საქართველოს მთავრობის
დადგენილება № 69
2011 წლის 8 თებერვალი
ქ . თბილისი
„სამედიცინო-სოციალურ ექსპერტიზაზე კონტროლის 2011 წლის სახელმწიფო პროგრამის დამტკიცების შესახებ“ საქართველოს მთავრობის 2010 წლის 29 დეკემბრის №417 დადგენილებაში ცვლილების შეტანის თაობაზე
მუხლი 1. „ნორმატიული აქტების შესახებ“ საქართველოს კანონის მე-20 მუხლის მე-4 პუნქტის შესაბამისად „სამედიცინო-სოციალურ ექსპერტიზაზე კონტროლის 2011 წლის სახელმწიფო პროგრამის დამტკიცების შესახებ“ საქართველოს მთავრობის 2010 წლის 29 დეკემბრის №417 დადგენილებით (სსმ III, 2010 წელი, №172) დამტკიცებულ „სამედიცინო-სოციალურ ექსპერტიზაზე კონტროლის 2011 წლის სახელმწიფო პროგრამაში“ შეტანილ იქნეს ცვლილება და მე-2 მუხლი ჩამოყალიბდეს შემდეგი რედაქციით:
„მუხლი 2. პროგრამით განსახორციელებელი ღონისძიებები
1. პროგრამის ფარგლებში განხორციელდება სამედიცინო-სოციალური ექსპერტიზის ჩატარებაზე უფლებამოსილი დაწესებულების მიერ არასწორად გაცემული დასკვნის გამოსავლენად სამედიცინო გადამოწმების მიზნით შეზღუდული შესაძლებლობის მქონე პირის გამოკვლევა პროგრამის მე-4 მუხლის „ბ“ ქვეპუნქტით განსაზღვრული მიმწოდებლის მიერ. ამასთან, სამედიცინო დიაგნოზის გადამოწმების მიზნით პირის გამოკვლევა დაუშვებელია იმავე სამედიცინო დაწესებულების მიერ, რომელმაც ამ პირს მიანიჭა შეზღუდული შესაძლებლობის მქონე პირის სტატუსი.
2. პროგრამა ასევე მოიცავს „სამედიცინო-სოციალურ ექსპერტიზაზე 2010 წლის სახელმწიფო პროგრამის“ ფარგლებში პროგრამით გათვალისწინებული მომსახურების მიმწოდებლებისათვის 2010 წლის დეკემბრის განმავლობაში შესრულებული სამუშაოს აუნაზღაურებელი ნაწილის გადახდას.“.
მუხლი 2. დადგენილება ამოქმედდეს გამოქვეყნებისთანავე.
პრემიერ-მინისტრი ნ . გილაური