საქართველოს პრეზიდენტის
ბრძანებულება №28
2012 წლის 11 იანვარი
ქ. თბილისი
„საჯარო სამართლის იურიდიული პირის - საქართველოს ტურიზმის ეროვნული სააგენტოს შექმნის შესახებ“ საქართველოს პრეზიდენტის 2010 წლის 17 აგვისტოს №646 ბრძანებულებაში ცვლილების შეტანის თაობაზე
1. „ნორმატიული აქტების შესახებ“ საქართველოს კანონის მე-20 მუხლის შესაბამისად, „საჯარო სამართლის იურიდიული პირის – საქართველოს ტურიზმის ეროვნული სააგენტოს შექმნის შესახებ“ საქართველოს პრეზიდენტის 2010 წლის 17 აგვისტოს №646 ბრძანებულებაში (სსმ III, 2010 წ., №100, მუხ. 1492) შეტანილ იქნეს შემდეგი ცვლილებები:
ა) ბრძანებულების სათაური ჩამოყალიბდეს შემდეგი რედაქციით:
„საჯარო სამართლის იურიდიული პირის – საქართველოს ტურიზმის ეროვნული ადმინისტრაციის შექმნის შესახებ“;
ბ) ბრძანებულების პირველი-მე-4 პუნქტები ჩამოყალიბდეს შემდეგი რედაქციით:
„1. „საჯარო სამართლის იურიდიული პირის შესახებ“ საქართველოს კანონის მე-5 მუხლის მე-2 პუნქტის „ბ“ ქვეპუნქტის შესაბამისად, შეიქმნას საჯარო სამართლის იურიდიული პირი – საქართველოს ტურიზმის ეროვნული ადმინისტრაცია (შემდეგში – ადმინისტრაცია).
2. საქართველოს ეკონომიკისა და მდგრადი განვითარების სამინისტრომ განახორციელოს ადმინისტრაციის სახელმწიფო კონტროლი.
3. საქართველოს ეკონომიკისა და მდგრადი განვითარების სამინისტრომ 1 თვეში უზრუნველყოს:
ა) ადმინისტრაციის დებულების დამტკიცება;
ბ) ადმინისტრაციის წარმომადგენლობაზე უფლებამოსილი პირის დანიშვნა.
4. ადმინისტრაცია არის საქართველოს ეკონომიკისა და მდგრადი განვითარების სამინისტროს სახელმწიფო საქვეუწყებო დაწესებულების – ტურიზმისა და კურორტების დეპარტამენტის უფლებამონაცვლე.“.
2. ეს ბრძანებულება ამოქმედდეს გამოქვეყნებისთანავე.
მ. სააკაშვილი