„იუსტიციის უმაღლესი სკოლის შესახებ“ საქართველოს კანონში ცვლილების შეტანის თაობაზე

1. მე-3 მუხლის:

ა) მე-2 პუნქტის შემდეგ დაემატოს შემდეგი შინაარსის 2¹ პუნქტი:

„2¹. დამოუკიდებელი საბჭოს წევრი არ შეიძლება იყოს საქართველოს უზენაესი სასამართლოს თავმჯდომარე.“;

 ბ) მე-3 და მე-4 პუნქტები ჩამოყალიბდეს შემდეგი რედაქციით:

„3. დამოუკიდებელი საბჭოს თავმჯდომარეს, რომელიც იმავდროულად დამოუკიდებელი საბჭოს წევრია, თავისი წევრებისგან 3 წლის ვადით ირჩევს საქართველოს მოსამართლეთა კონფერენცია. ერთი და იგივე პირი დამოუკიდებელი საბჭოს თავმჯდომარედ შეიძლება აირჩეს ზედიზედ მხოლოდ ორჯერ.

 4. დამოუკიდებელი საბჭოს 5 წევრს, რომელთაგან 1 საქართველოს იუსტიციის უმაღლესი საბჭოს არამოსამართლე წევრია, ამტკიცებს საქართველოს იუსტიციის უმაღლესი საბჭო დამოუკიდებელი საბჭოს თავმჯდომარის მიმართვის საფუძველზე, 3 წლის ვადით.“.

 2. 3¹ მუხლის:

ა) მე-2 პუნქტი ჩამოყალიბდეს შემდეგი რედაქციით:

„2. დამოუკიდებელი საბჭოს წევრს ათავისუფლებს საქართველოს იუსტიციის უმაღლესი საბჭო დამოუკიდებელი საბჭოს თავმჯდომარის მიმართვის საფუძველზე, ხოლო დამოუკიდებელი საბჭოს თავმჯდომარეს − საქართველოს მოსამართლეთა კონფერენცია.“;

ბ) მე-3 პუნქტი ამოღებულ იქნეს.

მუხლი 2

  1. ამ კანონის ამოქმედებიდან 1 თვის ვადაში საქართველოს მოსამართლეთა კონფერენციამ უზრუნველყოს იუსტიციის უმაღლესი სკოლის დამოუკიდებელი საბჭოს თავმჯდომარის არჩევა საქართველოს კანონმდებლობით დადგენილი წესით.

   2. იუსტიციის უმაღლესი სკოლის დამოუკიდებელი საბჭო მისი თავმჯდომარის არჩევიდან 1 თვის ვადაში დაკომპლექტდეს ამ კანონით დადგენილი პროცედურების დაცვით.

  3. იუსტიციის უმაღლესი სკოლის დამოუკიდებელი საბჭოს თავმჯდომარის არჩევისთანავე საქართველოს უზენაესი სასამართლოს თავმჯდომარეს უწყდება ამ საბჭოს თავმჯდომარის უფლებამოსილება. ამ მუხლის მე-2 პუნქტით გათვალისწინებული პროცედურების დასრულებისთანავე დამოუკიდებელი საბჭოს მოქმედ შემადგენლობას უწყდება უფლებამოსილება.

 მუხლი 3. ეს კანონი ამოქმედდეს გამოქვეყნებისთანავე.