ზემო აფხაზეთში ჰიდროელექტროსადგურის მშენებლობის ღონისძიებათა შესახებ

საქართველოს მთავრობის

განკარგულება №439

2007 წლის 21 აგვისტო

ქ. თბილისი

1. ზემო აფხაზეთში ედექტროენერგიაზე მზარდი მოთხოვნილების დასაკმაყოფილებლად ჰიდროელექტროსადგურის მშენებლობის უზრუნველყოფის მიზნით:

ა) საქართველოს ენერგეტიკის სამინისტრომ (ნ. გილაური) „საქართველოს 2007 წლის სახელმწიფო ბიუჯეტის შესახებ“ საქართველოს კანონით მისთვის განსაზღვრული საერთო ასიგნებებიდან გამოყოს 2 630 000 (ორი მილიონ ექვსას ოცდაათი ათასი) ლარი და უზრუნველყოს ზემო აფხაზეთში ჰიდროელექტროსადგურის მშენებლობის საპროექტო და სამშენებლო სამუშაოების შესყიდვა;

ბ) „სახელმწიფო შესყიდვების შესახებ“ საქართველოს კანონის მე-10 მუხლის მე-3 პუნქტის „ე“ ქვეპუნქტის შესაბამისად საქართველოს ენერგეტიკის სამინისტრომ სათანადო სახელმწიფო შესყიდვების განხორციელება უზრუნველყოს ერთ პირთან მოლაპარაკების საშუალებით;

გ) ეთხოვოს აჟარის (ზემო აფხაზეთის) მუნიციპალიტეტის გამგეობას, რომ თავისი კომპეტენციის ფარგლებში უზრუნველყოს ჰიდროელექტროსადგურის უმოკლეს ვადაში მშენებლობისა და ექსპლუატაციაში მიღების მიზნით შესაბამის ღონისძიებათა განხორციელება;

დ) საქართველოს ფინანსთა სამინისტრომ (ა. ალექსიშვილი) საჭიროების შემთხვევაში საქართველოს ენერგეტიკის სამინისტროს წინადადებით შეიტანოს შესაბამისი ცვლილებები საქართველოს 2007 წლის სახელმწიფო ბიუჯეტის კვარტალურ განწერასა და ოპერატიულ-ფინანსურ გეგმაში.

2. განკარგულება ამოქმედდეს ხელმოწერის დღიდან.

პრემიერ-მინისტრი ზ. ნოღაიდელი