ს აქართველოს მთ ავრობის
განკარგულება № 742
2009 წლის 9 ოქტომბერი
ქ. თბილისი
2009-2010 წლების ზამთრის პერიოდისათვის იძულებით გადაადგილებული პირების – დევნილების სათბობი შეშით უზრუნველყოფის შესახებ
იძულებით გადაადგილებული პირების – დევნილების სათბობი შეშით უზრუნველყოფის მიზნით:
1. საქართველოს გარემოს დაცვისა და ბუნებრივი რესურსების სამინისტროს სახელმწიფო საქვეუწყებო დაწესებულებამ – სატყეო დეპარტამენტმა (შემდგომში – სატყეო დეპარტამენტი) უზრუნველყოს სახელმწიფო სამეურნეო ტყის ფონდის ტერიტორიაზე 2009-2010 წლების ზამთრის სეზონისათვის სათბობი შეშის გასაცემად გამოყოფილი ტყეკაფების ფონდიდან, რეგიონალური სატყეო სამმართველოების მეშვეობით, საქართველოს ლტოლვილთა და განსახლების სამინისტროსათვის ტყეკაფების დამაგრება და სათბობი შეშის გაცემა მოქმედი კანონმდებლობის შესაბამისად.
2. საჭიროების შემთხვევაში სატყეო დეპარტამენტი უფლებამოსილია, საქართველოს ლტოლვილთა და განსახლების სამინისტროს (იძულებით გადაადგილებული პირების – დევნილებისათვის) საშეშე მერქნის დამატებით გამოყოფის შესახებ არგუმენტირებული მოთხოვნის საფუძველზე განახორციელოს სახელმწიფო სამეურნეო ტყის ფონდის მიკროუბნებში, შესაძლებლობის ფარგლებში, საშეშე კატეგორიის ხეების აღრიცხვა (მონიშვნა), აღრიცხვა-შეფასების მაუწყებელში მონიშნული ხეების ადგილმდებარეობის (სატყეო უბანი, კვარტალი, ლიტერი) მითითებით შეტანა, ხეების დამაგრება და გაცემა რეგიონალური სატყეო სამმართველოების მეშვეობით.
3. სატყეო დეპარტამენტის მიერ სათბობი შეშის გაცემა (იძულებით გადაადგილებული პირების – დევნილებისათვის) განხორციელდეს საქართველოს ლტოლვილთა და განსახლების სამინისტროს არგუმენტირებული მოთხოვნის საფუძველზე.
4. გამოყოფილ ტყეკაფებში საშეშე მერქნის დამზადებისა და ტყეკაფიდან ტრანსპორტირების განხორციელებისათვის საქართველოს ფინანსთა სამინისტრომ „ საქართველოს 2009 წლის სახელმწიფო ბიუჯეტის შესახებ“ საქართველოს კანონით გათვალისწინებული საქართველოს მთავრობის სარეზერვო ფონდიდან საქართველოს ლტოლვილთა და განსახლების სამინისტროს გამოუყოს 315 000 (სამას თხუთმეტი ათასი) ლარი.
5. საქართველოს ლტოლვილთა და განსახლების სამინისტრომ „ საქართველოს 2009 წლის სახელმწიფო ბიუჯეტის შესახებ“ საქართველოს კანონით მისთვის გათვალისწინებული ასიგნებებიდან 129 503 (ას ოცდაცხრა ათას ხუთას სამი) ლარი მიმართოს გამოყოფილ ტყეკაფებში საშეშე მერქნის დამზადებისა და ტყეკაფიდან ტრანსპორტირებისათვის.
6. საქართველოს ლტოლვილთა და განსახლების სამინისტრომ ამ განკარგულების მე-5 პუნქტით გათვალისწინებული ღონისძიებების შეზღუდულ ვადებში შეუფერხებელად შესრულებისათვის საჭირო სახელმწიფო შესყიდვები განახორციელოს ერთ პირთან მოლაპარაკების საშუალებით, „ სახელმწიფო შესყიდვების შესახებ“ საქართველოს კანონის მე-10 მუხლის მე-3 პუნქტის „ ე“ ქვეპუნქტის შესაბამისად.
7. ცნობად იქნეს მიღებული, რომ საქართველოს ლტოლვილთა და განსახლების სამინისტრო „ მოსაკრებლების სისტემის საფუძვლების შესახებ“ საქართველოს კანონის მე-6 მუხლის შესაბამისად არ წარმოადგენს ბუნებრივი რესურსებით სარგებლობისათვის მოსაკრებლის გადამხდელს.
პრემიერ-მინისტრი ნ. გილაური