საქართველოს მთავრობის
დადგენილება №130
2009 წლის 24 ივლისი
ქ. თბილისი
„პროგრამა „ცოდნის კარის“ ფარგლებში გამოყოფილი ასიგნებებიდან ზოგიერთი ღონისძიების დაფინანსების წესისა და პირობების შესახებ“ საქართველოს მთავრობის 2009 წლის 26 თებერვლის №36 დადგენილებაში ცვლილებების შეტანის თაობაზე
მუხლი 1. „ნორმატიული აქტების შესახებ“ საქართველოს კანონის 36-ე მუხლის შესაბამისად, „პროგრამა „ცოდნის კარის“ ფარგლებში გამოყოფილი ასიგნებებიდან ზოგიერთი ღონისძიების დაფინანსების წესისა და პირობების შესახებ“ საქართველოს მთავრობის 2009 წლის 26 თებერვლის №36 დადგენილებაში (სსმ III, 2009 წელი, №22, მუხლი 289) შეტანილ იქნეს ცვლილებები და მე-2 და მე-3 პუნქტები ჩამოყალიბდეს შემდეგი რედაქციით:
„2. საქართველოს განათლებისა და მეცნიერების სამინისტრომ პროგრამა „ცოდნის კარის” ფარგლებში გათვალისწინებული ასიგნებებიდან არა უმეტეს 6 000 000 (ექვსი მილიონი) ლარისა გადაურიცხოს საქართველოს პრეზიდენტთან არსებულ საჯარო სამართლის იურიდიულ პირს – განვითარებისა და რეფორმების ფონდს (შემდგომში – ფონდი) მისი მოთხოვნის შესაბამისად.
3. ფონდმა პროგრამა „ცოდნის კარი“ განახორციელოს თანდართული წესისა და პირობების შესაბამისად და უზრუნველყოს პროგრამის თაობაზე საზოგადოების ინფორმირება. ფონდისათვის გამოყოფილი თანხის არა უმეტეს 5 პროცენტისა შესაძლებელია გაიხარჯოს პროგრამის განხორციელებისათვის საჭირო ღონისძიებათა დასაფინანსებლად.“.
მუხლი 2. დადგენილება ამოქმედდეს გამოქვეყნებისთანავე.
პრემიერ-მინისტრი ნ. გილაური