საქართველოს პრეზიდენტის
ბრძანებულება №528
1999 წლის 6 სექტემბერი
ქ. თბილისი
საქართველოს განათლების სამინისტროს სისტემაში მიუსაფარ ბავშვთა სარეაბილიტაციო ცენტრის – „მომავლის სახლის“ შექმნისა და „საქართველოს განათლების სამინისტროს დებულების დამტკიცების შესახებ “ საქართველოს პრეზიდენტის 1998 წლის 30 აპრილის №281 ბრძანებულებაში ცვლილების შეტანის თაობაზე
მიუსაფარ ბავშვთა სოციალური რეაბილიტაციისა და ადაპტაციის, ცხოვრების, განათლების და განვითარების ნორმალური პირობებისა და მათთვის პირველადი სამედიცინო დახმარების აღმოჩენის მიზნით:
1. საქართველოს განათლების სამინისტროს სისტემაში შეიქმნას განათლების სამინისტროს ბიუჯეტზე მყოფი ახალი ტიპის დაწესებულება – მიუსაფარ ბავშვთა სარეაბილიტაციო ცენტრი – „მომავლის სახლი“.
2. შეტანილ იქნეს ცვლილება საქართველოს პრეზიდენტის 1998 წლის 30 აპრილის №281 ბრძანებულებით დამტკიცებულ საქართველოს განათლების სამინისტროს დებულებაში და ამ დებულების V თავში სკოლისგარეშე დაწესებულებების ჩამონათვალს დაემატოს სიტყვები: „მიუსაფარ ბავშვთა სარეაბილიტაციო ცენტრი – „მომავლის სახლი“.
3. საქართველოს განათლების სამინისტრომ (ა. კარტოზია) ორ კვირაში უზრუნველყოს მიუსაფარ ბავშვთა სარეაბილიტაციო ცენტრის – „მომავლის სახლის“ დებულების დამტკიცება.
4. ცნობად იქნეს მიღებული, რომ ცენტრის დაფინანსება გათვალისწინებულია საქართველოს 1999 წლის სახელმწიფო ბიუჯეტით საქართველოს განათლების სამინისტროს მიუსაფარ ბავშვთა ფსიქოლოგიური რეაბილიტაციისა და სოციალური ადაპტაციის პროგრამა „მომავლის სახლისთვის“ გათვალისწინებულ ასიგნებათა ფარგლებში.
5. საქართველოს ფინანსთა სამინისტრომ (დ. ონოფრიშვილი) მომავალი წლის სახელმწიფო ბიუჯეტში უზრუნველყოს მიუსაფარ ბავშვთა სარეაბილიტაციო ცენტრის – „მომავლის სახლის“ დაფინანსება.
ე. შევარდნაძე