საჯარო სამართლის იურიდიული პირის - სასწავლო უნივერსიტეტის – ბათუმის სახელმწიფო საზღვაო აკადემიის წესდების დამტკიცების შესახებ

საქართველოს ეკონომიკისა და მდგრადი განვითარების მინისტრის

ბრძანება №1-1/1439

2012 წლის 10 ივლისი

ქ. თბილისი

საჯარო სამართლის იურიდიული პირის – სასწავლო უნივერსიტეტის – ბათუმის სახელმწიფო საზღვაო აკადემიის წესდების დამტკიცების შესახებ

„უმაღლესი განათლების შესახებ“ საქართველოს კანონის 8² მუხლის პირველი პუნქტის, „მეზღვაურთა განათლებისა და სერტიფიცირების შესახებ" საქართველოს კანონის 45-ე მუხლის 2¹ პუნქტის და „ნორმატიული აქტების შესახებ" საქართველოს კანონის მე-13 მუხლის პირველი პუნქტის საფუძველზე, ვბრძანებ:

1. დამტკიცდეს საჯარო სამართლის იურიდიული პირის – სასწავლო უნივერსიტეტი – ბათუმის საზღვაო აკადემიის თანდართული წესდება (შემდგომში – წესდება).

2. ბრძანება ამოქმედდეს გამოქვეყნებისთანავე.

მინისტრის მოვალეობის

შემსრულებელი ი. მატკავა

საჯარო სამართლის იურიდიული პირის – სასწავლო უნივერსიტეტის – ბათუმის სახელმწიფო საზღვაო აკადემიის წესდება

თავი I. ზოგადი დებულებები

მუხლი 1. წესდების რეგულირების სფერო

ეს წესდება არეგულირებს საჯარო სამართლის იურიდიული პირის – სასწავლო უნივერსიტეტის – ბათუმის სახელმწიფო საზღვაო აკადემიის სტატუსს, ფუნქციებს, საქმიანობის ძირითად მიმართულებებს, სტრუქტურას, მართვის ორგანოებისა და თანამდებობის პირთა არჩევის/დანიშვნის წესსა და უფლება-მოვალეობებს, საჯარო სამართლის იურიდიული პირის – სასწავლო უნივერსიტეტის – ბათუმის სახელმწიფო საზღვაო აკადემიის ფუნქციონირებასთან დაკავშირებულ სხვა საკითხებს.

მუხლი 2. ბათუმის სახელმწიფო საზღვაო აკადემიის სტატუსი

1. საჯარო სამართლის იურიდიული პირი – სასწავლო უნივერსიტეტი – ბათუმის სახელმწიფო საზღვაო აკადემია (შემდგომში – აკადემია) არის სახელმწიფოს მიერ დაფუძნებული საჯარო სამართლის იურიდიული პირი, რომლის საქმიანობა წესრიგდება საქართველოს კონსტიტუციით, საქართველოს საერთაშორისო ხელშეკრულებებითა და შეთანხმებებით, „უმაღლესი განათლების შესახებ“, „მეზღვაურთა განათლებისა და სერტიფიცირების შესახებ“, ,,პროფესიული განათლების შესახებ“ და „საჯარო სამართლის იურიდიული პირის შესახებ“ საქართველოს კანონების, ამ წესდებისა და სხვა საკანონმდებლო და კანონქვემდებარე ნორმატიული აქტებით.

2. აკადემიის სრული სახელწოდებაა: „საჯარო სამართლის იურიდიული პირი – სასწავლო უნივერსიტეტი – ბათუმის სახელმწიფო საზღვაო აკადემია“. აკადემია უფლებამოსილია გამოიყენოს შემოკლებული დასახელება „ბათუმის სახელმწიფო საზღვაო აკადემია“. აკადემიის სრული და შემოკლებული სახელწოდება გამოიყენება თანაბარი მნიშვნელობით.

3. აკადემია, სახელმწიფო კონტროლის პირობებში, დამოუკიდებლად ახორციელებს უმაღლეს,პროფესიულ საგანმანათლებლო და მეზღვაურთა წვრთნისა და გადამზადების საქმიანობას.

4. (ამოღებულია - 31.08.2022, №1-1/383).

საქართველოს ეკონომიკისა და მდგრადი განვითარების მინისტრის 2022 წლის 31 აგვისტოს ბრძანება №1-1/383 - ვებგვერდი, 01.09.2022 წ.

საქართველოს ეკონომიკისა და მდგრადი განვითარების მინისტრის 2023 წლის 18 აპრილის ბრძანება №1-1/156 - ვებგვერდი, 19.04.2023 წ.

მუხლი 3. აკადემიის უფლებაუნარიანობა

1. აკადემია ანგარიშვალდებულია საჯარო სამართლის იურიდიული პირის – საზღვაო ტრანსპორტის სააგენტოს (შემდგომში – საგენტო) წინაშე, „უმაღლესი განათლების შესახებ" და „საჯარო სამართლის იურიდიული პირის შესახებ“ საქართველოს კანონებითა და ამ წესდებით დადგენილ ფარგლებში და წესით.

2. აკადემიას დასახული მიზნებისა და დაკისრებული ფუნქციების განსახორციელებლად აქვს სპეციალური უფლებაუნარიანობა. იგი საკუთარი სახელით იძენს უფლებებსა და მოვალეობებს, დებს გარიგებებს და შეუძლია სასამართლოში გამოვიდეს მხარედ.

3. აკადემია უფლებამოსილია განახორციელოს საქართველოს კანონმდებლობითა და ამ წესდებით გათვალისწინებული საქმიანობა, მათ შორის, დამხმარე სამეწარმეო და საგამომცემლო საქმიანობა.

4. აკადემიას აქვს მრგვალი ბეჭედი მცირე სახელმწიფო გერბის გამოსახულებით, დამოუკიდებელი ბალანსი, საბანკო და სახაზინო ანგარიშები და საჯარო სამართლის იურიდიული პირის სხვა რეკვიზიტები.

5. აკადემიას აქვს საკუთარი სიმბოლიკა (გერბი, დროშა, ჰიმნი).

6. აკადემიის იურიდიული მისამართია: საქართველო, აჭარის ავტონომიური რესპუბლიკა, 6010, ქ. ბათუმი, რუსთაველის გამზირი №53.

მუხლი 4. აკადემიის ფუნქციები

კანონმდებლობით მინიჭებული უფლებამოსილების ფარგლებში აკადემიის ძირითადი ფუნქციებია:

ა) საქართველოს კანონმდებლობითა და საერთაშორისო ხელშეკრულებებით დადგენილი სტანდარტების შესაბამისად საზღვაო სფეროს პროფესიული/უმაღლესი განათლების მქონე კადრების მომზადება/ გადამზადება;

ბ) სტუდენტის ინტერესების, შესაძლებლობების, საგანმანათლებლო სფეროში აღიარებული სტანდარტების შესაბამისი აკადემიური უმაღლესი და პროფესიული საგანმანათლებლო საქმიანობის განხორციელება;

გ) მომზადებისა და გადამზადების მოკლევადიანი სასწავლო და საწვრთნელი პროგრამების/კურსების განხორციელება;

დ) სტუდენტებისა და მსმენელებისათვის სწავლისა და განვითარებისათვის შესაბამისი გარემოს შექმნა;

ე) როგორც ქვეყნის შიგნით, ისე საზღვარგარეთ, სასწავლო, საგანმანათლებლო და სხვა დაწესებულებებთან კავშირების დამყარება და თანამშრომლობის განვითარება;

ვ) აკადემიის, საერთაშორისო საზღვაო საგანმანათლებლო და სამეცნიერო-კვლევით სისტემებში ინტეგრაცია;

ზ) სხვა საგანმანათლებლო დაწესებულებებთან ერთად ერთობლივი საგანმანათლებლო პროგრამების განხორციელება;

თ) საზღვაო და მომიჯნავე დარგების სამეცნიერო-კვლევითი საქმიანობის განვითარება;

ი) საერთაშორისო რეგულაციებისა და საქართველოს საკანონმდებლო მოთხოვნებიდან გამომდინარე, საგანმანათლებლო და საწვრთნელი საქმიანობის განხორციელებასთან დაკავშირებული სხვა ფუნქციები.

საქართველოს ეკონომიკისა და მდგრადი განვითარების მინისტრის 2020 წლის 27 აგვისტოს ბრძანება №1-1/341 - ვებგვერდი, 27.08.2020 წ.

მუხლი 5. სწავლების ენა

აკადემიაში სწავლების ენა არის ქართული. სხვა ენაზე სწავლება დასაშვებია მხოლოდ მაშინ, თუ ეს გათვალისწინებულია საერთაშორისო ხელშეკრულებებით ან/და შეთანხმებულია საქართველოს განათლებისა და მეცნიერების სამინისტროსთან.

თავი II. აკადემიის სტრუქტურა და სუბიექტთა უფლება-მოვალეობები

მუხლი 6. აკადემიის სტრუქტურა

1. აკადემიის მართვის ორგანო/მმართველი სუბიექტები არიან: აკადემიის რექტორი, აკადემიური საბჭო, სენატი, მართვისა და განვითარების ცენტრი.

2. აკადემიის სტრუქტურა შედგება ძირითადი საგანმანათლებლო ერთეულების − ფაკულტეტებისაგან, დამხმარე საგანმანათლებლო ერთეულებისაგან, ცენტრებისაგან და დამხმარე სტრუქტურული ერთეულებისაგან – დეპარტამენტები, სამსახურები, სამმართველოები და ბიბლიოთეკა.

3. აკადემიის სტრუქტურული ერთეულის შექმნა, რეორგანიზაცია და გაუქმება ხორციელდება მოქმედი კანონმდებლობის შესაბამისად.

4. ფაკულტეტი იქმნება აკაემიური საბჭოს წარდგინებით, ხოლო მისი რეორგანიზაცია და გაუქმება ხორციელდება აკადემიური საბჭოს წარდგინების საფუძველზე, მოქმედი კანონმდებლობის შესაბამისად.

5. აკადემიას აქვს ფილიალი – ფოთის ფილიალი -ფოთის საზღვაო სასწავლო-საწვრთნელი ცენტრი, რომელიც არის აკადემიის ნაწილი და ახორციელებს იმავე საგანმანათლებლო და საწვრთნელ საქმიანობას, რასაც აკადემია.

6. „პროფესიული განათლების შესახებ“ საქართველოს კანონით განსაზღვრული პროფესიული საგანმანათლებლო და მოკლევადიანი კურსების განხორციელების მიზნით აკადემიაში ფუნქციონირებს პროფესიული მომზადების ცენტრი.

7. „მეზღვაურთა განათლებისა და სერტიფიცირების შესახებ“ საქართველოს კანონით განსაზღვრული საწვრთნელი კურსების განხოციელების მიზნით აკადემიაში ფუნქციონირებს მეზღაურთა სასწავლო, საწვრთნელი და სერტიფიცირების ცენტრი.

8. აკადემიის სტრუქტურული ერთეულებისა და ცენტრების საქმიანობა რეგულირდება შესაბამისი დებულებით.

საქართველოს ეკონომიკისა და მდგრადი განვითარების მინისტრის 2013 წლის 25 სექტემბრის ბრძანება №1-1/275 - ვებგვერდი, 27.09.2013 წ.

საქართველოს ეკონომიკისა და მდგრადი განვითარების მინისტრის 2015 წლის 12 თებერვლის ბრძანება №1-1/55 - ვებგვერდი, 16.02.2015 წ.

საქართველოს ეკონომიკისა და მდგრადი განვითარების მინისტრის 2018 წლის 24 იანვრის ბრძანება №1-1/20 - ვებგვერდი, 25.01.2018 წ.

საქართველოს ეკონომიკისა და მდგრადი განვითარების მინისტრის 2019 წლის 27 დეკემბრის ბრძანება №1-1/622 - ვებგვერდი, 27.12.2019 წ.

საქართველოს ეკონომიკისა და მდგრადი განვითარების მინისტრის 2021 წლის 25 მაისის ბრძანება №1-1/205 - ვებგვერდი, 28.05.2021 წ.

საქართველოს ეკონომიკისა და მდგრადი განვითარების მინისტრის 2023 წლის 18 დეკემბრის ბრძანება №1-1/496 - ვებგვერდი, 19.12.2023 წ.

მუხლი 6¹. აკადემიის მართვის პრინციპები

1. აკადემია უზრუნველყოფს:

ა) აკადემიური პერსონალისა და სტუდენტთა აკადემიურ თავისუფლებას;

ბ) აკადემიური პერსონალის, ადმინისტრაციული პერსონალისა და სტუდენტთა მონაწილეობას გადაწყვეტილებების მიღებასა და მათი შესრულების კონტროლის პროცესში;

გ) თანასწორ მოპყრობას, განურჩევლად რასის, კანის ფერის, სქესის, წარმოშობის, ეთნიკური კუთვნილების, ენის, რელიგიის, პოლიტიკური ან სხვა შეხედულებების, სოციალური კუთვნილების, ქონებრივი ან წოდებრივი მდგომარეობის ან სხვა ნიშნის მიხედვით;

დ) აკადემიაში არჩევნების სამართლიანობასა და გამჭვირვალობას, კონკურსების საჯაროობას;

ე) უმაღლესი/პროფესიული განათლების ხელმისაწვდომობასა და ღიაობას, უმაღლესი/პროფესიული განათლების მიღების შესაძლებლობას მთელი სიცოცხლის განმავლობაში, აკადემიის მართვის გამჭვირვალობას, უმაღლესი/პროფესიული განათლების სფეროში ყოველგვარი დისკრიმინაციის აკრძალვას, მათ შორის, რასის, კანის ფერის, სქესის, წარმოშობის, ეთნიკური კუთვნილების, ენის, რელიგიის, პოლიტიკური ან სხვა შეხედულებების, სოციალური კუთვნილების, ქონებრივი ან წოდებრივი მდგომარეობის ან სხვა ნიშნის მიხედვით.

2. აკადემიის სტრუქტურული ერთეულების დებულებებით ან/და შიდასამართლებრივი აქტით არ შეიძლება დადგინდეს ამ პრინციპების შემზღუდავი ნორმები.

მუხლი 7. აკადემიის რექტორი

1. აკადემიას ხელმძღვანელობს აკადემიის რექტორი, რომელიც იმავდროულად არის სენატის თავმჯდომარე.

2. აკადემიის რექტორს თანამდებობაზე ნიშნავს და თანამდებობიდან ათავისუფლებს საქართველოს ეკონომიკისა და მდგრადი განვითარების მინისტრი (შემდგომში – მინისტრი).

3. აკადემიის რექტორი კანონმდებლობისა და ამ წესდებით განსაზღვრული უფლებამოსილების ფარგლებში:

ა) დამოუკიდებლად ხელმძღვანელობს და წარმართავს აკადემიის საქმიანობას;

ბ) წარმოადგენს აკადემიას საქართველოში და მის ფარგლებს გარეთ;

გ) აკადემიის სახელით დებს გარიგებებს და ანიჭებს უფლებამოსილებას აკადემიის წარმომადგენლობაზე;

დ) პასუხისმგებელია საქართველოს კონსტიტუციის, საკანონმდებლო და კანონქვემდებარე აქტების შესრულებისათვის აკადემიის უფლებამოსილების ფარგლებში;

ე) კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს, ამტკიცებს პროცედურებსა და დებულებებს;

ვ) სსიპ – საზღვაო ტრანსპორტის სააგენტოსთან შეთანხმებით (შემდგომში – სააგენტო) ამტკიცებს აკადემიის საშტატო განრიგსა და თანამდებობრივ სარგოებს;

ზ) საქართველოს ეკონომიკისა და მდგრადი განვითარების სამინისტროსთან (შემდგომში – სამინისტრო) შეთანხმებით ნიშნავს და ათავისუფლებს ვიცე-რექტორს, რომლის კომპეტენცია და უფლებამოსილება განისაზღვრება აკადემიის რექტორის ინდივიდუალური ადმინისტრაციულ-სამართლებრივი აქტით და რომელიც ინიშნება რექტორის ულებამოსილების ვადით, საქართველოს კანონმდებლობითა და ამ წესდებით განსაზღვრული გათავისუფლების საფუძვლების გათვალისწინებით;

თ) იღებს გადაწყვეტილებას პერსონალის მიმართ წახალისებისა და დისციპლინური პასუხისმგებლობის ზომების გამოყენების შესახებ;

ი) უფლებამოსილია სააგენტოსთან შეთანხმებით აკადემიაში დასაქმებულ პირებზე დააწესოს დანამატი არაუმეტეს შესაბამისი საბიუჯეტო წლის ბოლომდე „საქართველოს შრომის კოდექსის“ 27-ე მუხლით განსაზღვრული ზეგანაკვეთური სამუშაოს შესრულების ან/და დამატებითი ფუნქციების შესრულებისათვის, მათ შორის, ღამის საათებში, დასვენების/უქმე დღეს და ჯანმრთელობისათვის რისკის შემცველ სამუშაო პირობებში საქმიანობისათვის, კანონმდებლობით დადგენილი ზღვრების ფარგლებში;

კ) კანონმდებლობით და წესდებით დადგენილი წესის შესაბამისად ნიშნავს და ათავისუფლებს თანამშრომლებს;

ლ) აკადემიის მიზნებისა და ამოცანების შესაბამისად განსაზღვრავს საფინანსო-ეკონომიკურ საქმიანობას. ასევე წყვეტს სახელობითი სტიპენდიების დაწესების საკითხს სააგენტოსთან შეთანხმებით;

მ) აკადემიის სახელით აცხადებს კონკურსებს;

ნ) სააგენტოსთან შეთანხმებით იღებს გადაწყვეტილებას აკადემიის სახსრებისა და მატერიალური ფასეულობების განკარგვის შესახებ;

ო) ამტკიცებს აკადემიის/მისი სტრუქტურული ერთეულების ბლანკების, ბეჭდებისა და შტამპების ნიმუშებს და ცნობისთვის უგზავნის სსიპ – განათლების ხარისხის განვითარების ეროვნულ ცენტრს;

პ) იღებს გადაწყვეტილებას აკადემიური პერსონალისათვის სამეცნიერო-შემოქმედებითი შვებულების მიცემის შესახებ და ამტკიცებს სამეცნიერო-შემოქმედებითი შვებულების გაცემის წესს;

ჟ) ამტკიცებს აკადემიური საბჭოს რეგლამენტს;

რ) ამტკიცებს სენატის რეგლამენტს;

ს) ამტკიცებს აკადემიის სტრუქტურული ერთეულების დებულებებს;

ტ) (ამოღებულია - 18.04.2023, №1-1/156);

უ) აწერს ხელს განათლების დამადასტურებელ დოკუმენტებზე;

ფ) აკადემიური საბჭოს წარდგინებით ამტკიცებს პრიორიტეტულ სამეცნიერო-კვლევით მიმართულებებს;

ქ) აკადემიური საბჭოს წარდგენით ამტკიცებს აკადემიური პერსონალის რაოდენობის განსაზღვრის მეთოდოლოგიასა და აკადემიური პერსონალის შერჩევის წესს;

ღ) ამტკიცებს მოწვეული მასწავლებლების შერჩევისა და შეფასების წესს;

ყ) აკადემიური საბჭოს წარდგენით ამტკიცებს საპატიო წოდების მინიჭების წესს;

შ) აკადემიური საბჭოს წარდგინებით ანიჭებს საპატიო წოდებებს;

ჩ) ამტკიცებს ბათუმის სახელმწიფო საზღვაო აკადემიის სტრატეგიული განვითარების გეგმას;

ჩ¹) დამხმარე საგანმანათლებლო ერთეულების წარდგინებით ამტკიცებს შესაბამის საგანმანათლებლო პროგრამებს;

ჩ²) დამხმარე საგანმანათლებლო ერთეულების წარდგინებით, კანონმდებლობით დამტკიცებული წესით, ამტკიცებს სსიპ – საზღვაო ტრანსპორტის სააგენტოსთან შეთანხმებულ საწვრთნელ კურსებს;

ც) ახორციელებს ამ წესდებითა და კანონმდებლობით მინიჭებულ სხვა უფლებამოსილებებს.

4. რექტორი ამ წესებითა და კანონმდებლბით დადგენილი უფლებამოსილებების ფარგლებში ქმნის სამუშაო ჯგუფებსა და კომისიებს.

5. რექტორი უფლებამოსილია შექმნას მრჩეველთა საბჭო, რომლის შექმნისა და საქმიანობის წესი განისაზღვრება რექტორის ინდივიდუალური ადმინისტრაციულ-სამართლებრივი აქტით.

6. რექტორის არყოფნის ან მის მიერ სამსახურებრივი მოვალეობის განხორციელების შეუძლებლობის შემთხვევაში მის მოვალეობას ასრულებს რექტორის ინდივიდუალური ადმინისტრაციულ-სამართლებრივი აქტით განსაზღვრული პირი.

7. რექტორის თანამდებობიდან გათავისუფლების შემთხვევაში რექტორის მოვალეობას ასრულებს მინისტრის ინდივიდუალური ადმინისტრაციულ-სამართლებრივი აქტით განსაზღვრული პირი.

საქართველოს ეკონომიკისა და მდგრადი განვითარების მინისტრის 2022 წლის 14 თებერვლის ბრძანება №1-1/63 - ვებგვერდი, 15.02.2022 წ.

მუხლი 8. აკადემიური საბჭო

1. აკადემიური საბჭო არის აკადემიის კოლეგიური წარმომადგენლობითი მართვის ორგანო, რომლის შემადგენლობაში შედის საბჭოს თავმჯდომარე, მართვისა და განვითარების სისტემების ცენტრის უფროსი, სასწავლო-სამეცნიერო ცენტრის უფროსი, ძირითადი საგანმანათლებლო ერთეულების ხელმძღვანელები, ძირითადი საგანმანათლებლო ერთეულების საბჭოების 3-3 წარმომადგენელი, მათ შორის, თითო სტუდენტი ყოველი ფაკულტეტიდან.

2. აკადემიურ საბჭოში ძირითადი საგანმანათლებლო ერთეულების საბჭოების წარმომადგენლებს ფაკულტეტების საბჭოები ირჩევენ 2 (ორი) წლის ვადით.

3. აკადემიური საბჭოს შემადგენლობაში ასევე შედის სააგენტოს წარმომადგენელი, სათათბირო ხმის უფლებით.

4. აკადემიური საბჭოს თავმჯდომარეს ნიშნავს და ათავისუფლებს რექტორი. რექტორი უფლებამოსილია საბჭოს თავმჯდომარე დანიშნოს საბჭოს შემადგენლობიდან. საბჭოს თავმჯდომარე ინიშნება 1 (ერთი) წლის ვადით. რექტორი უფლებამოსილია თავმჯდომარედ მომდევნო ვადით დანიშნოს იგივე კანდიდატურა.

5. საბჭო თავისი კომპეტენციის ფარგლებში:

ა) სასწავლო წლის დასაწყისში ამტკიცებს კოეფიციენტებს ერთიანი ეროვნული გამოცდების ცალკეული საგნისათვის, აგრეთვე ფაკულტეტებზე მისაღებ სტუდენტთა რაოდენობას ფაკულტეტების საბჭოების წარდგინებით;

ბ) ფაკულტეტის წარდგინებით ამტკიცებს საგანმანათლებლო პროგრამებს;

გ) ფაკულტეტის წარდგინებით ამტკიცებს მაგისტრანტობის კანდიდატებისთვის აკადემიის მიერ განსაზღვრული გამოცდის/გამოცდების ჩატარების წესს საქართველოს განათლებისა და მეცნიერების მინისტრის ბრძანებით დადგენილი წესის შესაბამისად;

დ) აწესებს მინიმალური კომპეტენციის ზღვარს საქართველოს განათლებისა და მეცნიერების სამინისტროს მიერ დამტკიცებული საერთაშორისო გამოცდების ჩამონათვალით გათვალისწინებულ გამოცდაში, რომლის გადალახვის შემთხვევაშიც პირს უფლება აქვს, მონაწილეობა მიიღოს აკადემიის მიერ განსაზღვრულ გამოცდაში/გამოცდებში;

ე) შეიმუშავებს წინადადებებს და ითანხმებს აკადემიის სტრატეგიული განვითარების გეგმას;

ვ) ითანხმებს ფაკულტეტის საბჭოს მიერ შემუშავებულ ძირითადი საგანმანათლებლო ერთეულების დებულებას ან/და წარადგენს ცვლილებების პროექტს დებულებაში;

ზ) წარადგენს ცვლილებების პროექტს შესაბამისი დასაბუთებით აკადემიის განათლების ხარისხის უზრუნველყოფის სამსახურის დებულებაში;

თ) ირჩევს აკადემიის განათლების ხარისხის უზრუნველყოფის მენეჯერს;

ი) წარადგენს დასაბუთებულ წინადადებებს ფაკულტეტის დეკანის, აკადემიის განათლების ხარისხის უზრუნველყოფის მენეჯერის და ფაკულტეტის ხარისხის უზრუნველყოფის სამსახურის ხელმძღვანელის არჩევის წესსა და საარჩევნო პროცედურაში ცვლილებების თაობაზე;

კ) დასაბუთებულ წინადადებებს წარუდგენს რექტორს მოწვეული მასწავლებლების შერჩევისა და შეფასების წესში ცვლილების შეტანის თაობაზე;

ლ) სენატთან ერთად შეიმუშავებს და დასაბუთებულ წინადადებებს წარუდგენს რექტორს აკადემიური პერსონალის რაოდენობის განსაზღვრის მეთოდოლოგიასა და აკადემიური პერსონალის შერჩევის წესში ცვლილების შეტანის თაობაზე;

მ) ამტკიცებს სხვა საგანმანათლებლო დაწესებულებაში მიღებული კრედიტების აღიარების წესს;

ნ) აკადემიის განათლების ხარისხის უზრუნველყოფის სამსახურის წარდგინებით ამტკიცებს საგანმანათლებლო საქმიანობის შეფასების წესს;

ო) აკადემიის მისიის, მიზნების, ამოცანებისა და სტრატეგიული განვითარების გეგმის შესაბამისად რექტორს დასამტკიცებლად წარუდგენს აკადემიის საგანმანათლებლო და შემოქმედებითი საქმიანობის ძირითად მიმართულებებს;

პ) აკადემიის მისიის, მიზნების, ამოცანებისა და სტრატეგიული განვითარების გეგმის შესაბამისად შეიმუშავებს და რექტორს დასამტკიცებლად წარუდგენს აკადემიის პრიორიტეტულ საგანმანათლებლო და სამეცნიერო-კვლევით მიმართულებებს;

ჟ) შეიმუშავებს და რექტორს შესაბამის დასაბუთებით დასამტკიცებლად წარუდგენს საპატიო წოდების მინიჭების წესს;

რ) რექტორს წარუდგენს საპატიო წოდების მინიჭების წესის შესაბამისად შერჩეულ კანდიდატებს;

ს) ყოველი სასწავლო წლის ბოლოს მოისმენს აკადემიის მართვისა და განვითარების სისტემების ცენტრის უფროსის ანგარიშს;

ტ) ხმათა უმრავლესობით ახდენს აკადემიის წესდებაში ან/და შინაგანაწესში ცვლილებების ინიციირებას;

უ) განიხილავს სამეცნიერო-კვლევით პროგრამებს, რომელსაც დასამტკიცებლად წარუდგენს რექტორს;

ფ) შეიმუშავებს და ამტკიცებს სამეცნიერო-კვლევითი საქმიანობის შეფასების წესს;

ქ) შეიმუშავებს და ამტკიცებს საბაკალავრო და სამაგისტრო ნაშრომების შესრულების წესსა და პროცედურას; ღ) შეიმუშავებს აკადემიური და მოწვეული პერსონალის, სტუდენტთა სამეცნიერო საგრანტო პროექტებში, ადგილობრივ და საერთაშორისო სამეცნიერო კონფერენციებსა და სამეცნიერო-კვლევით ღონისძიებებში ჩართვისა და მონაწილეობის წესს.

6. აკადემიური საბჭოს თავმჯდომარის არყოფნის შემთხვევაში, თავმჯდომარის მოვალეობას ასრულებს საბჭოს ერთ-ერთი წევრი, აკადემიური საბჭოს თავმჯდომარის დავალებით.

7. აკადემიური საბჭო უფლებამოსილია მხოლოდ ამ მუხლით განსაზღვრული საკითხების განსახილველად.

8. აკადემიური საბჭოს საქმიანობის წესი განისაზღვრება საბჭოს რეგლამენტით.

მუხლი 8¹. სენატი

1. სენატი არის აკადემიის აღმასრულებელი რგოლის კოლეგიალური მართვის ორგანო, რომლის შემადგენლობაში შედის: რექტორი, ვიცე-რექტორი, ძირითადი საგანმანათლებლო ერთეულების ხელმძღვანელები, მართვისა და განვითარების სისტემების ცენტრის უფროსი, ადმინისტრაციის ხელმძღვანელი, ფოთის ფილიალის – ფოთის საზღვაო სასწავლო საწვრთნელი ცენტრის უფროსი, მეზღვაურთა სასწავლო, საწვრთნელი და სერტიფიცირების ცენტრის უფროსი, პროფესიული მომზადების ცენტრის უფროსი, სტუდენტური თვითმმართველობის წარმომადგენელი და სააგენტოს წარმომადგენელი.

2. სენატის თავმჯდომარე არის აკადემიის რექტორი.

3. სენატი თავისი კომპეტენეციის ფარგლებში:

ა) ხმათა უმრავლესობით ახდენს აკადემიის წესდებაში ან/და შინაგანაწესში ცვლილებების ინიციირებას;

ბ) შეიმუშავებს სტუდენტთა ფინანსური მხარდაჭერის წესსა და პირობებს;

გ) შეიმუშავებს და ამტკიცებს სტიპენდიის გაცემის წესს;

დ) ყოველწლიურად განსაზღვრავს სტიპენდიანტ სტუდენტთა კვოტას;

ე) ამტკიცებს მაგისტრატურისა და ბაკალავრიატის საგანმანათლებლო პროგრამებისათვის სტუდენტთა, პროფესიული ცენტრის მოკლევადიანი მომზადება-გადამზადების კურსების მსმენელთა, ასევე მეზღვაურთა სასწავლო, საწვრთნელი და სერტიფიცირების ცენტრის მსმენელთა სწავლის საფასურის ოდენობას;

ვ) ამტკიცებს აკადემიის ბიუჯეტს;

ზ) ამტკიცებს წლიურ ანგარიშს აკადემიის საფინანსო-ეკონომიკური საქმიანობის შესახებ;

თ) ყოველი წლის ბოლოს განიხილავს სტრუქტურული ერთეულების მიერ გაწეული საქმიანობის შესახებ ანგარიშს;

ი) აკადემიურ საბჭოსთან შეთანხმებით შეიმუშავებს და რექტორს წარუდგენს დასამტკიცებლად სტუდენტური პროექტების წარდგენისა და დაფინანსების პროცედურას;

კ) ხმათა უმრავლესობით ახდენს სამეცნიერო კვლევითი პროექტების დაფინანსების წესში ცვლილებების ინიციირებას;

ლ) შეიმუშავებს რეკომენდაციებს და წინადადებებს აკადემიური პერსონალის არჩევის წესსა და საარჩევნო პროცედურაზე;

მ) შეიმუშავებს და ცვლილებების ინიციირებას ახდენს აკადემიური პერსონალის რაოდენობის განსაზღვრის მეთოდოლოგიასა და აკადემიური და მოწვეული მასწავლებლების შესარჩევი კონკურსის პირობებში;

4. სენატი უფლებამოსილი არ არის განიხილოს საკითხები, რომლებიც არ არის მოწესრიგებული წინამდებარე წესდებით ან/და შიდა ნორმატიული აქტებით.

5. სენატის საქმიანობის წესი განისაზღვრება სენატის რეგლამენტით.

მუხლი 8². (ამოღებულია).

მუხლი 9. აკადემიის მართვისა და განვითარების სისტემების ცენტრი

1. აკადემიის საქმიანობის ხარისხის მართვის სისტემის შემუშავების, დანერგვის, განახლებისა და სისტემატური შეფასების მიზნით მოქმედებს მართვისა და განვითარების სისტემების ცენტრი.

2. ცენტრის შემადგენლობა და სტრუქტურა განისაზღვრება ცენტრის დებულებით.

3. ცენტრის სტრუქტურაში შედის განათლების ხარისხის უზრუნველყოფის მენეჯერი, რომლის არჩევის წესსა და პირობებს ამტკიცებს აკადემიური საბჭო.

4. ცენტრი თავისი საქმიანობის ფარგლებში:

ა) სისტემატურად აფასებს აკადემიაში მიმდინარე საგანმანათლებლო პროცესებს;

ბ) უზრუნველყოფს აკადემიაში სწავლების ხარისხს სწავლის, სწავლებისა და შეფასების ახალი მეთოდების შემუშავებისა და დანერგვის ხელშეწყობით;

გ) კოორდინაციას და მუდმივ მონიტორინგს უწევს აკადემიის ავტორიზაციასა და საგანმანათლებლო პროგრამების აკრედიტაციის პროცესს, სწავლის, სწავლებისა და შეფასების თანამედროვე მეთოდების (მოდულები, საკრედიტო სისტემა და სხვა) დანერგვის გზით;

დ) მჭიდრო კავშირს ამყარებს და თანამშრომლობს საზღვარგარეთის ქვეყნებისა და მათი უმაღლესი საგანმანათლებლო დაწესებულებების შესაბამის სამსახურებთან ხარისხის კონტროლის გამჭვირვალე კრიტერიუმებისა და მათი რეალიზების წესების ჩამოსაყალიბებლად;

ე) განსაზღვრავს ხარისხის კონტროლის კრიტერიუმებსა და მათი გამოყენების მეთოდიკას, რომლითაც ხელმძღვანელობს განათლების ხარისხის უზრუნველყოფის სამსახური, ISO შესაბამისობის სამსახური, ფაკულტეტის ხარისხის უზრუნველყოფის სამსახურები;

ვ) შეიმუშავებს შეფასების შიდა და გარე პროცედურებს, რომელთა მიზანია აკადემიაში სწავლებისა და აკადემიის მართვის ხარისხის გაუმჯობესება;

ზ) შეიმუშავებს და უზრუნველყოფს აკადემიის მისიისა და სტრატეგიული განვითარების გეგმის შესრულების მონიტორინგსა და ანალიზს;

თ) უზრუნველყოფს აკადემიის სტრუქტურული ერთეულების შიდა აუდიტის განხორციელებასა და შედეგების ანალიზს;

ი) შეიმუშავებს აკადემიის სამეცნიერო-კვლევითი საქმიანობის შიდა შეფასების წესს და დასამტკიცებლად წარუდგენს აკადემიურ საბჭოს. შეფასების წესი უნდა ეყრდნობოდეს სამეცნიერო-კვლევითი საქმიანობის შეფასების საერთაშორისო სტანდარტებს.

კ) ახორციელებს კანონმდებლობითა და სამსახურის დებულებით განსაზღვრულ სხვა უფლებამოსილებებს.

მუხლი 10. ძირითადი საგანმანათლებლო ერთეულები

1. აკადემიის ძირითადი საგანმანათლებლო ერთეულია ფაკულტეტი.

2. ფაკულტეტის მართვის ორგანოებია: ფაკულტეტის საბჭო, დეკანი, ფაკულტეტის ხარისხის უზრუნველყოფის სამსახური.

3. ფაკულტეტები ახორციელებენ საბაკალავრო და სამაგისტრო საგანმანათლებლო პროგრამებს და წარმართავენ სასწავლო პროცესს.

4. ფაკულტეტის სტრუქტურა განისაზღვრება ფაკულტეტის დებულებით, რომელსაც შესაბამისი ფაკულტეტის საბჭოს წარდგინებითა და აკადემიური საბჭოს რეკომენდაციების გათვალისწინებით ამტკიცებს რექტორი.

5. იმ შემთხვევაში, თუ აკადემიური საბჭო ფაკულტეტის მიერ წარდგენილ დებულებას არ მოიწონებს ზედიზედ ორჯერ, მიუხედავად ფაკულტეტის მიერ მომზადებული არგუმენტირებული დასაბუთებისა, რექტორი უფლებამოსილია დაამტკიცოს დებულება აკადემიური საბჭოს რეკომენდაციების გათვალისწინების გარეშე.

მუხლი 11. ფაკულტეტის საბჭო

1. ფაკულტეტის საბჭო არის ფაკულტეტის წარმომადგენლობითი ორგანო, რომლის შემადგენლობაში შედიან შესაბამისი ფაკულტეტის დებულების შესაბამისად არჩეული აკადემიური პერსონალი, მოწვეული დარგის სპეციალისტები და სტუდენტთა თვითმმართველობის წარმომადგენლები. საბჭოს წევრთა ოდენობა და ფაკულტეტის საბჭოში მათი წარმომადგენლობის ვადა განისაზღვრება ფაკულტეტის დებულებით.

2. ფაკულტეტის საბჭოში სტუდენტთა თვითმმართველობის წარმომადგენელთა რაოდენობა განისაზღვრება ფაკულტეტის დებულებით, მაგრამ არ შეიძლება იყოს საბჭოს შემადგენლობის 1/4-ზე ნაკლები.

3. ფაკულტეტის საბჭოში სტუდენტური თვითმმართველობის წარმომადგენლები აირჩევიან მათი საგანმანათლებლო პროგრამის ხანგრძლივობის ვადით.

4. ფაკულტეტის საბჭო იკრიბება აკადემიური პერსონალის არჩევიდან არა უგვიანეს 5 დღისა.

5. ფაკულტეტის საბჭო ცნობს თავის უფლებამოსილებას საბჭოს პირველი შეკრებისთანავე.

6. ფაკულტეტის საბჭო:

ა) თავისუფალი და თანასწორი არჩევნების საფუძველზე, ფარული კენჭისყრით, სიითი შემადგენლობის უმრავლესობით ირჩევს ფაკულტეტის დეკანს;

ბ) დეკანის წარდგინებით შეიმუშავებს და აკადემიის აკადემიურ საბჭოს დასამტკიცებლად წარუდგენს საგანმანათლებლო პროგრამებს;

გ) დეკანის წარდგინებით შეიმუშავებს ფაკულტეტის დებულებას და წესდებით განსაზღვრული წესით აკადემიურ საბჭოსთან შეთანხმებით დასამტკიცებლად წარუდგენს რექტორს;

დ) ირჩევს ფაკულტეტის ხარისხის უზრუნველყოფის სამსახურის ხელმძღვანელს;

ე) ახორციელებს საქართველოს კანონმდებლობით მისთვის მინიჭებულ სხვა უფლებამოსილებას

7. ფაკულტეტის საბჭო უფლებამოსილია, თუ მას ესწრება საბჭოს წევრთა სრული შემადგენლობის ნახევარი მაინც.

8. ფაკულტეტის საბჭოს სხდომებს თავმჯდომარეობს ფაკულტეტის დეკანი. მისი არყოფნის ან მის მიერ სამსახურებრივი მოვალეობის განხორციელების შეუძლებლობის შემთხვევაში სხდომებს დეკანის დავალებით თავმჯდომარეობს ფაკულტეტის საბჭოს ერთ-ერთი წევრი.

9. ფაკულტეტის საბჭოს სხდომებზე გადაწყვეტილება მიიღება დამსწრე წევრთა ხმათა უმრავლესობით. ხმების გაყოფის შემთხვევაში გადამწყვეტია სხდომის თავმჯდომარის ხმა.

მუხლი 12. ფაკულტეტის დეკანი

1. ფაკულტეტის დეკანს დადგენილი წესის შესაბამისად ირჩევს ფაკულტეტის საბჭო 4 (ოთხი) წლის ვადით.

2. დეკანის მიმართ წაყენებული მოთხოვნები და იმპიჩმენტის წესი განისაზღვრება დეკანის არჩევის წესის შესაბამისად.

3. ფაკულტეტის დეკანი:

ა) უზრუნველყოფს ფაკულტეტზე საგანმანათლებლო საქმიანობის ეფექტურად წარმართვას;

ბ) ფაკულტეტის საბჭოს განსახილველად წარუდგენს საგანმანათლებლო პროგრამებს;

გ) ფაკულტეტის საბჭოს განსახილველად წარუდგენს ფაკულტეტის დებულებას;

დ) თავისი კომპეტენციის ფარგლებში პასუხისმგებელია რექტორის, სენატის, აკადემიური საბჭოსა და ფაკულტეტის საბჭოს გადაწყვეტილებების შესრულებაზე;

ე) თავისი კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს;

ვ) თავმჯდომარეობს ფაკულტეტის საბჭოს სხდომებს;

ზ) ახორციელებს საქართველოს კანონმდებლობით მისთვის მინიჭებულ სხვა უფლებამოსილებას.

4. ფაკულტეტის დეკანის უფლება-მოვალეობები, წინამდებარე წესდების შესაბამისად განსაზღვრულია ფაკულტეტის დებულებით.

მუხლი 13. (ამოღებულია)

მუხლი 14. ფაკულტეტის ხარისხის უზრუნველყოფის სამსახური

1. ფაკულტეტზე საგანმანათლებლო საქმიანობის, აგრეთვე აკადემიური პერსონალის პროფესიული განვითარების ხარისხის სისტემატური შეფასების მიზნით იქმნება ფაკულტეტის ხარისხის უზრუნველყოფის სამსახური, რომელიც მოქმედებს ფაკულტეტის დებულების შესაბამისად.

2. ფაკულტეტის ხარისხის უზრუნველყოფის სამსახური ამყარებს მჭიდრო კავშირს და თანამშრომლობს საზღვარგარეთის ქვეყნებისა და მათი უმაღლესი საგანმანათლებლო დაწესებულების შესაბამის სამსახურებთან ხარისხის კონტროლის გამჭვირვალე კრიტერიუმებისა და მათი უზრუნველყოფის მეთოდოლოგიის ჩამოსაყალიბებლად.

3. ფაკულტეტის ხარისხის უზრუნველყოფის სამსახური:

ა) აკადემიის შესაბამის სამსახურთან თანამშრომლობით ადგენს ფაკულტეტზე საგანმანათლებლო პროცესის შეფასების გამჭვირვალე კრიტერიუმებს;

ბ) ფაკულტეტის დებულებით განსაზღვრული კრიტერიუმების საფუძველზე ახდენს საგანმანათლებლო პროცესების მონიტორინგს და შეფასებას;

გ) საერთაშორისო გამოცდილების გათვალისწინებით შეიმუშავებს წინადადებებს საგანმანათლებლო პროცესების ოპტიმიზაციის მიზნით ;

დ) უზრუნველყოფს ფაკულტეტის და მის ფარგლებში განხორციელებადი საგანმანათლებლო პროგრამების თვითშეფასებას ავტორიზაციის/აკრედიტაციის პროცესისთვის;

ე) რეგულარულად წარუდგენს თავისი მუშაობის შედეგებს ფაკულტეტის საბჭოსა და მართვისა და განვითარების სისტემების ცენტრის უფროსს.

მუხლი 15. (ამოღებულია).

მუხლი 15¹. ფოთის ფილიალი – „ფოთის საზღვაო სასწავლო-საწვრთნელი ცენტრი“

1. ფოთის საზღვაო სასწავლო-საწვრთნელი ცენტრი არის აკადემიის ნაწილი და ახორციელებს იმავე საგანმანათლებლო საქმიანობას, რასაც აკადემია.

2. ფოთის საზღვაო სასწავლო-საწვრთნელი ცენტრის საქმიანობა, მიზნები და ფუნქციები რეგულირდება სსიპ – სასწავლო უნივერსიტეტის – ბათუმის სახელმწიფო საზღვაო აკადემიის ფოთის ფილიალის – ფოთის საზღვაო სასწავლო საწვრთნელი ცენტრის დებულებით, რომელსაც ამტკიცებს რექტორი.

3. ფოთის საზღვაო სასწავლო-საწვრთნელი ცენტრის ქონება და ფულადი სახსრები წარმოადგენს აკადემიის საკუთრებას და აღირიცხება აკადემიის ბალანსზე“.

თავი III. არჩევნები

მუხლი 16. აკადემიის საარჩევნო კომისია

1. აკადემიაში არჩევნების ჩატარების მიზნით იქმნება აკადემიის საარჩევნო კომისია (შემდგომში – საარჩევნო კომისია).

2. საარჩევნო კომისიის წევრთა რაოდენობა უნდა იყოს კენტი და შედგებოდეს არანაკლებ 5 წევრისაგან. საარჩევნო კომისიის წევრთა რაოდენობა და შემადგენლობა განისაზღვრება რექტორის ინდი ვი დუა ლური ადმინისტრაციულ-სამართლებრივი აქტით.

3. საარჩევნო კომისიის წევრებს ნიშნავს რექტორი. კომისიის შემადგენლობაში უნდა შედიოდნენ აკადემიის თანამშრომლები და სტუდენტური თვითმმართველობის წარმომადგენე ლი.

4. საარჩევნო კომისიის თავმჯდომარე აირჩევა კომისიის პირველ სხდომაზე კომისიის წევრთა შემადგენლობიდან დამსწრე წევრთა ხმათა უმრავლესობით, ფარული კენჭისყრით. საარჩევნო კომისიის თავმჯდომარე ხელმძღვანელობს კომისიის სხდომებს, ხელს აწერს კომისიის მიერ მიღებულ გადაწყვეტილებებს და ახორციელებს სხვა უფლებამოსილებებს.

5. საარჩევნო კომისიის მდივნად აირჩევა კომისიის წევრი კომისიის პირველივე სხდომაზე, ფარული კენჭისყრით, დამსწრე წევრთა ხმათა უმრავლესობით. კომისიის მდივანი ადგენს კომისიის სხდომის ოქმებს, არეგისტრირებს საარჩევნო კომისიაში შეტანილ კორესპონდენციას, არჩევნებში მონაწილეობის მსურველ კანდიდატებს და აძლევს მათ შესაბამის მოწმობებს, ადგენს არჩევნების შედეგების შემაჯამებელ ოქმებს და ახორციელებს მისთვის მინიჭებულ სხვა უფლებამოსილებებს.

6. საარჩევნო კომისიის თავმჯდომარე, მდივანი და კომისიის სხვა წევრები შეიძლება თავიანთი ფუნქციების შესრულებისათვის აკადემიის ბიუჯეტიდან იღებდნენ ანაზღაურებას, რომლის ოდენობასა და ფორმას განსაზღვრავს რექტორი.

მუხლი 17. ინტერესთა შეუთავსებლობა

1. ასარჩევ თანამდებობაზე წარდგენილი კანდიდატი არ შეიძლება იყოს საარჩევნო კომისიის წევრი.

2. (ამოღებულია - 31.08.2022, №1-1/383).

მუხლი 18. აკადემიის არჩევითი თანამდებობები და საარჩევნო პროცედურა

1. აკადემიაში არჩევით თანამდებობებს განეკუთვნება: ფაკულტეტის დეკანი, აკადემიის ხარისხის უზრუნველყოფის სამსახურის ხელმძღვანელი და ფაკულტეტის ხარისხის უზრუნველყოფის სამსახურის ხელძღვანელი.

2. ფაკულტეტის დეკანის, აკადემიის ხარისხის უზრუნველყოფის სამსახურის ხელმძღვანელის და ფაკულტეტის ხარისხის უზრუნველყოფის სამსახურის ხელძღვანელის არჩევის წესი და საარჩევნო პროცედურა განისაზღვრება რექტორის მიერ დამტკიცებული წესით.

თავი IV. აკადემიის პერსონალი

მუხლი 19. პერსონალი

1. აკადემიის პერსონალი შედგება: აკადემიური, ადმინისტრაციული და დამხმარე თანამდებობების პირებისგან და მოწვეული პერსონალისგან.

1¹. აკადემიის პერსონალის კვალიფიკაცია, რომელიც ასწავლის უმაღლესი/პროფესიულ საგანმანათლებლო პროგრამებს, უნდა აკმაყოფილებდეს შესაბამისად უმაღლესი და პროფესიული განათლების შესახებ საქართველოს კანონის მოთხოვნებს, ამ მუხლის მე-2 პუნქტით დადგენილი პირობების გათვალისწინებით.

2. აკადემიის პერსონალის კვალიფიკაცია, რომელიც ასწავლის სპეციალურ საზღვაო დისციპლინებს, უნდა აკმაყოფილებდეს „მეზღვაურის განათლებისა და სერტიფიცირების შესახებ“ საქართველოს კანონის მოთხოვნებს.

მუხლი 20. აკადემიის აკადემიური პერსონალი

1. აკადემიის აკადემიური პერსონალი შედგება პროფესორებისაგან და ასისტენტებისგან.

1¹. აკადემიის აკადემიური პერსონალის ხელშეკრულების კატეგორიები რეგულირდება შიდა ნორმატიული აქტებით.

2. პროფესორების შემადგენლობას განეკუთვნება პროფესორი, ასოცირებული პროფესორი და ასისტენტ-პროფესორი.

3. აკადემიური პერსონალი მონაწილეობს ან/და წარმართავს სასწავლო პროცესს.

4. აკადემიური პერსონალის პედაგოგიური დატვირთვის ზღვრულ ოდენობას და საათობრივი დატვირთვის განაწილების წესს ამტკიცებს რექტორი.

მუხლი 21. აკადემიური თანამდებობის დაკავების წესი

1. აკადემიური თანამდებობის დაკავება შეიძლება მხოლოდ ღია კონკურსის წესით, რომელიც უნდა შეესაბამებოდეს გამჭვირვალობის, თანასწორობისა და სამართლიანი კონკურენციის პრინციპებს.

2. კონკურსის ჩატარების თარიღი და პირობები ქვეყნდება საქართველოს კანონმდებლობითა და ამ წესდებით დადგენილი წესით, განაცხადების მიღებამდე არანაკლებ 1 თვით ადრე.

3. კონკურსის ჩატარების წესსა და პირობებს ამტკიცებს აკადემიის რექტორი.

მუხლი 22. აკადემიურ თანამდებობაზე არჩევის პირობები

1. პროფესორის თანამდებობაზე შეიძლება არჩეულ იქნეს დოქტორის ან მასთან გათანაბრებული აკადემიური ხარისხის მქონე პირი, რომელსაც აქვს სამეცნიერო-პედაგოგიური მუშაობის არანაკლებ 6 წლის გამოცდილება.

2. ასოცირებული პროფესორის თანამდებობაზე შეიძლება არჩეულ იქნეს დოქტორის ან მასთან გათანაბრებული აკადემიური ხარისხის მქონე პირი, რომელსაც აქვს სამეცნიერო-პედაგოგიური მუშაობის არანაკლებ 3 წლის გამოცდილება.

3. ასისტენტ-პროფესორის თანამდებობაზე უმაღლესი საგანმანათლებლო დაწესებულების წესდებით განსაზღვრული წესით შეიძლება არჩეულ იქნეს დოქტორის ან მასთან გათანაბრებული აკადემიური ხარისხის მქონე პირი 3 ან 4 წლის ვადით.

4. ასისტენტის თანამდებობაზე უმაღლესი საგანმანათლებლო დაწესებულების წესდების შესაბამისად, კონკურსის ჩატარების წესისა და პირობების შესაბამისად განსაზღვრული წესით შეიძლება არჩეულ იქნეს დოქტორანტი 3 ან 4 წლის ვადით.

5. ამ მუხლის პირველი, მე-2, მე-3 და მე-4 პუნქტებით გათვალისწინებული აკადემიური თანამდებობების დაკავების უფლება ასევე აქვს სათანადო კვალიფიკაციის მქონე პირს, რომლის კომპეტენცია დასტურდება პროფესიული გამოცდილებით, სპეციალური მომზადებით ან/და პუბლიკაციებით. კვალიფიკაციის მქონედ ითვლება პირი, რომელსაც აქვს პროგრამით გათვალისწინებული სწავლის შედეგების გამომუშავებისათვის აუცილებელი კომპეტენცია.

6. აკადემიურ თანამდებობაზე არჩევის დამატებითი პირობები განისაზღვრება კონკურსის ჩატარების წესისა და პირობების შესაბამისად.

7. აკადემიის აკადემიურ პერსონალთან გასაფორმებელი ხელშეკრულების კატეგორიის შესაბამისად განისაზღვრება აკადემიურ თანამდებობაზე არჩევის დამატებითი კრიტერიუმები.

მუხლი 23. აკადემიური პერსონალის შრომითი ურთიერთობები

1. აკადემიურ პერსონალთან შრომითი ხელშეკრულება იდება შრომის კანონმდებლობით განსაზღვრული წესით.

2. (ამოღებულია - 18.12.2023 №1-1/496)].

მუხლი 24. აკადემიური პერსონალის უფლებები

1. აკადემიურ პერსონალს უფლება აქვს:

ა) მონაწილეობა მიიღოს აკადემიის მართვაში;

ბ) ჩარევის გარეშე განახორციელოს სწავლება, შემოქმედებითი საქმიანობა და სამეცნიერო ნაშრომების გამოქვეყნება;

გ) საგანმანათლებლო პროგრამის ფარგლებში დამოუკიდებლად განსაზღვროს სასწავლო კურსის პროგრამების (სილაბუსების) შინაარსი, სწავლების მეთოდები და საშუალებები;

დ) განახორციელოს საქართველოს კანონმდებლობით მათთვის მინიჭებული სხვა უფლებამოსილება.

2. აკადემიური პერსონალი ვალდებულია:

ა) დაიცვას აკადემიის წესდების მოთხოვნები;

ბ) დაიცვას შინაგანაწესი;

გ) შეასრულოს შრომითი ხელშეკრულებით ნაკისრი მოვალეობები;

დ) სამეცნიერო-შემოქმედებითი შვებულების დასრულების შემდეგ წარადგინოს ანგარიში ჩატარებული მუშაობის შესახებ.

3. აკადემია უზრუნველყოფს აკადემიური პერსონალის სამეცნიერო სწავლების თავისუფლებას და ქმნის მისი საქმიანობისათვის შესაბამის პირობებს.

მუხლი 25. აკადემიური პერსონალის თანამდებობიდან გათავისუფლება

1. აკადემიური პერსონალის თანამდებობიდან გათავისუფლების საფუძველია:

ა) პირადი განცხადება;

ბ) ვადიანი შრომითი ხელშეკრულების ვადის გასვლა;

გ) აკადემიის შინაგანაწესით, ეთიკის კოდექსითა და შრომითი ხელშეკრულებით გათვალისწინებული პირობების დარღვევა

დ) მის მიმართ სასამართლოს მიერ გამოტანილი გამამტყუნებელი განაჩენის კანონიერ ძალაში შესვლა;

ე) კანონმდებლობით განსაზღრული სხვა შემთხვევები;

2. აკადემიური პერსონალის თანამდებობიდან გათავისუფლების ბრძანებას გამოსცემს აკადემიის რექტორი.

მუხლი 26. ადმინისტრაციული თანამდებობები და სხვა პერსონალი

1. ადმინისტრაციული პერსონალი შედგება ადმინისტრაციული თანამდებობის პირებისაგან და დამხმარე პერსონალისგან. ადმინისტრაციულ თანამდებობებზე და დამხმარე პერსონალად არ შეიძლება არჩეულ ან დანიშნულ იქნეს 65 წელს მიღწეული პირი.

2. ადმინისტრაციულ თანამდებობებს განეკუთვნება: რექტორი, ვიცე-რექტორი, ადმინისტრაციის ხელმძღვანელი, აკადემიის სტრუქტურული ერთეულების ხელმძღვანელები, სტრუქტურული ერთეულის ხელმძღვანელის მოადგილეები. დამხმარე პერსონალს განეკუთვნება ყველა დასაქმებული, რომელიც არ არის აკადემიური ან ადმინისტრაციული თანამდებობის პირი.

3. მასწავლებელთა პერსონალს განეკუთვნება უფროსი მასწავლებელი, მასწავლებელი და პროფესიული მასწავლებელი.

4. მასწავლებელი უფლებამოსილია გაუძღვეს სასემინარო და პრაქტიკულ სამუშაოებს აკადემიური თანამდებობის დაკავების გარეშე. პროფესიული მასწავლებელი უფლებამოსილია გაუძღვეს პროფესიული საგანმანათლებლო პროგრამით გათვალისწინებულ მოდულებს.

5. აკადემია უფლებამოსილია აკადემიური ან მასწავლებლის თანამდებობის დაკავების გარეშე მოიწვიოს შესაბამისი კვალიფიკაციის მქონე სპეციალისტი სასწავლო ან/და სამეცნიერო-კვლევით პროცესში მონაწილეობის ან/და ამ პროცესის წარმართვის მიზნით.

6. აკადემია უფლებამოსილია სასწავლო ან/და სამეცნიერო-კვლევითი საქმიანობის განხორციელების პროცესში ჩართოს შესაბამისი კომპეტენციისა და სამუშაო გამოცდილების მქონე პირები.

მუხლი 27. მასწავლებელთა მოწვევა

1. ძირითადი საგანმანათლებლო ერთეული უფლებამოსილია სასწავლო პროცესის შეუფერხებლად წარმართვისათვის რექტორს წარუდგინოს შესაბამისი კვალიფიკაციის მქონე სპეციალისტის კანდიდატურა, რომლის მოწვევის შესახებ გადაწყვეტილებას იღებს რექტორი ან/და მასწავლებელთა მოწვევის მიზნით აკადემიაში ცხადდება ღია კონკურსი.

2. ამ მუხლის პირველი პუნქტით განსაზღვრული კონკურსის ჩატარების წესსა და პირობებს ამტკიცებს რექტორი.

მუხლი 28. ადმინისტრაციული თანამდებობიდან გათავისუფლება

აკადემიის ადმინისტრაციული თანამდებობის პირის ვადამდე გათავისუფლების საფუძველია:

ა) პირადი განცხადება;

ბ) მის მიმართ სასამართლოს მიერ გამოტანილი გამამტყუნებელი განაჩენის კანონიერ ძალაში შესვლა;

გ) გარდაცვალება;

დ) სასამართლოს მიერ ქმედუუნაროდ ან შეზღუდულქმედუნარიანად აღიარება;

ე) აკადემიის აკადემიური თანამდებობიდან გათავისუფლება, თუ ამ აკადემიურ თანამდებობაზე ყოფნა სხვა ადმინისტრაციული თანამდებობის დაკავების წინაპირობაა;

ვ) ორზე მეტი დისციპლინური გადაცდომა;

ზ) აკადემიის შინაგანაწესით ან/და საქართველოს კანონმდებლობით გათვალისწინებული საფუძვლებით.

მუხლი 29. თანამდებობრივი შეუთავსებლობა აკადემიაში

1. ადმინისტრაციულ პერსონალს ამავდროულად არ შეიძლება აკადემიაში ეკავოს სხვა ადმინისტრაციული პოზიცია.

2. აკადემიური პერსონალის სამსახურებრივი შეუთავსებლობა განისაზღვრება შრომითი ხელშეკრულებით.

3. თუ ადმინისტრაციული თანამდებობის დაკავების ან მართვის ორგანოს წევრობის წინაპირობაა აკადემიურ თანამდებობაზე ყოფნა, აკადემიურ თანამდებობაზე ყოფნის ვადის გასვლა იწვევს შესაბამის ადმინისტრაციულ თანამდებობაზე ან მართვის ორგანოში უფლებამოსილების შეწყვეტას.

4. სენატის წევრს (ფაკულტეტის საბჭოს წარმომადგენელს) არ შეიძლება იმავდროულად ეკავოს ადმინისტრაციული თანამდებობა.

5. პირს არ შეიძლება აკადემიაში ერთდრულად ეკავოს ორი აკადემიური თანამდებობა.

6. ვიცე-რექტორის თანამდებობაზე პირის დანიშვნა წარმოადგენს მისთვის აკადემიური თანამდებობის უფლებამოსილების ვადამდე შეწყვეტის საფუძველს.

თავი V. სტუდენტი

მუხლი 30. სტუდენტის/პროფესიული სტუდენტის უფლებები

1. სტუდენტს/პროფესიულ სტუდენტს უფლება აქვს:

ა) მიიღოს ხარისხიანი განათლება;

ბ) მონაწილეობა მიიღოს სასწავლო და კვლევით პროექტებში;

გ) ამ წესდებითა და აკადემიის შინაგანაწესითა დადგენილი წესით თანაბარ პირობებში ისარგებლოს აკადემიის მატერიალურ-ტექნიკური, საბიბლიოთეკო, საინფორმაციო და სხვა საშუალებებით;

დ) მიიღოს ამომწურავი ინფორმაცია აკადემიის საქმიანობის, მათ შორის, საფინანსო და სამეწარმეო საქმიანობის შესახებ;

ე) აირჩიოს წარმომადგენელი და არჩეულ იქნეს სტუდენტური თვითმმართველობის, ფაკულტეტისა და აკადემიის მართვის/წარმომადგენლობით ორგანოებში, „უმაღლესი განათლების შესახებ“ საქართველოს კანონის და ამ წესდების შესაბამისად;

ვ) თავისუფლად დააფუძნოს ან/და გაერთიანდეს სტუდენტურ ორგანიზაციებში თავისი ინტერესების შესაბამისად;

ზ) თავისუფლად გამოხატოს საკუთარი აზრი სასწავლო პროცესის მიმდინარეობასთან დაკავშირებით;

თ) საქართველოს კანონმდებლობითა და აკადემიის წესდებით განსაზღვრული წესით აკადემიაში სწავლების მეორე წლიდან გადავიდეს სხვა უმაღლეს/პროფესიულ საგანმანათლებლო დაწესებულებაში, ხოლო აკრედიტებულ უმაღლეს საგანმანათლებლო პროგრამაზე გადასვლისას გადაიტანოს მისთვის გამოყოფილი სახელმწიფო დაფინანსება ამ პროგრამაზე;

ი) დადგენილი წესით სახელმწიფოსგან, ბათუმის სახელმწიფო საზღვაო აკადემიისგან ან სხვა წყაროებიდან მიიღოს სტიპენდია, ფინანსური ან მატერიალური დახმარება, სხვა სახის შეღავათები;

კ) აირჩიოს საგანმანათლებლო, სასწავლო და საწვრთნელი პროგრამა;

ლ) მონაწილეობა მიიღოს ინდივიდუალური საგანმანათლებლო/საწვრთნელი/სასწავლო პროგრამის შემუშავებაში;

მ) პერიოდულად მონაწილეობა მიიღოს აკადემიური პერსონალის საქმიანობის შეფასების პროცესში;

ნ) მიიღოს სწავლების ინდივიდუალურ პროგრამაზე სწავლის უფლება;

ო) შეზღუდული შესაძლებლობების მქონე სტუდენტმა სრულფასოვანი განათლების მისაღებად ისარგებლოს სხვადასხვა სახის შეღავათით;

პ) განახორციელოს ამ წესდებით და საქართველოს კანონმდებლობით მისთვის მინიჭებული სხვა უფლებამოსილებანი.

2. სტუდენტის/პროფესიული სტუდენტის მიერ აკადემიური პერსონალის/პროფესიული მასწავლებლის თანდასწრებით გამოთქმული პირადი ინფორმაცია, ასევე ინფორმაცია საკუთარი შეხედულებების, რწმენისა და პოლიტიკური მრწამსის შესახებ, ინფორმაცია სტუდენტის მიმართ დისციპლინური ღონისძიების გატარების შესახებ, რომელიც აკადემიური პერსონალისთვის/პროფესიული მასწავლებლისათვის ცნობილი გახდა სასწავლო პროცესის მიმდინარეობისას, კონფიდენციალურია, გარდა იმ შემთხვევისა, თუ არსებობს სტუდენტის/პროფესიული სტუდენტის ნებართვა ან ადმინისტრაციის კანონიერი ინტერესი დაიცვას სხვისი უსაფრთხოება.

3. აკადემიის მხრიდან დაუშვებელია საკუთარი უფლებამოსილების და მატერიალურ-ტექნიკური ბაზის ისეთი გამოყენება, რამაც შეიძლება შექმნას ცენზურის დაწესების საფრთხე ან შეზღუდოს გამოხატვის თავისუფლება.

4. სტუდენტთა/პროფესიულ სტუდენტთა ქცევის, მის მიმართ დისციპლინური წარმოების წესები განსაზღვრულია აკადემიის ეთიკის კოდექსში.

5. სტუდენტი/პროფესიული სტუდენტი უფლებამოსილია კანონმდებლობით დადგენილი წესით გაასაჩივროს მის მიმართ მიღებული გადაწყვეტილება.

6. სტუდენტის/პროფესიული სტუდენტის სტატუსი წყდება შესაბამისი საგანმანათლებლო პროგრამის დასრულებისას, სტუდენტთა მობილობისა და სტატუსის შეწყვეტის დებულების, ეთიკის კოდექსით გათვალისწინებული შემთხვევის და სხვა დებულებების საფუძველზე.

მუხლი 31. სტუდენტის ვალდებულებები

1. სტუდენტი ვალდებულია:

ა) ისწავლოს აკადემიის მიერ დადგენილი პროგრამის მიხედვით ყველა ის საგანი, რომელიც საკუთარი სურვილით აირჩია და რომლის სწავლაც სავალდებულოა;

ბ) დაიცვას აკადემიის წესდება, შინაგანაწესი, ეთიკის კოდექსი, შეასრულოს ხელშეკრულებით ნაკისრი ვალდებულებები;

გ) გაუფრთხილდეს აკადემიის მატერიალურ-ტექნიკურ ბაზას.

2. აკადემიის სტუდენტის/პროფესიული სტუდენტის უფლება-მოვალეობების, ცოდნის შეფასების სისტემისა და სასწავლო პროცესთან დაკავშირებული ყველა სხვა საკითხი რეგულირდება ფაკულტეტის დებულებებით, პროფესიული სასწავლო პროცესის მარეგულირებელი წესით, „უმაღლესი განათლების შესახებ“ საქართველოს კანონის/„პროფესიული განათლების შესახებ“ საქართველოს კანონის შესაბამისად.

მუხლი 32. სტუდენტური თვითმმართველობა

1. აკადემიის სტუდენტური თვითმმართველობა წარმოადგენს „უმაღლესი განათლების შესახებ“ საქართველოს კანონის შესაბამისად არჩეულ აკადემიის სტუდენტთა წარმომადგენლობით ორგანოს.

2. აკადემიის სტუდენტური თვითმმართველობა წარმოადგენს ფაკულტეტებიდან არჩეული სტუდენტური თვითმმართველობების ერთიანობას, რომელიც საქმიანობას წარმართავს მის მიერ შემუშავებული დებულებისა და „უმაღლესი განათლების შესახებ“ საქართველოს კანონის შესაბამისად.

3. აკადემიის სტუდენტური თვითმმართველობის არჩევნების ორგანიზებისა და ჩატარების წესი განისაზღვრება მისი დებულებით.

4. აკადემიის სტუდენტური თვითმმართველობა მისი დებულების შესაბამისად:

ა) უზრუნველყოფს სტუდენტთა მონაწილეობას აკადემიის მართვაში;

ბ) ხელს უწყობს სტუდენტთა უფლებების დაცვას;

გ) ირჩევს წარმომადგენლებს ფაკულტეტის საბჭოში, აკადემიურ საბჭოსა და სენატში;

დ) ხელს უწყობს სტუდენტთა თავისუფალი დროის ნაყოფიერად გამოყენებას;

ე) შეიმუშავებს წინადადებებს ფაკულტეტების ან აკადემიის მართვის სისტემების და სწავლების ხარისხის გასაუმჯობესებლად, რომელსაც წარუდგენს ფაკულტეტის საბჭოს და აკადემიურ საბჭოს;

ვ) საჭიროებისამებრ უფლებამოსილია მიიღოს ამომწურავი ინფორმაცია აკადემიის საქმიანობის, მათ შორის, საფინანსო და სამეწარმეო საქმიანობის შესახებ;

ზ) ნიშნავს წევრებს აკადემიის და ფაკულტეტის თვითმმართველობის საარჩევნო კომისიებში;

თ) ნიშნავს აკადემიის მუდმივი და დროებითი კომისიების წევრებს

ი) იღებს დაფინანსებას აკადემიის ბიუჯეტიდან აკადემიის ბიუჯეტის შედგენის წესის შესაბამისად;

კ) კოორდინირებულად მუშაობს აკადემიაში არსებულ სტუდენტურ ორგანიზაციებთან, კლუბებთან, აკადემიური საბჭოს წევრ სტუდენტებთან;

ლ) თანამშრომლობს მართვის ორგანოებთან;

მ) უფლებამოსილია ადმინისტრაციას წარუდგინოს წინადადებები სტიპენდიის დანიშვნის და შეღავათების გაწევის შესახებ;

ნ) განახორციელებს თვითმმართველობის დებულებით გათვალისწინებულ სხვა უფლებამოსილებებს.

5. აკადემიის ადმინისტრაციას უფლება არა აქვს ჩაერიოს სტუდენტური თვითმმართველობის საქმიანობაში.

თავი VI. აკადემიის ქონება, საფინანსო-საბიუჯეტო საქმიანობა

მუხლი 33. აკადემიის ქონება

აკადემიის ქონება შედგება სახელმწიფოს მიერ საქართველოს კანონმდებლობით განსაზღვრული წესით გადაცემული ქონებისგან და აკადემიის სახსრებით შეძენილი ქონებისაგან. აკადემიას დასახული მიზნებისა და დაკისრებული ფუნქციების განსახორციელებლად გადაეცემა შესაბამისი ქონება კანონმდებლობით დადგენილი წესით, რომელიც აკადემიის სხვა ქონებასთან ერთად შესაძლოა გამოყენებულ იქნეს მხოლოდ ამ წესდებით განსაზღვრული მიზნებისა და ამოცანების შესასრულებლად დადგენილი წესის თანახმად.

მუხლი 34. აკადემიის ბიუჯეტი

1. აკადემიის ბიუჯეტი შედგება შემოსავლებისა და ხარჯებისაგან.

2. აკადემიის დაფინანსების წყარო შეიძლება იყოს:

ა) სწავლის საფასური, მათ შორის სახელმწიფო სასწავლო და სახელმწიფო სამაგისტრო გრანტი.

ბ) შესაბამისი ბიუჯეტიდან გამოყოფილი მიზნობრივი სახსრები;

გ) მეზღვაურთა სასწავლო, საწვრთნელი და სერტიფიცირების ცენტრის, პროფესიული მომზადების ცენტრის შემოსავლები;

დ) გრანტები;

ე) საქართველოს კანონმდებლობით ნებადართული სხვა შემოსავლები.

3. ბიუჯეტის განაწილება ხდება რექტორის მიერ დამტკიცებული ბიუჯეტის შედგენის წესის შესაბამისად.

მუხლი 35. ბიუჯეტის შემუშავებისა და დამტკიცების წესი

1. აკადემიის ბიუჯეტს სიითი შემადგენლობის უმრავლესობით ამტკიცებს სენატი.

2. სენატი განიხილავს წარდგენილი ბიუჯეტის პროექტს და თუ არ ეთანხმება მას, უბრუნებს ავტორს შენიშვნებით. ბიუჯეტის პროექტში შედის შესაბამისი ცვლილებები ბიუჯეტის და წარედგინება სენატს დასამტკიცებლად ახალი რედაქციით.

3. ამ მუხლის მე-2 პუნქტის მიუხედავად, შეიძლება ბიუჯეტის პროექტის პირვანდელი ვარიანტი წინადადებებითა და არგუმენტირებული დასაბუთებებით დასამტკიცებლად დაუბრუნდეს სენატს.

4. ბიუჯეტის ფორმირების წესი, პროცედურა და ვადები განისაზღვრება შესაბამისი წესით, რომელსაც ამტკიცებს რექტორი.

5. რექტორს უფლება აქვს, სენატის გადაწყვეტილების გარეშე მოახდინოს აკადემიის ბიუჯეტში ცვლილების შეტანა მხოლოდ მთლიანი საბიუჯეტო თანხის 10 %-ის ფარგლებში.

თავი VII. სახელმწიფო კონტროლი

მუხლი 36. სახელმწიფო კონტროლი

1. აკადემია ექვემდებარება სახელმწიფო კონტროლს, რაც გულისხმობს მის მიერ განხორციელებული საქმიანობის კანონიერების, მიზანშეწონილობის, ეფექტიანობისა და საფინანსო-ეკონომიკური საქმიანობის ზედამხედველობას.

2. აკადემიის სახელმწიფო კონტროლს ,,საჯარო სამართლის იურიდიული პირის შესახებ’’ საქართველოს კანონით დადგენილი წესით ახორციელებს სააგენტო, რომელსაც უფლება აქვს მოითხოვოს კონტროლის განსახორციელებლად საჭირო მასალებისა და ინფორმაციის წარმოდგენა.

3. საჯარო სამართლის იურიდიული პირი − საზღვაო ტრანსპორტის სააგენტო „უმაღლესი განათლების შესახებ" საქართველოს კანონით დადგენილი წესით:

ა) პასუხისმგებელია აკადემიის მიერ საზღვაო უმაღლესი განათლების სფეროში საქართველოს ნორმატიული აქტების შესრულებისთვის;

ბ) უფლებამოსილია განახორციელოს აკადემიის პროგრამული დაფინანსება;

გ) მონაწილეობს აკადემიის ავტორიზაციისა და აკრედიტაციის პირობების შემუშავებაში;

4. სააგენტოს თანხმობით, საქართველოს კანონმდებლობით დადგენილი წესით, აკადემიას შეუძლია განახორციელოს შემდეგი ქმედებები:

ა) უძრავი ქონების შეძენა, საკუთრებაში არსებული ქონების გასხვისება, იჯარით გაცემა და დატვირთვა;

ბ) სესხის აღება;

გ) თავდებობა;

დ) საშტატო განრიგისა და თანამდებობრივი სარგოების განსაზღვრა;

ე) სხვა გადაწყვეტილებები აკადემიის ქონებასთან დაკავშირებით, თუ ისინი სცილდება ჩვეულებრივი საქმიანობის ფარგლებს.

4¹. სააგენტო, სახელმწიფო კონტროლის ფარგლებში, 5 სამუშაო დღით ადრე ითანხმებს:

ა) თანამდებობრივ სარგოებზე დანამატების დადგენას, თანამშრომელთა მატერიალურ წახალისებას, პრემიებისა და ზეგანაკვეთური სამუშაოს, ასევე სხვა დამატებითი ანაზღაურების გაცემას;

ბ) რექტორის მივლინებას ქვეყნის ფარგლებს გარეთ. ამ შემთხვევაში რექტორის მიმართვაში უნდა ჩაიწეროს მივლინების მიზანი, ხანგრძლივობა, ინფორმაცია თანმხლების პირებისა და დაფინანსების შესახებ;

გ) რექტორის შვებულებას.

5. აკადემიას უფლება აქვს მისთვის გადაცემული სახელმწიფო საკუთრებაში არსებული ქონება კანონმდებლობით დადგენილი წესით გაასხვისოს ან გადასცეს სარგებლობის უფლებით.

6. აკადემიის მიერ ამ მუხლის მე-4 პუნქტის „ბ“ და „გ“ ქვეპუნქტებით გათვალისწინებულ ქმედებათა განსახორციელებლად აუცილებელია საქართველოს ფინანსთა სამინისტროს თანხმობა.

7. სააგენტო უფლებამოსილია შეაჩეროს ან გააუქმოს აკადემიის არამართლზომიერი გადაწყვეტილება.

8. აკადემია ვალდებულია საქართველოს კანონმდებლობით დადგენილი წესით აწარმოოს საფინანსო-ეკონომიკური საქმიანობის აღრიცხვა-ანგარიშგება, შეადგინოს ბალანსი და დასამტკიცებლად წარუდგინოს სააგენტოს.

9. საჯარო სამართლის იურიდიული პირის წლიურ ბალანსს ამოწმებს საჯარო სამართლის იურიდიული პირის – საზღვაო ტრანსპორტის სააგენტოს მიერ დანიშნული დამოუკიდებელი აუდიტორი.

თავი VIII. აკადემიის რეორგანიზაცია და ლიკვიდაცია

მუხლი 37. აკადემიის რეორგანიზაცია და ლიკვიდაცია

1. აკადემიის რეორგანიზაცია ან ლიკვიდაცია ხორციელდება „უმაღლესი განათლების შესახებ“ და „საჯარო სამართლის იურიდიული პირის შესახებ“ საქართველოს კანონებით გათვალისწინებული წესით.

2. აკადემიის რეორგანიზაციასა და ლიკვიდაციას, საქართველოს კანონმდებლობის შესაბამისად, ახორციელებს საქართველოს მთავრობა საქართველოს ეკონომიკისა და მდგრადი განვითარების სამინისტროს წარდგინებით.

თავი IX. წესდებაში ცვლილებებისა და დამატებების შეტანა

მუხლი 38. წესდებაში ცვლილებებისა და დამატებების შეტანის წესი

1. წინამდებარე წესდების ცვლილების პროექტს საქართველოს ეკონომიკისა და მდგრადი განვითარების სამინისტროს დასამტკიცებლად წარუდგენს რექტორი სააგენტოსთან შეთანხმებით.

2. წესდებაში ცვლილების ინიციირების უფლება აქვს რექტორს საკუთარი ან/და აკადემიური საბჭოსა და სენატის წარდგინებით.