სახელმწიფო სარეგისტრაციო კოდი 040.030.000.22.024.011.742
საქართველოს ეკონომიკური განვითარების
მინისტრის ბრძანება №1-1/524
2008 წლის 11 აპრილი
ქ. თბილისი
„საჯარო სამართლის იურიდიული პირის – საქართველოს სახელმწიფო უზრუნველყოფის სააგენტოს წესდების დამტკიცების შესახებ“ საქართველოს ეკონომიკური განვითარების მინისტრის 2007 წლის 11 იანვრის №1-1/34 ბრძანებაში ცვლილებისა და დამატების შეტანის თაობაზე
„ნორმატიული აქტების შესახებ“ საქართველოს კანონის 36-ე მუხლისა და „საჯარო სამართლის იურიდიული პირის შესახებ“ საქართველოს კანონის შესაბამისად, ვბრძანებ:
მუხლი 1.
საქართველოს ეკონომიკური განვითარების მინისტრის 2007 წლის 11 იანვრის №1-1/34 ბრძანებით (სსმ III, 16.01.2007წ., №6, მუხ. 45) დამტკიცებული საჯარო სამართლის იურიდიული პირის – საქართველოს სახელმწიფო უზრუნველყოფის სააგენტოს წესდებაში შევიდეს შემდეგი სახის ცვლილება და დამატება:
1. მე-2 მუხლის „ბ“ ქვეპუნქტი ჩამოყალიბდეს შემდეგი რედაქციით:
„ბ. გადაცემული ქონების მშენებლობა, აღჭურვა, ექსპლუატაცია, მოვლა-პატრონობა, კეთილმოწყობა, რეკონსტრუქცია, მიმდინარე და კაპიტალური რემონტების ჩატარება;“.
2. მე-2 მუხლს დაემატოს „ვ“ ქვეპუნქტი შემდეგი რედაქციით:
„ვ, სახელმწიფო კონტროლის განმახორციელებელი ორგანოსა და/ან საქართველოს პრეზიდენტის ადმინისტრაციის დავალებით სახელმწიფო ორგანოთა საქმიანობასთან დაკავშირებული ობიექტების აღჭურვა, კეთილმოწყობა, მიმდინარე და კაპიტალური რემონტების ჩატარება და სერვისული მომსახურება.“.
მუხლი 2.
ბრძანება ძალაში შევიდეს გამოქვეყნებისთანავე.
ე. შარაშიძე