,,საქართველოს გარემოს დაცვისა და ბუნებრივი რესურსების სამინისტროს საზოგადოებასთან ურთიერთობის სამსახურის დებულების დამტკიცების თაობაზე“

,,საქართველოს გარემოს დაცვისა და ბუნებრივი რესურსების სამინისტროს საზოგადოებასთან ურთიერთობის სამსახურის დებულების დამტკიცების თაობაზე“

სახელმწიფო სარეგისტრაციო კოდი 360.160.000.22.023.011.431

საქართველოს გარემოს დაცვისა და ბუნებრივი რესურსების

მინისტრის ბრძანება №41

2008 წლის 18 იანვარი

ქ. თბილისი

საქართველოს გარემოს დაცვისა და ბუნებრივი რესურსების სამინისტროს საზოგადოებასთან ურთიერთობის სამსახურის დებულების დამტკიცების თაობაზე

„საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-18 მუხლის მე-2 პუნქტისა და „საქართველოს გარემოს დაცვისა და ბუნებრივი რესურსების სამინისტროს დებულების დამტკიცების შესახებ“ საქართველოს მთავრობის 2004 წლის 12 ივნისის №50 დადგენილების მე-5 მუხლის, მე-2 პუნქტის, „ბ“ ქვეპუნქტისა და მე-8 მუხლის პირველი პუნქტის „კ“ ქვეპუნქტის საფუძველზე, ვბრძანებ:

1. დამტკიცდეს თანდართული „საქართველოს გარემოს დაცვისა და ბუნებრივი რესურსების სამინის-ტროს საზოგადოებასთან ურთიერთობის სამსახურის დებულება“.

2. ძალადაკარგულად გამოცხადდეს საქართველოს გარემოს დაცვისა და ბუნებრივი რესურსების მინისტრის 2006 წლის 7 ივნისის №443 ბრძანება „საქართველოს გარემოს დაცვისა და ბუნებრივი რესურსების სამინისტროს საზოგადოებასა და მასმედიასთან ურთიერთობის სამსახურის დებულების დამტკიცების თაობაზე“.

3. ეს ბრძანება ძალაში შევიდეს გამოქვეყნებისთანავე.

    დ. ჩანტლაძე

    შეტანილი ცვლილებები:

1. ძალადაკარგულია -  საქართველოს გარემოს დაცვის მინისტრის 2011 წლის 25 მაისის ბრძანება №18 - ვებგვერდი, 02.06.2011 წ.

საქართველოს გარემოს დაცვისა და ბუნებრივი რესურსების სამინისტროს საზოგადოებასთან ურთიერთობის სამსახურის

დ ე ბ უ ლ ე ბ ა

თავი I

ზოგადი დებულებანი

    მუხლი 1

საქართველოს გარემოს დაცვისა და ბუნებრივი რესურსების სამინისტროს (შემდგომში – სამინისტრო) საზოგადოებასთან ურთიერთობის სამსახური (შემდგომში – სამსახური) წარმოადგენს სამინისტროს სტრუქტურულ ქვედანაყოფს.

    მუხლი 2

სამსახური თავის საქმიანობაში ხელმძღვანელობს საქართველოს კონსტიტუციით, საერთაშორისო ხელშეკრულებებით, საქართველოს კანონებით, სამინისტროს დებულებით, საქართველოს გარემოს დაცვისა და ბუნებრივი რესურსების მინისტრის (შემდგომში – მინისტრის) ბრძანებებით, წინამდებარე დებულებით და სხვა საკანონმდებლო და კანონქვემდებარე ნორმატიული აქტებით.

    მუხლი 3

სამსახური ანგარიშვალდებულია მინისტრის წინაშე.

    მუხლი 4

სამსახურის დებულება, სტრუქტურა და საშტატო განრიგი მტკიცდება მინისტრის ბრძანებით.

თავი II

სამსახურის ფუნქციები, ამოცანები და უფლებამოსილებანი

    მუხლი 5

თავისი კომპეტენციის ფარგლებში სამსახურის საქმიანობის სფეროს განეკუთვნება:

ა) საზოგადოებასთან და მასმედიასთან ურთიერთობა;

ბ) საზოგადოებისათვის გარემოსდაცვითი ინფორმაციის ხელმისაწვდომობისა და გამჭირვალობის უზრუნველყოფა;

გ) საზოგადოების გარემოსადაცვითი განათლებისა და გარემოსდაცვითი ცნობიერების დონის ამაღლების ხელშეწყობა;

დ) საზოგადოების მონაწილეობის უზრუნველყოფა გარემოსდაცვითი გადაწყვეტილებების მიღების პროცესში და გარემოს დაცვის სფეროში საზოგადოების მხარდაჭერის გაძლიერება;

ე) სამინისტროსა და საზოგადოებას შორის ორმხრივი ურთიერთობის დამყარება;

ვ) საზოგადოების ინფორმირება სამინისტროს საქმიანობის შესახებ, საზოგადოების გარემოსადაცვითი განათლებისა და გარემოსდაცვითი ცნობიერების დონის ამაღლების ხელშეწყობა;

ზ) სამინისტროს საქმიანობაზე ინფორმაციის გავრცელება და აუცილებლობის შემთხვევაში საინფორმაციო საშუალებებისათვის ოფიციალური შეტყობინებების, განცხადებებისა და საინფორმაციო (ჟურნალისტური) მასალების გავრცელება;

თ) მასობრივი ინფორმაციის საშუალებებით გასული უახლესი გარემოსდაცვითი ინფორმაციის მოპოვება, მისი სისწორის განსაზღვრა და სამინისტროს პოზიციის დაფიქსირება და საჭიროების შემთხვევაში ახსნა-განმარტების ან ურმყოფელი პასუხის მომზადება;

ი) კანონმდებლობის შესაბამისად აკრედიტაციის ჩატარება და ინფორმაციული ხელშეწყობა ჟურნალისტებისათვის, რომლებიც ასრულებენ რედაქციის დავალებას და გააშუქებენ სამინისტროს საქმიანობას;

კ) სამინისტროს საქმიანობაში და გარემოსდაცვით სფეროში მიმდინარე პროცესებზე პრეს-კონფერენციების, ბრიფინგების, ჟურნალისტებთან შეხვედრების ორგანიზება და პრეს-ბიულეტენების, პრეს-რელიზების, მიმოხილვების მომზადება;

ლ) სამინისტროს საქმიანობის შესახებ მასმედიის საშუალებებით გასული ინფორმაციის მიწოდება ხელმძღვანელობისა და თანამშრომლებისათვის;

მ) სამინისტროს შიდა პოლიტიკის შემუშავების პროცესში თანამშრომლების მონაწილეობის მიზნით გამოკითხვის ორგანიზება და ხელმძღვანელობისათვის ანალიზის მიწოდება;

ნ) სამინისტროსა და საზოგადოებას შორის საერთო ინტერესებისა და შეხედულებების გამოსავლენად და გადაწყვეტილების მიღების პროცესში საზოგადოების მონაწილეობის მიზნით საზოგადოებრივ ორგანიზაციებთან შეხვედრების ორგანიზება;

ო) პრობლემატურ საკითხებზე სადისკუსიო კლუბის ორგანიზება სახელმწიფო სრტუქტურების, საზოგადოებრივი ორგანიზაციების, მასმედიის საშუალებებისა და სხვა დაინტერესებული პირების მონაწილეობით;

პ) მდგრადი განვითარების ფარგლებში გაეროს ევროპის ეკონომიკური კომისიის მიერ შემუშავებული გარემოსდაცვითი განათლების სტრატეგიის მიზნებისა და ამოცანების განხორციელება;

ჟ) სამინისტროს ბიბლიოთეკის შექმნა.

    მუხლი 6

დაკისრებული ფუნქციების და ამოცანების შესრულებისას სამსახური თავისი კომპეტენციის ფარგლებში უფლებამოსილია:

ა) სამინისტროს სტრუქტურული ერთეულებისაგან შეუფერხებლად მიიღოს ნებისმიერი ინფორმაცია სამსახურის კომპეტენციაში შემავალ საკითხებზე;

ბ) ითანამშრომლოს აღმასრულებელი ხელისუფლების სხვადასხვა უწყებებთან, დაწესებულებებთან და ორგანიზაციებთან, გარემოსა და ბუნებრივი რესურსების დაცვის სფეროში მათ მიერ გაწეული სამუშაოს შესახებ ინფორმაციის მოპოვების მიზნით.

თავი III

სამსახურის მართვა

    მუხლი 7

სამსახურს ხელმძღვანელობს სამსახურის უფროსი, რომელსაც კანონმდებლობით დადგენილი წესით თანამდებობაზე ნიშნავს და თანამდებობიდან ათავისუფლებს მინისტრი.

    მუხლი 8.

სამსახურის უფროსი ანგარიშვალდებულია მინისტრის წინაშე.

    მუხლი 9

სამსახურის უფროსი:

ა) ხელმძღვანელობს და წარმართავს სამსახურის საქმიანობას;

ბ) წარმოადგენს სამსახურს დაკისრებული უფლება-მოვალეობების განხორციელებისას;

გ) ზედამხედველობს სამსახურის მოხელეების მიერ თავიანთი სამსახურებრივი მოვალეობების ჯე-როვან შესრულებას, ახორციელებს მათ მიერ სამინისტროს შინაგანაწესის შესრულების კონტროლს;

დ) თავისი კომპეტენციის ფარგლებში, ხელს აწერს სამსახურში მომზადებულ დოკუმენტებს და ვიზას ადებს სამინისტროს სტრუქტურული ქვედანაყოფებისა და სამინისტროს სისტემაში შემავალი სახელმწიფო საქვეუწყებო დაწესებულებების მიერ შემუშავებულ სამართლებრივი აქტების პროექტებს;

ე) წელიწადში ერთხელ მინისტრს წარუდგენს ანგარიშს სამსახურის მიერ გაწეული საქმიანობის შესახებ;

ვ) უზრუნველყოფს ამ დებულებით სამსახურისათვის დაკისრებული ფუნქციების შესრულების ორგანიზებას, რისთვისაც წარუდგენს მინისტრს წინადადებებს ცალკეული საკითხების მოწესრიგებისა და გადაწყვეტის თვალსაზრისით;

ზ) წარუდგენს სამინისტროს ხელმძღვანელობას წინადადებებს სამსახურის შიდა სტრუქტურის, შტატების, მუშაობის ორგანიზაციის, სამსახურის მოხელეების წახალისების ან მათთვის დისციპლინური პასუხიმგებლობის დაკისრების შესახებ;

თ) შუამდგომლობს იმ სახსრების, მოწყობილობებისა და ინვენტარის გამოყოფაზე, რაც აუცილებე-ლია სამსახურის წინაშე მდგარი ფუნქციებისა და ამოცანების შესასრულებლად;

ი) სამსახურის სახელით ამზადებს დასკვნებს;

კ) შუამდგომლობს სამსახურის მოხელეთა კვალიფიკაციის ამაღლებისა და გადამზადების თაობაზე;

ლ) ახორციელებს ამ დებულებით, მინისტრის სამართლებრივი აქტებითა და კანონმდებლობით გან-საზღვრულ ფუნქციებსა და დავალებებს;

მ) სამსახურის უფროსის არყოფნის შემთხვევაში მის მოვალეობას ასრულებს სამსახურის მთავარი სპეციალისტი.

თავი IV

დასკვნითი დებულებანი

    მუხლი 10

სამსახურის დებულების გაუქმება, მასში ცვლილებებისა და დამატებების შეტანა ხდება მინისტრის ბრძანებით.