საქართველოს სახელმწიფო დაცვის სპეციალური სამსახურის შინაგანაწესის დამტკიცების თაობაზე

საქართველოს სახელმწიფო დაცვის სპეციალური სამსახურის (შემდგომში – სამსახური) შინაგანაწესის (შემდგომში – შინაგანაწესი) მიზანია ხელი შეუწყოს სამსახურის მოსამსახურეთა საშემსრულებლო დისციპლინის განმტკიცებას.

მუხლი 2. სამუშაო დროის დასაწყისი და დასასრული, შესვენების დრო

1.    სამსახურში დაწესებულია ხუთდღიანი სამუშაო კვირა, ორი დასვენების დღე (შაბათი და კვირა), გარდა იმ შემთხვევისა, როდესაც თანამშრომლები სამსახურს ასრულებენ წინასწარ განსაზღვრული მორიგეობის განრიგის ან დამტკიცებული დაცვითი ღონისძიების გეგმის შესაბამისად.

2.     სამუშაო დღის ხანგძლივობა განისაზღვროს 8 (რვა) საათით, 10:00 საათიდან 19:00 საათამდე.

3.     დღის განმავლობაში განსაზღვრულია შესვენების დრო 13.00 საათიდან 14.00 საათამდე. სამსახურის თანამშრომელს შეიძლება მიეცეს შესვენების დროით სარგებლობის უფლება დღის სხვა მონაკვეთში.

4. სამსახურის თანამშრომლებს, რომლებიც სამსახურებრივ მოვალეობას ასრულებენ დასაცავი ობიექტების ადმინისტრაციულ შენობა-ნაგებობებში  ოპერატორის ან საშვთა ბიუროს ინსპექტორის თანამდებობაზე, დაუდგინდეთ შესაბამის ობიექტში მოქმედი სამუშაო დროის რეჟიმი.

მუხლი 3. სამუშაოდან ხანმოკლე გათავისუფლება

1.    სამსახურის სტრუქტურული დანაყოფების ხელმძღვანელები უფლებამოსილნი არიან:

ა)     სამუშაო დღის განმავლობაში თანამშრომელი ხანმოკლე ვადით გაათავისუფლონ სამსახურებრივი მოვალეობის შესრულებისგან პირადი თხოვნის საფუძველზე, აგრეთვე განახორციელონ აღნიშნული უფლების დელეგირება თავის მოადგილეებზე და თავის დაქვემდებარებაში მყოფი სტრუქტურული ქვედანაყოფების ხელმძღვანელებზე;

ბ)    გამონაკლის შემთხვევებში, ოჯახური პირობებიდან და პირადი საჭიროებიდან გამომდინარე, შესაბამისი პატაკის საფუძველზე თანამშრომელი გაათავისუფლონ სამსახურებრივი მოვალეობის შესრულებისაგან არაუმეტეს ერთი სამუშაო დღისა.

2.    ამ მუხლის პირველი პუნქტის „ბ” ქვეპუნქტის შესაბამისად:

ა)     სამსახურის სტრუქტურული დანაყოფის უფროსის მოადგილის გათავისუფლება ხორციელდება სამსახურის უფროსის ან სამსახურის უფროსის მოადგილის თანხმობით საკურატორო სფეროების მიხედვით;

ბ)    სამსახურის სტრუქტურული დანაყოფის უფროსის გათავისუფლება ხორციელდება სამსახურის უფროსის ან სამსახურის უფროსის მოადგილეების მიერ საკურატორო სფეროების მიხედვით.

3.    თანხმობის შემთხვევაში, უშუალო ხელმძღვანელ პირს, რომელიც თანამშრომელს შუამდგომლობს სამსახურებრივი მოვალეობების შესრულებისგან დროებით გათავისუფლების შესახებ, ეკისრება პასუხისმგებლობა თანამშრომლის ფუნქციებთან დაკავშირებული სამუშაო პროცესის შეუფერხებლობაზე.

4.    თანამშრომლების სამსახურში გამოცხადებისა და სამუშაო ადგილის დატოვების დროის დასაფიქსირებლად შეიძლება გამოყენებულ იქნეს ტექნიკური საშუალებები ან სამსახურის უფროსის ინდივიდუალური ადმინისტრაციულ-სამართლებრივი აქტით განსაზღვრული სააღრიცხვო ჟურნალი.  კონტროლის ტექნიკური საშუალებაა  პლასტიკური ბარათი, რომელიც იმავდროულად წარმოადგენს სამსახურებრივ პირადობის მოწმობას. სამსახურის კადრების მთავარი სამმართველო უზრუნველყოფს აღნიშნული ბარათების გაცემას და მათი ჩაბარების კონტროლს თანამშრომლის სამსახურიდან დათხოვნის, თანამდებობრივი გადაადგილების ან სხვა აუცილებელი გარემოებების არსებობისას.

მუხლი 4. დასვენების და სადღესასწაულო დღეებში, აგრეთვე ყოველდღიური სამუშაო დროის დამთავრების შემდეგ დაწესებულებაში ყოფნის პირობები და წესი

1.    დასვენებისა და სადღესასწაულო დღეებში, შესვენების დროს ან სამუშაო დროის დამთავრების შემდეგ სამსახურებრივ მოვალეობათა შესრულება ნებაყოფლობითია.

2.    დასვენებისა და სადღესასწაულო დღეებში სამსახურში გამოცხადების შესახებ, აგრეთვე სამუშაო დროის დასრულების შემდეგ სამსახურებრივ მოვალეობათა შესრულების გაგრძელების თაობაზე დავალების მიცემა შეიძლება:

ა)     სამსახურებრივი საჭიროებიდან გამომდინარე, რომლის შესახებ გადაწყვეტილებას იღებს სამსახურის უფროსი, თავისი კომპეტენციის ფარგლებში – სამსახურის უფროსის მოადგილე, აგრეთვე ზემდგომ თანამდებობის პირთან შეთანხმებით სამსახურის სტრუქტურული დანაყოფის უფროსი და მისი მოადგილე, სამსახურის სტრუქტურული დანაყოფის შემადგენლობაში შემავალი სტრუქტურული ქვედანაყოფის უფროსი;

ბ)    დადგენილი წესით, სამსახურში ან სამსახურის სტრუქტურულ დანაყოფში მობილიზაციის გამოცხადების შემთხვევაში, რაც ხორციელდება შესაბამისი გეგმების მიხედვით.

3.    სამსახურის თანამშრომელს ამ მუხლის მე-2 პუნქტის „ა” ქვეპუნქტით გათვალისწინებულ ზეგანაკვეთურ სამუშაოსთან დაკავშირებით შეიძლება მიეცეს დასვენების უფლება არასამუშაო საათებში სამსახურში გატარებული დროის შესაბამისად, სამსახურის შესაბამისი სტრუქტურული დანაყოფის და მისი ქვედანაყოფების მუშაობის უწყვეტი რეჟიმის შენარჩუნების გათვალისწინებით, რომლის რეგულირებაც უნდა უზრუნველყოს სამსახურის შესაბამისი სტრუქტურული დანაყოფის ხელმძღვანელმა.

4.    დასვენებისა და უქმე დღეებში, აგრეთვე სამუშაო დროის დამთავრების შემდეგ სამსახურებრივი მოვალეობების შესრულებისთვის შრომის ანაზღაურების თაობაზე გადაწყვეტილებას იღებს სამსახურის უფროსი კანონმდებლობით დადგენილი წესით.

მუხლი 5. სამსახურებრივ საკითხებზე განკარგულებათა მოსამსახურეებამდე დაყვანის წესი

1.    სამსახურებრივ საკითხებზე გაცემული განკარგულებები მოსამსახურეებამდე დაიყვანება:

ა)     გამოცხადების საშუალებით;

ბ)    შესაბამისი აქტის პირადად გაცნობით, რასაც მოსამსახურე ადასტურებს ხელმოწერით.

2.    საჭიროების შემთხვევაში, სამსახურის შესაბამისი თანამდებობის პირები ვალდებულნი არიან ზემდგომ პირთა განკარგულებების მათ დაქვემდებარებაში მყოფ პირად შემადგენლობამდე დასაყვანად დამატებითი ღონისძიების სახით განახორციელონ სათანადო ინსტრუქტაჟის გაწევის ანდა თათბირის ჩატარების ორგანიზება.

3.    სამსახურის უფროსის განკარგულებები და მისი ხელმოწერით დამტკიცებული დოკუმენტები სავალდებულოა სამსახურის მთელი შემადგენლობისთვის. სამსახურის უფროსის მოადგილეებმა და სამსახურის სხვა თანამდებობის პირებმა თავისი ხელმოწერით შეიძლება დაამტკიცონ დოკუმენტები სამსახურის უფროსის ნორმატიული ან ინდივიდუალური ადმინისტრაციულ-სამართლებრივი აქტით მათთვის დელეგირებული უფლებამოსილების ფარგლებში.       

4.    არასაიდუმლო დოკუმენტები შეიძლება განთავსდეს სამსახურში სპეციალურად გამოყოფილ თვალსაჩინო ადგილზე სამსახურის პირადი შემადგენლობისათვის გასაცნობად.

5.    საიდუმლო დოკუმენტების გაცნობა, ასლის გადაღება ან ეგზემპლარის მომზადება ხორციელდება კანონმდებლობით დადგენილი საიდუმლოების დაცვის მოთხოვნების გათვალისწინებით.

მუხლი 6. ხელფასის გაცემის დრო და ადგილი

1.    სამსახურის თანამშრომლის ხელფასი მოიცავს შესაბამისი ნორმატიული აქტების მიხედვით განსაზღვრულ ფულად სარგოებს, პრემიას და დანამატებს.

2.    სამსახურის თანამშრომლებს ხელფასი ეძლევათ თვეში ერთხელ, არა უგვიანეს მიმდინარე თვის ბოლო რიცხვისა.

3.    სამსახურის თანამშრომლებზე ხელფასი გაიცემა უნაღდო ანგარიშსწორებით, შესაბამისი საბანკო დაწესებულების მეშვეობით.

მუხლი 7. შრომის დაცვისა და ხანძარსაწინააღმდეგო უსაფრთხოების ზოგადი ინსტრუქციები

1.    სამსახურის თანამშრომლები განუხრელად უნდა ასრულებდნენ შრომის დაცვისა და ხანძარსაწინააღმდეგო უსაფრთხოების მოთხოვნებს, რომლებიც გათვალისწინებულია საქართველოს კანონმდებლობით.

2.    სამსახურის თანამშრომელი ვალდებულია:

ა)     პირნათლად და კეთილსინდიდიერად შეასრულოს მასზე დაკისრებული მოვალეობანი;

ბ)    სპეციალური მითითების გარეშე დაიცვას ის სამართლებრივი აქტები, რომლებიც მის სამსახურებრივ საქმიანობას უკავშირდება;

გ)    შეასრულოს ხელმძღვანელი თანამდებობის პირების ბრძანება, განკარგულება და მითითება, რომლებიც გამოცემულია კანონმდებლობით დადგენილი უფლებამოსილების ფარგლებში;

დ) დაიცვას შრომის დისციპლინა, რაციონალურად გამოიყენოს სამუშაო დრო, არ დაუშვას ისეთი ქმედება, რომელიც აფერხებს სამსახურის შესაბამისი სტრუქტურული დანაყოფის მუშაობას და ლახავს საჯარო სამსახურის ავტორიტეტს;

ე)     გაუფრთხილდეს სახელმწიფო საკუთრებას, დაიცვას მატერიალური ფასეულობანი;

ვ)    დაიცვას სამსახურებრივი ურთიერთობის ეთიკისა და სუბორდინაციის ნორმები;

ზ)   გაუფრთხილდეს სამსახურებრივი დანიშნულების მოწმობას, სამკერდე ნიშანს და მისთვის გადაცემულ სხვა საშუალებებს, გამოიყენოს ისინი დანიშნულებისამებრ, ხოლო მათი დაკარგვის შემთხვევაში აცნობოს თავის უშუალო უფროსს და სამსახურის შესაბამისი სტრუქტურული დანაყოფის ხელმძღვანელის სახელზე წარმოადგინოს მოხსენებითი ბარათი (წერილობითი ახსნა-განმარტება);

თ)   წესრიგში ჰქონდეს სამუშაო ადგილი, დაიცვას სისუფთავე შენობაში და მის ტერიტორიაზე, სამსახურში გამოცხადდეს მოწესრიგებულ და სამსახურებრივი მოვალეობების შესრულებისთვის შესაფერის ფორმაში, დაიცვას თამბაქოს მოხმარებასთან დაკავშირებით დაწესებული მოთხოვნები;

ი)    არ დაუშვას მისთვის გადაცემული მატერიალურ-ტექნიკური საშუალებების არასამსახურებრივი დანიშნულებით გამოყენება;

კ)    სამუშაო დღის ბოლოს სამსახურიდან გასვლისას, აუცილებელი სამსახურებრივი საჭიროების გარეშე, არ დატოვოს ჩართულ მდგომარეობაში კომპიუტერული ან სხვა ელექტრო- ტექნიკა, საბრძოლო მასალებთან, საწვავთან და სხვა ადვილად აალებად ნივთიერებებთან არ დაუშვას თამბაქოს მოხმარება, ასანთის ან სხვა აალების გამომწვევი საშუალების გამოყენება, დაიცვას ხანძარსაწინააღმდეგო უსაფრთხოების სხვა პრევენციული ნორმები.

3.    სამსახური თავის განმგებლობაში არსებული შესაბამისი მატერიალურ-ტექნიკური და ფინანსური რესურსების ფარგლებში, თანამშრომლებს უქმნის შრომის უსაფრთხო და სამსახურებრივი მოვალეობების განხორციელებისთვის ხელსაყრელ პირობებს.

4.    სამსახურის თანამშრომლები, კანონმდებლობით დადგენილი წესით, სარგებლობენ შვებულების და სამსახურებრივ მივლინებასთან დაკავშირებული ხარჯების ანაზღაურების უფლებით.

მუხლი 8. სამსახურში არყოფნის შეტყობინების წესი

1.    დადგენილი წესით ხელმძღვანელ პირებთან წინასწარი შეთანხმების გარეშე სამსახურში გამოუცხადებლობა საპატიოდ ჩაითვლება, როდესაც გამოუცხადებლობის მიზეზი, ობიექტური გარემოებებიდან გამომდინარე, თანამშრომლისთვის არ იყო ან ვერ იქნებოდა წინასწარ ცნობილი.

2.     წინასწარ ცნობილი მიზეზის გარეშე სამსახურში გამოუცხადებლობის შემთხვევაში, თანამშრომელი ვალდებულია:

ა)     დაუყოვნებლივ აცნობოს თავის უშუალო უფროსს, ხოლო მასთან დაკავშირების შეუძლებლობის შემთხვევაში – ზემდგომ ხელმძღვანელ თანამდებობის პირებს არსებული გარემოებებისა და სამსახურში არყოფნის სავარაუდო პერიოდის შესახებ;

ბ)    კანონმდებლობის ფარგლებში მიიღოს ყველა ზომა ხელის შემშლელი გარემოებების აღმოფხვრისა და სამსახურში დროულად გამოცხადებისთვის.

3.    სამსახურში გამოცხადებისთანავე, თანამშრომელი სამსახურის შესაბამისი სტრუქტურული დანაყოფის უფროსს წარუდგენს წერილობით პატაკს სამსახურში არყოფნის საპატიოდ ჩათვლის თაობაზე. წერილობით პატაკს თან უნდა ერთოდეს სამსახურში გამოუცხადებლობის ობიექტური გარემოების შესაძლო დამადასტურებელი დოკუმენტი.