერთეული ) ბიუჯეტში .

2. ხუთი და მეტშვილიან ოჯახებს დახმარებისთვის გამოყოფილი თანხა დაერიცხებათ საბანკო ანგარიშებზე .