სახელმწიფო სარეგისტრაციო კოდი 200.020.000.22.033.010.331
საქართველოს ფინანსთა
მინისტრის ბრძანება №477
2007 წლის 11 მაისი
ქ. თბილისი
,,საქართველოს ფინანსთა სამინისტროს საგადასახადო დეპარტამენტის საგადასახადო ორგანოების შექმნის, მათი სამოქმედო ტერიტორიისა და უფლებამოსილების განსაზღვრის შესახებ“ საქართველოს ფინანსთა მინისტრის 2004 წლის 23 აგვისტოს №550 ბრძანებაში ცვლილებების შეტანის თაობაზე
,,ნორმატიული აქტების შესახებ“ საქართველოს კანონის 36-ე მუხლის და ,,საქართველოს ფინანსთა სამინისტროს შემოსავლების სამსახურის შესახებ“ საქართველოს კანონის 22-ე მუხლის მე-4 პუნქტის შესაბამისად, ვბრძანებ:
1. ,,საქართველოს ფინანსთა სამინისტროს საგადასახადო დეპარტამენტის საგადასახადო ორგანოების შექმნის, მათი სამოქმედო ტერიტორიისა და უფლება-მოსილების განსაზღვრის შესახებ“ საქართველოს ფინანსთა მინისტრის 2004 წლის 23 აგვისტოს №550 ბრძანებაში (სსმ III, 25.08.04, №91, მუხ. 785) შეტანილ იქნეს შემდეგი ცვლილებები:
ა) ბრძანების სათაური ჩამოყალიბდეს შემდეგი რედაქციით:
,,საქართველოს ფინანსთა სამინისტროს შემოსავლების სამსახურის საგადასახადო ორგანოების შექმნის, მათი სამოქმედო ტერიტორიისა და უფლებამოსილების განსაზღვრის შესახებ“;
ბ) პრეამბულა ჩამოყალიბდეს შემდეგი რედაციით:
,,საქართველოს საგადასახადო კოდექსის 49-ე მუხლისა და ,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის 26-ე მუხლის შესაბამისად, ვბრძანებ:“;
გ) პირველი და მე-2 პუნქტები ჩამოყალიბდეს შემდეგი რედაქციით:
,,1. საქართველოს ფინანსთა სამინისტროს სახელმწიფო საქვეუწყებო დაწესებულება – შემოსავლების სამსახურის გამგებლობაში შეიქმნას შემდეგი საგადასახადო ორგანოები:
ა) ქ. თბილისის საგადასახადო ინსპექცია,
ბ) ბათუმის საგადასახადო ინსპექცია;
გ) რუსთავის საგადასახადო ინსპექცია;
დ) ქუთაისის საგადასახადო ინსპექცია;
ე) ფოთის საგადასახადო ინსპექცია;
ვ) გორის საგადასახადო ინსპექცია;
ზ) თელავის საგადასახადო ინსპექცია;
თ) ახალციხის საგადასახადო ინსპექცია.
2. ბრძანების პირველ პუნქტში მითითებული საგადასახადო ინსპექციების სამოქმედო ადმინისტრაციულ-ტერიტორიული ერთეულები განისაზღვრება საქართველოს ფინანსთა მინისტრის ინდივიდუალური ადმინისტრაციულ-სამართლებრივი აქტებით.“;
დ) მე-4 პუნქტი ჩამოყალიბდეს შემდეგი რედაქციით:
,,4. შემოსავლების სამსახურის აქციზის და მსხვილ გადამხდელთა საგადასახადო ინსპექციების, აგრეთვე აფხაზეთის საგადასახადო ინსპექციის შექმნის წესი და დებულებები განისაზღვრება და მტკიცდება საქართველოს ფინანსთა მინისტრის ნორმატიული აქტებით.“.
2. ბრძანება ამოქმედდეს გამოქვეყნებისთანავე.
ა. ალექსიშვილი