საქართველოს პრეზიდენტის
ბრძანებულება №328
2003 წლის 2 ივლისი
ქ. თბილისი
„საქართველოს იუსტიციის სამინისტროს დებულების შესახებ“ საქართველოს პრეზიდენტის 2001 წლის 31 დეკემბრის №544 ბრძანებულებაში ცვლილებისა და დამატებების შეტანის თაობაზე
„არასაპატიმრო სასჯელთა აღსრულების წესისა და პრობაციის შესახებ“ საქართველოს კანონში ცვლილებებისა და დამატებების შეტანის თაობაზე“ 2003 წლის 7 მაისის საქართველოს კანონის შესრულების უზრუნველსაყოფად „საქართველოს იუსტიციის სამინისტროს დებულების შესახებ“ საქართველოს პრეზიდენტის 2001 წლის 31 დეკემბრის №544 ბრძანებულებით (საქართველოს საკანონმდებლო მაცნე, 2001 წლის 31 დეკემბერი, №138, მუხლი №993) დამტკიცებულ საქართველოს იუსტიციის სამინისტროს დებულებაში (შემდგომში _ დებულება) შეტანილ იქნეს შემდეგი ცვლილება და დამატებები:
1. დებულების მე-12 მუხლის პირველ პუნქტს დაემატოს შემდეგი შინაარსის „ს“ ქვეპუნქტი:
„ს) არასაპატიმრო სასჯელთა აღსრულებისა და პრობაციის დეპარტამენტი“.
2. დებულების მე-12 მუხლის მე-2 პუნქტს დაემატოს შემდეგი შინაარსის „ე“ ქვეპუნქტი:
„ე) არასაპატიმრო სასჯელთა აღსრულებისა და პრობაციის ბიუროები“.
3. ამოღებულ იქნეს დებულების 23-ე მუხლის „გ“ ქვეპუნქტი.
4. დებულებას დაემატოს შემდეგი შინაარსის 30-ე მუხლი:
„მუხლი 30.
არასაპატიმრო სასჯელთა აღსრულებისა და პრობაციის დეპარტამენტის ძირითადი ამოცანებია:
ა) არასაპატიმრო სასჯელების აღსრულებისა და პრობაციის ორგანიზება და უზრუნველყოფა;
ბ) არასაპატიმრო სასჯელთა აღსრულებისა და პრობაციის ბიუროების კოორდინაცია და „არასაპატიმრო სასჯელთა აღსრულების წესისა და პრობაციის შესახებ“ საქართველოს კანონით განსაზღვრული სამართლებრივი აქტების აღსრულების უზრუნველყოფა“.
ე. შევარდნაძე