საქართველოს მთავრობის
დადგენილება №47
2010 წლის 19 თებერვალი
ქ. თბილისი
საქართველოში წყალბურთის განვითარების მხარდაჭერის სახელმწიფო პროგრამის შესახებ
მუხლი 1. „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-5 მუხლის „ე“ პუნქტის საფუძველზე დამტკიცდეს საქართველოში წყალბურთის განვითარების მხარდაჭერის თანდართული სახელმწიფო პროგრამა.
მუხლი 2. საქართველოს სპორტისა და ახალგაზრდობის საქმეთა სამინისტრომ საქართველოს ეროვნულ ოლიმპიურ კომიტეტთან ერთად უზრუნველყოს შესაბამისი ღონისძიებების განხორციელება ამ დადგენილებით დამტკიცებული სახელმწიფო პროგრამის დროულად და შეუფერხებლად შესრულების მიზნით.
საქართველოს მთავრობის 2011 წლის 8 თებერვლის დადგენილება №67 - ვებგვერდი, 15.02.2011წ.
მუხლი 3. ქ. თბილისში, ჩოლოყაშვილის ქუჩაზე მდებარე შპს „მონიოს“ კუთვნილი საცურაო აუზის სამშენებლო-სარეაბილიტაციო სამუშაოების განსახორციელებლად შპს „მონიოსათვის“ შესაბამისი სესხის გაცემის მიზნით, საქართველოს ფინანსთა სამინისტრომ უზრუნველყოს საქართველოს მთავრობის განკარგულების პროექტის მომზადება „საქართველოს 2010 წლის სახელმწიფო ბიუჯეტის შესახებ“ საქართველოს კანონით გათვალისწინებული საქართველოს მთავრობის სარეზერვო ფონდიდან საქართველოს კულტურის, ძეგლთა დაცვისა და სპორტის სამინისტროსათვის 1350000 (ერთი მილიონ სამას ორმოცდაათი ათასი) ლარის გამოყოფის თაობაზე.
მუხლი 4. ამ დადგენილებით დამტკიცებული სახელმწიფო პროგრამის ფარგლებში 2010 წელს განსახორციელებელი ღონისძიებების დაფინანსების მიზნით (დანართის შესაბამისად) საქართველოს კულტურის, ძეგლთა დაცვისა და სპორტის სამინისტროს სახელმწიფო საქვეუწყებო დაწესებულებამ – სპორტისა და ახალგაზრდობის საქმეთა დეპარტამენტმა საქართველოს ეროვნულ ოლიმპიურ კომიტეტთან შეთანხმებით უზრუნველყოს 1400000 (ერთი მილიონ ოთხასი ათასი) ლარის სუბსიდირების გზით განაწილება „საქართველოს 2010 წლის სახელმწიფო ბიუჯეტის შესახებ“ საქართველოს კანონით საქართველოს კულტურის, ძეგლთა დაცვისა და სპორტის სამინისტროს სახელმწიფო საქვეუწყებო დაწესებულების – სპორტისა და ახალგაზრდობის საქმეთა დეპარტამენტისათვის განსაზღვრული ასიგნებებიდან.
მუხლი 41. საქართველოს სპორტისა და ახალგაზრდობის საქმეთა სამინისტრომ საქართველოს ეროვნულ ოლიმპიურ კომიტეტთან შეთანხმებით უზრუნველყოს ამ დადგენილებით დამტკიცებული პროგრამის ფარგლებში 2011 წელს განსახორციელებელი ღონისძიებების დაფინანსება (დანართის შესაბამისად) „საქართველოს 2011 წლის სახელმწიფო ბიუჯეტის შესახებ“ საქართველოს კანონით საქართველოს სპორტისა და ახალგაზრდობის საქმეთა სამინისტროსათვის განსაზღვრული ასიგნებებიდან.
საქართველოს მთავრობის 2011 წლის 8 თებერვლის დადგენილება №67 - ვებგვერდი, 15.02.2011წ.
მუხლი 5. ეთხოვოთ ადგილობრივი თვითმმართველობის ორგანოებს, უზრუნველყონ მათ საკუთრებაში არსებული წყალბურთისათვის საჭირო ინფრასტრუქტურის აღდგენა-რეაბილიტაცია, საქართველოს სპორტის საწყლოსნო სახეობათა ეროვნულ ფედერაციასთან ერთად რეგიონებში სპეციალიზებული წყალბურთის სექციების ჩამოყალიბება და მათი ფინანსური მხარდაჭერა.
მუხლი 6. დადგენილება ამოქმედდეს გამოქვეყნებისთანავე.
პრემიერ-მინისტრი ნ. გილაური
შეტანილი ცვლილებები:
1. საქართველოს მთავრობის 2011 წლის 8 თებერვლის დადგენილება №67 - ვებგვერდი, 15.02.2011წ.
საქართველოში წყალბურთის განვითარების მხარდაჭერის სახელმწიფო
პ რ ო გ რ ა მ ა
მუხლი 1. სახელმწიფო პროგრამის მიზანი
1. საქართველოში წყალბურთის საკლუბო ინფრასტრუქტურის ჩამოყალიბება და კლუბების ფინანსური მდგრადობა.
2. წყალბურთისათვის მატერიალურ-ტექნიკური ბაზის აღდგენა, შეკეთება და საერთაშორისო ბაზების მშენებლობა.
3. საქართველოს მუნიციპალიტეტებსა და ქალაქებში წყალბურთის კერების აღდგენა და მათი შემდგომი ფუნქციონირების უზრუნველყოფა.
4. მაღალი დონის წყალბურთის ჩემპიონატების გამართვის უზრუნველყოფა.
5. წყალბურთში ასაკობრივი ჯგუფების შექმნა და მაღალი დონის საშეჯიბრო ღონისძიებების გამართვის უზრუნველყოფა.
6. სასწავლო-საწვრთნელი პროცესისათვის ნაკრები გუნდების წინასაშეჯიბრო შეკრებების უზრუნველყოფა და აღნიშნულისათვის ოლიმპიური ბაზისის შექმნა.
7. წყალბურთში დასაქმებულ მწვრთნელ-პედაგოგთა და წყალბურთის პროცესის სხვა მონაწილეთა კვალიფიკაციის ამაღლების უზრუნველყოფა.
8. ეროვნული და სხვადასხვა ასაკობრივი ნაკრები გუნდების ფინანსური და მატერიალურ-ტექნიკური უზრუნველყოფა.
9. ლონდონის 2012 წლის ოლიმპიური თამაშებისათვის ლიცენზიის მოპოვება.
10. ევროპისა და მსოფლიო ჩემპიონატებსა და საერთაშორისო შეჯიბრებებში ეროვნული და სხვადასხვა ასაკობრივი ნაკრები გუნდების მონაწილეობა.
11. ევროპის საკლუბო ტურნირებში მონაწილეობა.
მუხლი 2. სახელმწიფო პროგრამის ამოცანები და განხორციელების მექანიზმი
1. წყალბურთში სრულყოფილი სასწავლო-საწვრთნელი ვარჯიშისათვის:
ა) აუზების აღდგენა: I ეტაპზე – თბილისი, რუსთავი, ქუთაისი; II ეტაპზე – გორი, თელავი, ხობი, ტყიბული, სამტრედია, ზუგდიდი;
ბ) ახალი აუზების მშენებლობა: I ეტაპი – ბათუმი; II ეტაპი – ქუთაისი, ფოთი.
2. აუზების აღდგენის საფუძველზე შესაბამისი სპეციალიზებული წყალბურთის სექციების ჩამოყალიბება.
3. წყალბურთის მწვრთნელთა, მსაჯთა, მენეჯერთა და ამ სფეროში მონაწილე სხვა მუშაკთა კვალიფიკაციის ამაღლების მიზნით პროფესიული მომზადებისა და გადამზადების ცენტრის მოწყობა საჭირო ინფრასტრუქტურით ქ. თბილისში (ილიას სახელმწიფო უნივერსიტეტთან ერთად).
4. სახელმწიფო პროგრამის ფარგლებში საქართველოს სპორტისა და ახალგაზრდობის საქმეთა სამინისტრო შუამდგომლობს ადგილობრივ თვითმმართველ ერთეულებთან წყალბურთისათვის საჭირო ინფრასტრუქტურის მოწყობის მიზნით და მათ საკუთრებაში არსებულ აუზებში საქართველოს ჩემპიონატის გამართვის უზრუნველსაყოფად.
5. საქართველოს ჩემპიონატის გამართვა 4 ასაკობრივ ჯგუფში (ძირითადი და 1991-92, 1993-94, 1995-96 წლებში დაბადებულ ახალგაზრდებს შორის).
6. წყალბურთის სპორტული კლუბების აღდგენა თბილისში, ქუთაისში, ბათუმსა და რუსთავში (შემდგომ ეტაპზე – სხვა ქალაქებსა და მუნიციპალიტეტებში) და მათი საქართველოს ჩემპიონატში მონაწილეობის უზრუნველყოფა.
7. უცხო ქვეყნების სპეციალისტების ჩამოყვანა წყალბურთის საქმიანობის კოორდინაციის მიზნით.
საქართველოს მთავრობის 2011 წლის 8 თებერვლის დადგენილება №67 - ვებგვერდი, 15.02.2011წ.
დანართი
საქართველოს სპორტისა და ახალგაზრდობის საქმეთა სამინისტროს მიერ საქართველოს ეროვნულ ოლიმპიურ კომიტეტთან შეთანხმებით 2011 წელს დასაფინანსებელ ღონისძიებათა ნუსხა
|
1 | ეროვნული და ასაკობრივი ნაკრებების მონაწილეობა საერთაშორისო შეჯიბრებებში (ევროპის ჩემპიონატი და საერთაშორისო ტურნირები) |
| 2 | ეროვნული და ასაკობრივი ნაკრებებისათვის სასწავლო-საწვრთნელი შეკრებების მოწყობა |
| 3 | საქართველოში სხვადასხვა საერთაშორისო ტურნირების ორგანიზება |
| 4 | ეროვნული და ასაკობრივი ნაკრებებისათვის აუზის იჯარა |
|
5 | საქართველოს ეროვნული შეჯიბრებების ჩატარება (ეროვნული ჩემპიონატი, ასაკობრივი პირველობები და თასი) |
|
6 | ეროვნული და ასაკობრივი ნაკრებების მწვრთნელების, მენეჯერებისა და საექიმო პერსონალის შრომის ანაზღაურება |
|
7 | ეროვნული და ასაკობრივი ნაკრებების წევრებისა და მწვრთნელებისათვის საცხოვრებელი ბინის ქირის ანაზღაურება |
|
8 | ეროვნული შეჯიბრებების მომსახურე მსაჯთა პერსონალის შრომის ანაზღაურება, ეროვნულ შეჯიბრებებზე უცხოელი მსაჯების მოწვევის უზრუნველყოფა, ქართველი მსაჯების საერთაშორისო მსაჯთა სკოლაში გაგზავნისა და მათი სერტიფიცირების ხარჯების ანაზღაურება |
|
9 | ქართველ მწვრთნელთათვის საზღვარგარეთ კვალიფიკაციის ასამაღლებლად შესაბამისი ხარჯების ანაზღაურება |
| 10 | უცხოელი სპეციალისტების მიერ საქართველოში სემინარებისა და პრაქტიკული მეცადინეობების ხარჯების (მგზავრობის, ცხოვრებისა და ჰონორარის ჩათვლით) ანაზღაურება |
|
11 | ეროვნული და ასაკობრივი ნაკრებებისათვის საჭირო ინვენტარის, მოწყობილობებისა და ეკიპირების შეძენის და მასთან დაკავშირებული სხვა ხარჯების ანაზღაურება |
|
12 | ეროვნული და ასაკობრივი ნაკრებებისათვის საჭირო მედიკამენტების შეძენისა და სამედიცინო შემოწმება-დისპანსერიზაციის (წლის განმავლობაში ორჯერ თითოეული ნაკრები გუნდისათვის) ხარჯების ანაზღაურება |
|
13 | საქართველოს სპორტის საწყალოსნო სახეობათა ეროვნული ფედერაციის წარმომადგენელთა საერთაშორისო ფედერაციების (ევროპის – LEN და მსოფლიოს – FINA) კონგრესებზე დასასწრებად ყველა საჭირო ხარჯის ანაზღაურება |
საქართველოს მთავრობის 2011 წლის 8 თებერვლის დადგენილება №67 - ვებგვერდი, 15.02.2011წ.